भेजेड़ा चेला का काम 25 - जीवन को च्यानणो (सेकावाटी नया नियम की पोथ्या)

फेतूस क सामै पोलुस की दरखास्त

¹ बि परदेस म पुगबा क तीन दिना पाछै, फेतूस कैसरियाऊँ यरूसलेम गयो।

² जणा बठै परधान याजका अर यहूदिआ का नेता बिकै सामै पोलुस क खिलाप बिका कान भरबा आया।

³ अर बे बिऊँ दरखास्त करी क बो पोलुसनै कैसरियाऊँ यरूसलेम भेजै, क्युं क बे बिनै गेला मई मारबा की साजिस कर राखी ही।

⁴ जणा फेतूस बाऊँ बोल्यो, “पोलुस कड़ा पेरा क मांयनै कैसरिया म बंद ह। अर म बी तावळो बठैई जार्यो हूँ।

⁵ अर थारा क्युंक अधिकारी मेरै सागै चालीं अर ज बो क्युं गळत कर्यो ह जणा बिपै दोस लगावै।”

⁶ फेतूस आठ दस दिन ओर बाकै सागै रिह्यो, जणा पाछै बो कैसरिया आयो। अर आगला दिन न्याय कचेरी म बेठर पोलुसनै बुलवा भेज्यो।

⁷ अर जद पोलुस बठै आयो जणा यरूसलेमऊँ आएड़ा यहूदि बिकै बारकी फिरगा अर सागेड़ा-सागेड़ा दोस बिकै सीर मंढबो चालू कर्यो, पण बे बानै साबित कोनी कर सक्या।

⁸ पण पोलुस आपका बचाव म बोल्यो, “म यहूदिआ का कानून, मनदर अर रोमी समराट मऊँ कोई क खिलाप क्युंई गळत कोनी कर्यो।”

⁹ पण फेतूस यहूदि मिनखानै राजी करबा क चकरां म पोलुसऊँ बुज्यो, “के तू चावै ह की म तेरा मुकदमा को फेसलो यरूसलेम म करूं।”

¹⁰ जणा पोलुस बोल्यो, “म रोम हाळा राजा का एक न्याय आसन क सामै खड़्यो हूँ, अर अठैई मेरो न्याय कर्यो जावै। यहूदिआ क खिलाप म क्युंई बुरो कोनी कर्यो इ बातनै तू चोखी ढाळ जाणै ह।

¹¹ ज म कानून तोड़्यो हूँ अर म क्युं अंय्यां को बुरो काम कर्यो हूँ जि बजेऊँ मनै मोत की सजा दि जावै जणा म मरबाऊँ कोनी मुकरूं। पण जखा गळत काम मेरै सीर मंड्या जार्या हीं ज बामैऊँ क्युंई सच कोनी निकळै जणा मनै आकै हाता म कोई कोनी सूप सकै, म रोम का राजा क सामै दरखास्त लगाऊँ हूँ।”

¹² जणा फेतूस आपका पंचा क सागै सला-मस्वरो कर बोल्यो, “तू रोम का राजा ताँई दरखास्त करी ह, जणा इब तू रोम का राजा क सामैई जासी।”

राजा अगरीपा अर बरनिके क सामै पोलुस

¹³ क्युंक दिना क पाछै राजा अगरीपा अर बरनिके फेतूसऊँ मिलबा कैसरिया आया।

¹⁴ बानै बठै रेह्ता क्युंक दिन होया, जणा फेतूस पोलुस का मुकदमा की बात राजानै खे सुणायो अर बोल्यो, “अठै एक अंय्यां को मिनख ह जिनै फेलिक्स बंदि छोडगो हो।

¹⁵ अर जद म यरूसलेम गयो जणा यहूदि मिनखा का परधान याजका अर यहूदि नेता बिकै खिलाप सिकायत करी अर बिनै सजा देबा की माँग करी।

¹⁶ जणा म बाऊँ बोल्यो, रोम्या म ओ चलन कोनी की कोईनै बी बिकी बात सुण्या पेली अर जद ताँई बिपै दोस मंढबाळानै बिकै आमै-सामै कोनी कर्यो जा, सजा ताँई सूप दे।

¹⁷ अर जद बे अठै आया, जणा म बिना टेम खराब कर्या आगला दिनई कचेरी म न्याय सिंघासन प बेठर ओडायो क पोलुसनै अठै पेस कर्यो जावै।

¹⁸ अर जद बिपै दोस मंढबाळा खड़्या होया जणा बे बिपै अंय्यां का कोई बुरा काम को दोस कोनी मंढ्यो जंय्यां क म सोचै हो।

¹⁹ पण बामै तो बाका धरम अर ईसु नाम का एक मिनख क बारां म जखो मरगो हो, अर इनै पोलुस जिंदो बतावै ह इ बात की राड़ ही।

²⁰ म इ बातनै ते कोनी कर सक्यो की आ बाता की जाणकारी कंय्यां ल्युं, जणा म पोलुसनै बुज्यो तेरा मुकदमा का फेसला ताँई तू यरूसलेम जाबा ताँई त्यार ह के?

²¹ पण पोलुस दरखास्त लगाई की बिनै हिरासत म राख्यो जावै अर बिका मुकदमा को फेसलो रोम को राजा करै। जणा म ओडायो की जद ताँई म बिनै कैसर क कनै कोनी भेज द्‍युँ बिनै हिरासत मई राख्यो जावै।”

²² जणा अगरीपा फेतूसऊँ बोल्यो, “म खुद, इ मिनख की सुणबो चाऊँ हूँ।” जणा फेतूस बोल्यो, “थे बिनै दिनग्या सुणज्यो।”

²³ आगला दिन अगरीपा अर बरनिके गाजा-बाजा क सागै सेनापती अर नगरी का मान्या-थान्या क सागै कचेरी म आया। जणा फेतूस ओडायो, “पोलुसनै ल्यायो जावै।”

²⁴ फेतूस बोल्यो, “म्हराज अगरीपा अर अठै भेळा सगळा मिनखो! थे इ मिनखनै देखर्या हो जिकै बारां म सगळो यहूदि समाज, अठै अर यरूसलेम म चिलार मेरूँ माँग करी की ओ ओर जीबा जोगो कोनी।

²⁵ पण म इमै मार्या जाबा जोगी क्युंई बुराई कोनी देखी। अर जंय्यां की ओ खुदई रोम का राजा की सुणाई ताँई दरखास्त करी, जणा म इनै बाकन भेजबा को फेसलो कर्यो।

²⁶ पण इकै बारां म मेर कनै कोई पुक्‍ता बात कोनी जखी म रोम का राजानै मांडर भेजूँ। जणाई तो म इनै थारै सामै अर खास कर म्हराज अगरीपा! थारै सामै ल्यायो हूँ जिऊँ इ पुछाताछी क पाछै मेर कनै मांडबा ताँई क्युं होवै।

²⁷ क्युं क बिना दोस बताया बंदिनै भेजबो मनै ठिक कोनी लागै।”