भेजेड़ा चेला का काम 24 - जीवन को च्यानणो (सेकावाटी नया नियम की पोथ्या)

राजपाल फेलिक्स क सामै पोलुस को मुकदमो

¹ पाच दिन क पाछै म्हायाजक हनन्या कई यहूदि नेता अर तिरतूलस नाम का एक बकिलनै लेर आयो। अर फेलिक्स क सामै पोलुस प मुकदमाबाजी करबा ताँई बिपै दावो पेस कर्यो।

² अर जद पोलुसनै बठै बुलायो गयो जणा तिरतूलस बिपै दोस मंढर खेबा लाग्यो, “म्हराज! थारा राजपाट म म्हें बोळा राजी-खुसीऊँ रेह्‍वां हां अर म्हारा यहूदि मिनखा की भलाई ताँई थे बोळा सुदार कर्या हो।

³ अर आ बातानै म्हें सगळी झघा अर सगळी टेम राजी हियाऊँ माना हां।

⁴ अर म थानै ओर तंग करबो कोनी चाऊँ पण दया कर थे दो च्यार बात ओर सुणो।

⁵ ओ मिनख अपरादि ह अर म्हें इनै जगत का सगळा यहूदिआ म बबाळ मचाता देख्या हा, अर ओ नासरी पंथ को खास नेता ह।

⁶ अर ओ मनदरनै सूगलो करबा की कोसिस करर्यो हो पण म्हें इनै पकड़ लिओ। [म्हें इनै म्हारी रिती-रिवाज गेल सजा देबो चावै हा

⁷ पण पलटण को सरदार लूसियस इनै जोरामादी म्हारा हाताऊँ खोस लिआ,

⁸ अर तेरै सामै मुकदमाबाजी करबा को हुकम दिओ।] अर आ सगळी बाता को जाको म्हें इपै दोस लगावां हां, बानै थे खुदई जाच पड़ताळ कर जाण सको हो।”

⁹ अर यहूदि बी बिकी हाँ म हाँ मिलार बोल्या, “हाँ, अ बाता अंय्यांई ही।”

पोलुस को जुबाब

¹⁰ अर जद अधिकारी पोलुसनै बोलबा ताँई इसारो कर्यो, जणा बो बोल्यो, “म आ जा'णर की थे बोळा बरसाऊँ यहूदि मिनखा को न्याय कर्या हो, जणा म राजी होर तेरै सामै मेरो पक्ष धरूँ हूँ।

¹¹ आ बातानै जाणबो थारै ताँई कोई मुसकील की बात कोनी, भगती करबा ताँई मनै यरूसलेम म आया हाल बारा दिनाऊँ बेसी कोनी होया।

¹² अर बे मनै नइ तो मनदर म कोईऊँ जिरै करता देख्यो अर नइ अरदास करबाळी झघा म अर नइ नगरी म भीड़नै उकसाता देख्या।

¹³ अर बे बा बातानै जखी बे मेरै माथा मंढी ह, बानै तेरै सामै सच साबित कोनी कर सकै ह।

¹⁴ पण म अ बातानै झूठी कोनी बताऊँ क जिनै बे कुपंथ बोलीं हीं, म बि गेलाई मेरा बाप-दादा का परमेसर की भगती करूं हूँ। अर म बा सगळी बाता प बिस्वास करूं हूँ, जखी बाता मूसा का नेम-कायदा अर परमेसर की खेबाळा की पोथ्या म मंडरी ह।

¹⁵ अर जंय्यां अ परमेसर म आस राखै ह बंय्यांई म बी राखूँ हूँ की सगळा धरमी अर अधरमी दोन्या को ओज्यु जी उठबो होसी।

¹⁶ जणाई तो म बी आई कोसिस करूं हूँ की परमेसर अर मिनखा क सामै मेरी अन्तर-आत्मा साप रेह्‍वै।

¹⁷ कई बरसा ताँई दिसावर म रेह्बा क पाछै म मेरा यहूदि मिनखानै दान का रिपीआ देबा अर चढावो चढाबा आयो हो।

¹⁸ अर जद म अ सगळी बाता करर्यो हो जणा अ मनै मनदर म देख्या, बि टेम म सगळा बिधी-बिधाननै पूरो कर सुद होगो हो। अर नइ तो बठै कोई भीड़ ही अर नइ कोई रोळो-बेदो।

¹⁹ पण एसियाऊँ आएड़ा कई यहूदि बठै हा अर ज बाकन मेरै खिलापत म क्युं ह, जणा बेई आर तेरै सामै मेर प दोस लगावै।

²⁰ अर नहिस अठै भेळा आ मिनखाऊँ बुजो क जद म यहूदि धरम-पंचायत म खड़्यो हो, जनाड़ै बे मेर म कोई दोस देख्यो हो के?

²¹ इनै छोडर की म उची उवाज म बोल्यो हो क, ‘म मरबा क पाछै ओज्यु जी उठबा की बात प बिस्वास करूं हूँ’ इ बजेऊँ आज थे मेरो न्याय करो हो।”

²² जणा फेलिक्स जखो परबु का गेला क बारां म चोखी ढाळ जाणतो हो, बो बानै आ खेर टाळ दिओ क, “जद पलटण को सरदार लुसिआस आसी जणाई म तेरा मुकदमा को फेसलो करस्युं”

²³ अर फेलिक्स, सुबेदारनै ओडायो क, “पोलुसनै तेरी निगरानी म राख अर बिकाळा भाईलानै बिकी सेवा-पाणी करबा दे।”

पोलुस फेलिक्स अर बिकाळी घरहाळीऊँ बतळायो

²⁴ क्युं क दिन बितबा क पाछै फेलिक्स आपकी घरहाळी दुरसिलानै लेर आयो। अर बिकाळी घरहाळी यहूदि ही। जणा बो पोलुसनै बुलार बिकन मसी ईसु प बिस्वास करबा क बारां म बिऊँ सुण्यो।

²⁵ पण जद पोलुस धारमिक्‍ता, खुद प काबू राखबो अर परमेसर को मिनखा प आबाळा न्याय का दिन क बारां म बोलबा लाग्यो जणा फेलिक्स डरगो अर बोल्यो, “इब तो तू जा कदै ओज्यु मोको पड़सीक जणा तनै बुलास्युं।”

²⁶ बिनै पोलुसऊँ क्युं पुण-पावलो मिलबा की आस ही, जि बजेऊँ बो बिनै बुला-बुलार बतळाया करतो हो।

²⁷ अर जद दो बरस बितगा जणा पुरकीयुस फेतूस फेलिक्स की झघा आयो। अर फेलिक्स यहूदि मिनखानै राजी करबा क चकरां म बिनै केद मई छोडगो।