भेजेड़ा चेला का काम 19 - जीवन को च्यानणो (सेकावाटी नया नियम की पोथ्या)

इफिसुस नगरी म पोलुस

¹ अपुलोस जद कुरन्थी म हो जणा पोलुस एसिया का मांयला परदेसा को दोरो कर इफिसुस पुग्यो। जठै बिनै क्युंक चेला मिल्या

² जणा बो बाऊँ बुज्यो, “थे जद बिस्वास कर्यो हो बि टेम थानै पबितर आत्मा मिल्यो हो के?” जणा बे बोल्या, “ओ काँई होवै ह म्हें तो पबितर आत्मा क बारां म पेली कदैई कोनी सुण्या।”

³ बो बाऊँ बोल्यो, “जणा पाछै थानै किको बतिस्मो दिओ गयो ह,” बे बोल्या, “पाणी को बतिस्मो देबाळा यहून्ना को।”

⁴ जणा पोलुस बानै खेबा लाग्यो, “यहून्ना पापऊँ तौबा करबा ताँई पाणी को बतिस्मो दिआ करतो हो। अर मिनखाऊँ बोल्या करतो हो की जखो मेरै पाछै आबाळो ह बिपै बिस्वास करज्यो। बोई ईसु ह।”

⁵ आ सुणर बे परबु ईसु का नामऊँ बतिस्मो लिओ।

⁶ अर जद पोलुस बापै हात धर्यो जणा बापै पबितर आत्मा उतर्यो। बे भात-भात की बोली बोलबा लागगा अर परमेसर का चोखा समचार को हेलो पाड़बा लागगा।

⁷ अर बे कुल मिलार करीब बारा जणा हा।

⁸ पोलुस यहूदिआ का अरदास घर म तीन म्हेना ताँई बेधड़क बोलतो अर परमेसर का राज क बारां म मिनखानै समजातो रिह्यो।

⁹ पण बामैऊँ क्युंक ढिट हा अर बे इपै बिस्वास कोनी कर्या अर परमेसर की आ बाता क बारां म बुरो भलो बी बोलता हा। जि बजेऊँ पोलुस बानै बठै छोडर बिस्वास्यानै लेर रोजकी तरनुस का समुदाय भवन म धरम की सीख देबा लागगो।

¹⁰ करीब दो बरस ताँई अंय्यांई चालतो रिह्यो अर अंय्यां करता-करता एसिया का सगळा रेह्बाळा चाए बे यहूदि हो चाए यूनानी ईस्बर को बचन सुण्या।

स्केवा का बेटा

¹¹ अर परमेसर पोलुस क हाताऊँ मिनखानै ताजूब का काम दिखातो हो।

¹² अर अठै ताँई जद लोग बिकी काया क अड़ेड़ा रूमाल अर गमछो रोगला प गेरता जणा बे निरोगा होज्याता अर ओपरी बलाय भाग जाया करती ही।

¹³ पण क्युंक यहूदि मिनख जखा स्याणा भोपा हा। बे परबु ईसु को नाम लेर ओपरी बलायानै भगाबा की कोसिस करता हा अर बे जखा म ओपरी बलाय ही बाऊँ अंय्यां खेता हा क, “ईसु का नामऊँ भागज्या जिको परचार पोलुस करै ह।”

¹⁴ यहूदि परधान याजक स्केवा का सात्यु बेटा अंय्यांई करता हा।

¹⁵ जणा ओपरी बलाय बाऊँ बोली, “ईसुनै म जाणू हूँ अर पोलुस क बारां म बी जाणू हूँ, पण थे कूण हो?”

¹⁶ अर जि मिनख म बा ओपरी बलाय ही बो बापै झपट्यो अर बा सगळानै पछाड़र बाकी अंय्यां की दुरगती करी क बे अदमर्या होर उघाड़ाई बि घरऊँ भाग छुट्या।

¹⁷ अर आ बात सगळा इफिसुस म फेलगी अर बठै का सगळा यहूदि अर यूनानीयानै इ बात को बेरो पड़गो, जिऊँ बे सगळा डरग्या अर परबु ईसु का नामनै बोळो आदरमान दिओ।

¹⁸ जत्ता ईसु का नाम को बिस्वास कर्या बामैऊँ घणकराक सगळा क सामै आप-आपका बुरा कामानै मान्या।

¹⁹ जादू मंतर करबाळा घणकराक आप-आपकी पोथ्यानै भेळी कर बानै सगळा क सामै बाळ गेरी अर जद बाको मोल जोड़्यो गयो जणा बो करीब पचास झार चाँदी हाळा सीक्का क बराबर निकळ्यो।

²⁰ अर अंय्यां परबु को बचन मजबूत होर फेलतो रिह्यो।

इफिसुस म बबाळ

²¹ आ बाता क पाछै पोलुस पबितर आत्माऊँ मकीदुनिया अर अखायाऊँ होर यरूसलेम जाबा की सोची अर बोल्यो क, “बठै जाबा क पाछै मनै रोम बी जाणो ह।”

²² जणा बो आपका दो सात्या तिमूतियूस अर इरास्तुसनै मकीदुनिया भेज्यो, अर आप खुद क्युं क दिन ताँई एसिया म रिह्यो।

²³ बि टेम बोळा मिनख परबु म आर्या हा जि बजेऊँ बोळो जोरको बबाळ माच्यो।

²⁴ क्युं क देमेतिरीयुस नाम को एक सुनार चाँदीऊँ अरतिमीस देबी हाळा देवरा का खिलोणा बणवार कारिगरानै बोळो फाईदो दिवाया करतो हो।

²⁵ जणा बो आ कारिगरानै अर इ कामऊँ जुड़ेड़ा दुसरा मिनखानै भेळा कर बोल्यो, “भाईड़ो! थानै बताबा की जुर्त कोनी की इ कामऊँ आपानै कतो फाईदो होवै ह।

²⁶ अर थानै जंय्यां बेरोई ह क पोलुस इफिसुस मई नइ पण सगळा एसिया म मिनखानै भंगरा इ बातनै मनवावै ह क हातऊँ बणाएड़ी मूरती ईस्बर कोनी।

²⁷ जिकी बजेऊँ आपणा धंधा की बदनामी होबा कोई डर कोनी पण म्हान देबी अरतिमीस का देवरा की मेमा बी खतम होबा को डर ह। अर आपणी देबी जिनै सगळा एसिया अर जगत का मिनख पूजै ह बिकी मेमा बी खतम होज्यासी।”

²⁸ आ सुणताई बे झाळा म लाल-ताता होगा अर जोर-जोरऊँ खेबा लागगा क, “इफिसीआ की देबी अरतिमीस की जे हो!”

²⁹ अर अंय्यां पूरी नगरी म हो-हल्लो मचगो अर बे लोग मकीदुनिया का रेह्बाळा गयुस अर अरिस्तखुसनै जखा सफर म पोलुस क सागै हा बानै पकड़ लिआ अर सगळा बानै नगरी का मैदान कानि भगाताई लेग्या।

³⁰ अर जद पोलुस बठै जार मिनखा क सामै बोलबा की मन म करी जणा चेला बिनै जाबा कोनी दिआ।

³¹ एसिया परदेस का क्युंक अधिकारी पोलुस का भाईला हा बे बी पोलुसनै खुवा भेज्यो क बो मैदान म नइ आवै।

³² बि पंचायत म धांधळी मचरी ही क्युं क कोई क्युं खेवै हो अर कोई क्युं, कयानै तो ओई कोनी बेरो हो क बे क्याले भेळा होया हीं।

³³ जणा यहूदि सिकन्दरनै आगै भेज्या अर बो आपका बचाव पक्ष म मिनखानै हात हला-हलार बोलबा लाग्यो।

³⁴ पण जद भीड़नै ओ बेरो पड़्यो क बो यहूदि ह। जणा बे सगळा करीब दो घंटा ताँई जोर-जोरऊँ रोळा मचाता रिह्या क, “इफिसीआ की अरतिमीस की जे हो अरतिमीस की जे हो।”

³⁵ इकै पाछै नगरी को मुनिम मिनखानै चुप करार बोल्यो, “अरै इफिसीओ, कूण कोनी जाणै क इफिसुस नगरी म्हान देबी अरतिमीस अर आसमानऊँ गिरी बिकी मूरती अर बिका देवरा को रूखाळो ह।

³⁶ अर जद आ बातानै कोई झूठी बताई कोनी सकै जणा पाछै थानै चुप होज्याणो चाए अर बिना सोच्या समज्या क्युंई नइ करबो चाए।

³⁷ अर थे जखा आदम्यानै पकड़र अठै ल्याया हो बे नइ तो देवरानै लूट्यो अर नइ आपणी देबी क बारां म बुरो भलो बोल्या।

³⁸ अर देमेतिरीयुस अर बिका साती कारिगरानै कोईऊँ क्युं सिकायत ह, जणा कचेरी खुली ह अर न्याय करबाळा बी बेठ्या ह अर बठैई थे थारो मुकदमो दरज करा सको हो।

³⁹ अर मिनखो ज थारी बी कोई सिकायत ह जणा बिकै बारां म कानूनऊँ मान्यता मिलेड़ी नगरी की पंचायत म बिचार कर्यो जा सकै ह।

⁴⁰ क्युं क आज का इ बबाळ को दोस कदै आपणा सीर नइ मंढ जावै अर इनै सई बोलबा ताँई आपणै कनै कोई बजै बी कोनी।”

⁴¹ आ खेर बे बि पंचायतनै बरखास्त कर दिनी।