भेजेड़ा चेला का काम 22 - जीवन को च्यानणो (सेकावाटी नया नियम की पोथ्या)

¹ “यहूदि भाईड़ो, अर बडको मेरो पक्ष बी सुणो।”

² आ सुणर की बो म्हारूँ इबरानी भासा म बोलै ह जणा भीड़ एकदम चुपचाली होगी। जणा बो बोल्यो,

³ “म एक कलिकीया का तरसुस म जलमेड़ो एक यहूदि मिनख हूँ। अर मेरी लिखाई पढाई अठैई इ यरूसलेम नगरी म गमलिएल धरम-गरूजी क कनैई होई ह। अर आपणा बाप-दादा का नेम-कायदा मनै सई ढंगऊँ सीखाया गया हीं। अर जंय्यां थे परमेसरनै मानबा ताँई कट्टर हो बंय्यांई म बी हूँ।

⁴ इ ईसु का गेला प चालबाळा मिनखानै म मार गेर्यो अर बानै दिन घाल्यो हूँ अर इ गेला प चालबाळा मोट्यार अर लूगायानै बांद-बां'दर जेळ म गेर दिआ।

⁵ अर मेरी इ बात का गुवा म्हायाजक अर म्हासभा का सगळा यहूदि नेता ह। म बाऊँ अधिकार कागद मंडवार इ गेला प चालबाळा यहूदि भायानै पकड़र यरूसलेम ल्यार बंद करबानै दमिसक नगरी जार्यो हो।

बिको मन बदलबा क बारां म पोलुस बोल्यो

⁶ “अर जद चालतो-चालतो म दमिसक क सांकड़ै लाग्यो जणा दोपारी क टेम आसमानऊँ मेरै च्यारूमेर एक जोरकी बिजळीसी चमकी।

⁷ अर जिकी बजेऊँ म धरती प पड़गो अर मनै एक उवाज सुणी जखी अंय्यां ही, ‘ओ साऊल, ओ साऊल तू मनै क्याले दिन घालै ह?’

⁸ जणा म बोल्यो, ‘म्हराज थे कूण हो?’ अर बे कह्या, ‘म ईसु नासरी हूँ, जिनै तू दिन घालै ह।’

⁹ मेरै सागैहाळा बिजळी को बो च्यानणो सो तो देख्या पण जखो मेरै सागै बात करै हो बिकी उवाज कोनी सुण्या।

¹⁰ जणा म बोल्यो, ‘तो परबु म काँई करूं?’ परबु मेरूँ कह्या, ‘खड़्यो होर दमिसक म जा, अर जोक्यु तनै करबो ह बो तनै बठैई बतायो ज्यासी।’

¹¹ अर बि च्यानणा की बजेऊँ मनै सुजबो बंद होगो, अर मनै मेरै सागैहाळा हात पकड़र दमिसक ल्याया।

¹² “बि नगरी म हनन्या नाम को एक मिनख हो जखो नेम-कायदा प चालबाळो अर बठै का यहूदि मिनखा म मान्यो-थान्यो हो।

¹³ परबु की इंछ्या गेल बो मेर कनै आर खड़्यो होर मेरूँ बोल्यो, ‘मेरा लाडला बिस्वासी भाईड़ा साऊल, ओज्यु देखबा लाग।’ अर बि घड़ीई मेरी आँख्या का पाट खुलगा अर म बिनै देख्यो।

¹⁴ जणा बो मेरूँ बोल्यो, ‘आपणा बाप-दादा को परमेसर तनै इ ताँई टाळ्यो ह क तू बिकी इंछ्या जाणै। अर बि धरमीनै देखै अर बिका मुंडाऊँ बाता सुणै।

¹⁵ क्युं क तू मिनखा क आगै बा बाता की गुवाई देसी जानै तू सुणी अर देखी।

¹⁶ इब देर क्याकी? खड़्यो हो बतिस्मो ले अर बिका नामऊँ अरदास कर जिऊँ परमेसर तेरा पाप धो दे।’

¹⁷ “यरूसलेम आबा क पाछै म जद एक दिन मनदर म अरदास करर्यो हो, जणा मनै चाणचुकई एक दरसाव होयो।

¹⁸ अर मनै परबु जी दरसाव देर कह्या, ‘तावळोसो यरूसलेमऊँ चल्योजा क्युं क अठै का मिनख मेरा बारां म तेरी गुवाईनै कोनी मानी।’

¹⁹ जणा म बोल्यो, ‘परबु जी थे तो जाणोई हो की म यहूदि मिनखा क अरदास करबाळी झघा म जार थार प बिस्वास करबाळा क तड़ा मरवाया करतो हो अर जेळ म गेर दिआ करतो हो।

²⁰ अर जद थारा गुवा सतफनुसनै मार्यो जार्यो हो जणा बि टेम म बठैई खड़्यो हो, अर बिकी मोतनै सई बताई अर बिनै मारबाळा का गाबा की रूखाळी करी।’

²¹ जणा बो मेरूँ बोल्यो, ‘जणा जा म तनै दूर-दूर ताँई गैर-यहूदि मिनखा क कनै भेजस्युं।’”

²² आ बाता ताँई तो लोग बिकी सुणबो कर्या, अर इकै पाछै बे जोर-जोरऊँ रोळा घालबा लागगा, “अंय्यां को मिनख धरती प जीबा जोगो कोनी इनै मार गेरो।”

²³ अर जद बे रोळा घालता अर गाबा बगाता अर आसमान म धुळीया उडाता रिह्या।

²⁴ जणा पलटण को सरदार बिनै सेनाहाळा गड म लेज्यार बिकै तड़ा मारबा अर जाच करबा ताँई ओडायो क, “लोग इकै खिलापत म अंय्यां क्युं रोळा घालीं हीं।”

²⁵ पण जद बे बिनै तड़ा मारबा ताँई बांदर्या हा जणा बो सुबेदारऊँ बोल्यो, “कानून गेल थे एक रोमी मिनख क बिना अपराद साबित होया तड़ा लगवा सको हो के?”

²⁶ आ सुणर सुबेदार पलटण का सरदार क कनै गयो। अर बिनै जार बोल्यो, “तू ओ काँई करै ह? ओ तो रोमी मिनख ह।”

²⁷ जणा पलटण को सरदार बिकन आर बिऊँ बोल्यो, “मनै बता, के तू रोमी ह?” जणा बो बोल्यो, “हाँ।”

²⁸ आ सुणर पलटण को सरदार बोल्यो, “म रोमी नागरिकता मोटी रकम देर लिओ हूँ।” पोलुस बोल्यो, “म तो जलमजातई रोमी हूँ।”

²⁹ जणा बे सगळा मिनख जखा बिकी जाच पड़ताळ करर्या हा बे सगळा नाकै होगा। अर पलटण को सरदार बी आ जा'णर डरगो क म इनै बांद्‍यो हूँ।

यहूदि म्हापंचायत म पोलुस की पेसी

³⁰ सऊँ पेली पलटण को सरदार आ जाणबो चायो क यहूदि पोलुस क खिलापत म काँई दोस लगार्या हीं। इ ताँई बो दुजै दिन बिका हात-पग खुलवाया अर परधान याजक अर सगळी म्हासभानै भेळा होबा ताँई ओडायो। जणा पोलुसनै ल्यार बाकै सामै खड़्यो कर दिओ।