भेजेड़ा चेला का काम 15 - जीवन को च्यानणो (सेकावाटी नया नियम की पोथ्या)

यरूसलेम की सभा

¹ इकै पाछै यहूदिआ परदेसऊँ आर क्युंक मिनख बिस्वासी मंडळी का भाईड़ानै सीखाया क, “ज मूसा की रीत गेल थारी सुन्नत नइ करी जावै जणा थानै छुटकारो कोनी मिल सकै।”

² इ बातनै लेर पोलुस अर बरनाबास बाऊँ खूब लड़्या, बोळी खिचा-ताणी होबा क पाछै बिस्वास्या की बिस्वासी मंडळी पोलुसनै, बरनाबास अर क्युंक बिस्वासी मिनखानै टाळ्या क जिऊँ बे अंताकीयाऊँ यरूसलेम म जार भेजेड़ा चेला अर बिस्वासी मंडळी का मुखियाऊँ फेसलो करवावै।

³ जणा बिस्वासी मंडळी बानै थोड़ी घणी दूर छोडर गई अर बे फिनीके अर सामरीया क गेला, गैर-यहूदि कंय्यांसिक मन बदल्यो आ बात बिस्वासी भायानै बताता गया, जिनै सुणर सगळा बोळा राजी होया।

⁴ बाकै यरूसलेम पुगताई बठै की बिस्वासी मंडळी, भेजेड़ा चेला अर बिस्वासी मंडळी का मुखिया बाऊँ राजी होर मिल्या, अर बे बानै बताया क परमेसर बाकै सागै होर कंय्यां का बडा-बडा काम कर्या ह।

⁵ पण फरिसीया मऊँ बिस्वास म आया क्युंक मिनख खड़्या होर बोल्या, “गैर-यहूदि मिनखानै सुन्नत करार नेम-कायदानै मानबो चाए।”

⁶ जणा बिस्वासी मंडळी का मुखिया अर भेजेड़ा चेला इ बात प बिचार करबा ताँई भेळा होया।

⁷ बोळी देर खिचा-ताणी होबा क पाछै पतरस बामैऊँ खड़्यो होर बोल्यो, “मेरा लाडला बिस्वास्यो, जंय्यां की थे जाणोई हो क थार मऊँ परमेसर मनै टाळ्यो क गैर-यहूदि मेरै मुंडाऊँ परमेसर का चोखा समचारनै सुणर बिपै बिस्वास करै।

⁸ अर हियानै जाणबाळो परमेसर आपणी जंय्यां बानै बी पबितर आत्मा देर अपणायो।

⁹ अर बिस्वासऊँ बाका हियानै धोर आपणा म अर बामै कोई भेद-भाव कोनी कर्यो।

¹⁰ जणा पाछै इब थे क्याले परमेसरनै बिचासर बिस्वास्या की गरदना प हाळी धरर्या हो, जिनै नइ तो म्हारा बाप-दादा उठा सक्या अर नइ म्हें उठा सकां।

¹¹ म्हें ओ बिस्वास करां हां क परमेसर की दयाऊँ म्हें बी बचा लिआ गया हां जंय्यां क बे बचा लिआ गया हीं।”

¹² जणा सभा म बेठ्या सगळा का सगळा चुपचाला पोलुस अर बरनाबास की बाता सुणबा लागगा क, परमेसर कंय्यां बाकै जरिए गैर-यहूदिआ म अचरजभर्या सेलाणी-चमत्कार कर्या।

¹³ अर जद बोलर बे चुप होया जणा याकूब खड़्यो होर बोल्यो, “मेरा लाडला बिस्वास्यो, मेरी सुणो।

¹⁴ जंय्यां की समोन अबार बतायो ह क परमेसर कंय्यांसिक गैर-यहूदिआ की समाळ करी ह जि ताँई बो बा गैर-यहूदिआ मऊँ क्युंक मिनखानै बिका खुदका मिनख होबा ताँई बुलायो ह।

¹⁵ अर इऊँ परमेसर की खेबाळा की बाता को बी मेळ मिलै जंय्यां क पबितर सास्तर म मंडेड़ो ह,

¹⁶ “‘इकै पाछै म ओज्यु आर दाऊद का राजनै पाछो बसास्युं। इको राज नास होगो हो, म इनै ओज्यु बसार खड़्यो करस्युं।

¹⁷ सगळा जगत का मिनख जखा मनै ढुंढीं हीं अर हाँ बे सगळा गैर-यहूदि मिनख बी जखानै म मेरा खुदका मिनख कर बुलायो हूँ बे बचेड़ा सगळा मेर कनै आसी।

¹⁸ परबु बोलै ह क, म अ बाता बोळी पेल्याऊँई बता दिनी ही।’”

¹⁹ याकूब ओर खयो, जणा इब मेरो फेसलो ओ ह क गैर-यहूदि मिनखा मऊँ जखा परमेसर क कनै आया हीं, बानै आपा दिन नइ घालां।

²⁰ पण बानै आ जरूर मांडर भेज्या क बे मूरत्या प चढाईड़ी चिज नइ खावै अर पराई लूगाया क सागै गळत काम नइ करै अर गळो मोसेड़ो मास नइ खावै अर नइ लोय पिवै।

²¹ क्युं क पुराणा टेमऊँई अ बात नेम-कायदा मऊँ अरामहाळा दिन अरदास करबाळी झघा म बाची जावै ह अर नगरी-नगरी आको परचार कर्यो जार्यो ह।

गैर-यहूदि बिस्वास्यानै कागद

²² जणा पाछै भेजेड़ा चेला, बिस्वासी मंडळी का मुखिया अर सगळी बिस्वासी मंडळी क्युंक जणानै टाळर पोलुस अर बरनाबास क सागै अंताकीया भेजबा की ते करी। जणा बे यहूदा जिनै बरसबा बोलता हा अर सीलासनै टाळर, जखा बामै चोखी पेठ राखता हा बानै बाकै सागै भेज्या।

²³ बाकै हात बे अंय्यां मांडर भेज्या क, “अंताकीया, सिरीया अर कलिकीया म रेह्बाळा गैर-यहूदि बिस्वासी भायानै भेजेड़ा चेला अर यरूसलेम की बिस्वासी मंडळी का मुखिया को नमस्कार।

²⁴ म्हारा काना म आ बात आई ह क म्हारै मऊँ क्युंक मिनख बठै थारै कनै आर थानै आपकी बाताऊँ घबरा दिआ अर भंगरा दिन्या। पण अंय्यां करबा ताँई म्हें तो बानै ओडायो कोनी जणाई तो

²⁵ म्हें एक चित होर आ सोची की म्हारा लाडला बरनाबास अर पोलुस क सागै टाळेड़ा मिनखनै थारै कनै भेज्या।

²⁶ अ अंय्यां का मिनख ही जखा परबु ईसु मसी का नाम ताँई आपकी पिराणा की परवा कोनी करी।

²⁷ जणाई म्हें थारै कनै यहूदा अर सीलासनै भेजर्या हां जखा आपका मुंडाऊँ अ सगळी बाता थानै खे देसी।

²⁸ पबितर आत्मा अर म्हानै अंय्यां लाग्यो की आ जरूरी बातानै छोडर थार प ओर बेसी बोज नइ गेरां।

²⁹ क थे मूरत्या प चढाईड़ी चिजा, गळो मोसेड़ा मास, लोयऊँ अर पराई लूगाया क सागै गळत कामाऊँ परै रेहज्यो, अर थारो भलो होवै।”

³⁰ इकै पाछै बे अंताकीया गया अर बठै बिस्वासी मंडळी की सभा बुलार बो कागद बानै दे दिओ।

³¹ अर बे बि आस बंधाबाळा कागदनै बाचर बा बाताऊँ बोळा राजी होया।

³² यहूदा अर सीलास जखा परमेसर की खेबाळा हा, बे आस बंधाबाळी अर बिस्वासनै मजबूत करबाळी बाता बतार बानै मजबूत कर्या।

³³ बे बाकै सागै थोड़ा घणा दिन रेह्बा क पाछै बाऊँ राजी-खुसी बिदा लेर पाछा आपका भेजबाळा क कनै जाबा ताँई रवाना होया।

³⁴ (पण सीलासनै बठै रेह्बो चोखो लाग्यो)।

³⁵ पोलुस अर बरनाबास अंताकीया मई रेह्गा अर बोळा मिनखा क सागै परबु का बचननै सीखाता अर चोखा समचार को परचार करता रिह्या।

पोलुस अर बरनाबास को नाकै होबो

³⁶ थोड़ा घणा दिन बित्या पाछै पोलुस बरनाबासऊँ बोल्यो, “आओ ल्यो आपा बा नगर्या म चालां जामै आपा परबु को बचन सुणार आया हां बठै चालर बिस्वासी भायानै समाळा क बे कंय्यांसिक हीं।”

³⁷ जणा बरनाबास यहून्नानै जिनै मरकुस बोलीं हीं आपकै सागै लेबा की सोची।

³⁸ पण पंफुलिया म मरकुस बानै एकला छोडर चोखा समचार परचार म बाकै सागै कोनी गयो हो इ बजेऊँ पोलुस बिनै सागै कोनी लेज्याबो चातो हो।

³⁹ बि बातऊँ बाकै बिच अंय्यां की खिचा-ताणी होई क बे एक दुसराऊँ नाकै-नाकै होगा अर बरनाबास मरकुसनै लेर साईपरस चलेगो।

⁴⁰ पण पोलुस सीलासनै टाळ्यो अर बिस्वासी भाईड़ा बानै परमेसर क हाता म सू'पर अरदास कर दि जणा पाछै बो बठैऊँ चलेगो।

⁴¹ अर बो बिस्वासी मंडळ्यानै मजबूत करतो सिरीया अर कलिकीया इलाकाऊँ होतो होयो गयो।