भेजेड़ा चेला का काम 26 - जीवन को च्यानणो (सेकावाटी नया नियम की पोथ्या)

अगरीपा क सामै पोलुस की पेसी

¹ अगरीपा पोलुसऊँ बोल्यो, “तनै तेरा खुद क बचाव म बोलबा की छुट ह।” जणा पोलुस आपको हात उठायो अर आपका बचाव म बोलबो चालू कर्यो,

² “म्हराज अगरीपा! ओ मेरो सोभाग ह क यहूदि मेर प जोक्यु दोस लगायो ह आकै बचाव म मनै खुदनै थारै सामै बोलबा को मोको मिल्यो ह।

³ खास कर जदकी थे यहूदि रिती-रिवाजानै अर बाकी जिरैनै चोखी ढाळ जाणो हो। इ ताँई म थारूँ माँग करूं हूँ क थे थ्यावस क सागै मेरी सुणज्यो।

⁴ “सगळा यहूदि जाणी हीं क टाबरपुणाऊँई म, कंय्यांसिक जीतो आयो हूँ। अर अ जाणी हीं क म मेरी पूरी जिंदगी पेली तो मेरा यहूदि मिनखा क मांयनै अर जणा पाछै यरूसलेम म कंय्यांसिक बिताई।

⁵ बे मनै सदाऊँ जाणता आया हीं अर बे इ बात की गुवाई दे सकीं हीं क म म्हारा धरम का कट्टर पंथ फरिसी क गेल जीतो आयो हूँ।

⁶ अर इब बि करार की आस की बजेऊँ जखी परमेसर आपणा बडकाऊँ कर्यो हो म अठै खड़्यो हूँ।

⁷ आ बाई आस ह जिनै पाबा ताँई आपणा मिनखा का बारां कूणबा दिन-रात परमेसर की भगती करी। अर इ आस की बजेऊँई अ यहूदि मेर प दोस लगावीं हीं, म्हराज!

⁸ परमेसर मरेड़ानै जीवावै ह आ बात थारै अठै बिस्वास जोगी क्युं कोनी समजी जावै?

⁹ “म बी सोच्यो हो, जोक्यु मेरूँ हो सकै बो म नासरत का ईसु नाम क खिलाप करूं।

¹⁰ अर म यरूसलेम म अंय्यांई कर्यो हो। अर परधान याजकाऊँ अधिकार लेर परमेसर का मिनखानै जेळ म गेर्यो हो अर जद बानै मार गेर्यो जातो हो जणा म बी बाकै खिलाप मेरी हामी देतो हो।

¹¹ अर बोळीबर म अरदास करबाळी झघा म बानै पिट्यो अर बापै ईसु की बुराई करबा ताँई जोर देतो हो। म बापै झाळा भर'र अत्तो बिकराळ होगो हो क म दिसावर नगर्या म बी जार बानै दिन घाल्या करतो हो।

पोलुस क मुंडा बिको हियो बदलबा की बात

¹² “अर इ लोर म जद म परधान याजकाऊँ अधिकार कागद मंडवार दमिसक जार्यो हो।

¹³ तो म्हराज गेला म मनै धोळै दोपारा घणो जोरको च्यानणो जखो आसमानऊँ आर्यो हो मेरै अर मेरै सागै जाबाळा क च्यारूमेर चमकतो दिख्यो। अर बो अत्तो जोरको हो की सूरज को च्यानणो बिकै आगै क्युंई कोनी हो।

¹⁴ अर म्हें सगळा धरती प पड़गा, अर इबरानी भासा म, म अंय्यां की एक उवाज सुणी ‘साऊल ओ साऊल! तू मनै क्युं दिन घालै ह? आरी क मुंडा प लात मार तू क्याले खुदनै दिन घालै ह।’

¹⁵ जणा म बुज्यो ‘परबु थे कूण हो?’ अर परबु बोल्या, ‘म ईसु हूँ जिनै तू दिन घालै ह।

¹⁶ पण इब तू उठर खुदका पगा प खड़्यो हो। म तनै मेरो दास बणाबा ताँई दरसाव दिओ हूँ। अर जोक्यु तू आज देख्यो ह अर जखी म तनै आगै दिखास्युं बिनै लोगानै बतातो रेह।

¹⁷ म तनै इजरायली अर गैर-यहूदिआ का मिनखाऊँ बचास्युं जाकन म तनै भेजस्युं।

¹⁸ जिऊँ तू बाकी आँख्या खोलै अर बानै अँधेराऊँ च्यानणा म अर सेतान की सक्‍तिऊँ परमेसर कानि ल्यावै, अर मेर प बिस्वास करबाऊँ बानै पापऊँ माफी मिलसी अर जखी बापोत मेरा टाळेड़ा मिनखा ताँई ह बिमै बाको बी हिस्सो होसी।’

¹⁹ जणा म्हराज अगरीपा, म बि दरसावनै कोनी टाळ्यो जखो मेर कनै ईस्बर नगरीऊँ आयो हो।

²⁰ जणा म सऊँ पेली दमिसक पाछै यरूसलेम अर पाछै यहूदिआ का सगळा देसा का रेह्बाळा अर परमेसरनै नइ ध्यारबाळा मिनखानै समजातो रिह्यो क पापऊँ तौबा करो, परमेसर कानि आओ अर हियो बदलबा जोगो काम करो।

²¹ आ बाता की बजेऊँई जद म मनदर म हो जणा यहूदि मनै पकड़र मारबा की कोसिस करी।

²² पण परमेसर की दयाऊँ म आज अठै खड़्यो हूँ अर छोटाऊँ लेर बडा ताँई सगळानै मेरी गुवाई देर्यो हूँ। अर बा बातानै छोडर ओर क्युंई कोनी खेऊँ जानै मूसा अर परमेसर की खेबाळा कह्या हा क अ बाता होबाळी ह।

²³ की मसी बोळा दुख भोगसी, मरसी अर बोई सऊँ पेली मरेड़ा म जिंदो होसी जिऊँ यहूदि अर गैर-यहूदि मिनखा म च्यानणा को हेलो पाड़ै।”

²⁴ अंय्यां बोलर जद पोलुस खुदको बचाव करर्यो हो, जणा फेतूस जोरऊँ बोल्यो, “पोलुस! तू बावळो ह, तेरी घणी बिद्‍या तनै बावळो करै ह।”

²⁵ जणा पोलुस जुबाब दिओ, “म्हराज फेतूस! म बावळो कोनी, पण म सची अर समजहाळी बात खेऊँ हूँ।

²⁶ म्हराज अगरीपा अ बाता म थानै बेधड़क खे सकूँ हूँ, क्युं क थे आ सगळी बाता क बारां म जाणो हो। अर अ सगळी बाता थारूँ छानी कोनी क्युं क अ बाता ओला अर कूणा म कोनी घटी।

²⁷ म्हराज अगरीपा, थे परमेसर की खेबाळा म बिस्वास करो हो के? म जाणू हूँ थे करो हो।”

²⁸ अगरीपा पोलुसऊँ बोल्यो, “तू के जाणै ह मनै थोड़ासा टेम म मसी को चेलो बणा लेसी?”

²⁹ पोलुस बोल्यो, “के थोड़ो टेम, के बोळो, पण म तो परमेसरऊँ आई अरदास करूं हूँ क थे अर जत्ता बी मनै आज अठै सुणी हीं बे जि साँकळाऊँ म बंदर्यो हूँ आनै छोडर बाकी बाता म मेरै जंय्यां का होज्यावै।”

³⁰ जणा राजा खड़्यो होगो अर बिकै सागै राजपाल, बरनिके अर जत्ता बी बठै बेठ्या हा सगळा खड़्या होगा।

³¹ अर बठैऊँ जार आपसरी म बतळाबा लाग्या, “ओ मिनख अंय्यां को तो कोई काम कोनी कर्यो जिऊँ इनै मार्यो अर बंदि राख्यो जावै।”

³² अर अगरीपा फेतूसऊँ बोल्यो, “ओ मिनख ज रोम का राजा कनै सुणाई की दरखास्त नइ करतो जणा ओ छोड्यो जा सकै हो।”