भेजेड़ा चेला का काम 12 - जीवन को च्यानणो (सेकावाटी नया नियम की पोथ्या)

हेरोद को बिस्वासी मंडळीनै सताबो

¹ बि टेम को राजा हेरोद बिस्वासी मंडळी का क्युंक मिनखानै सताबो चालू कर दिओ।

² बो यहून्ना का भाई याकूबनै तलवारऊँ मरवा दिन्यो।

³ अर आ देखर क अंय्यां करबाऊँ यहूदि मिनख राजी होवीं हीं जणा बो पतरसनै बी पकड़ाबा की मन म करी, अर बे बिना खमिर की रोटी खाबाळा त्युंहार का दिन हा।

⁴ अर बो बिनै पकड़र कोठड़ी म बंद करवार बिपै च्यार-च्यार सिपाईड़ा का च्यार पेरा बिठा दिओ, अर मन म करी की फसै का त्युंहार क पाछै बिनै मिनखा क सामै ल्यावै।

⁵ अर जद पतरस कोठड़ी म बंद हो बि टेम सगळी बिस्वासी मंडळी बि ताँई पूरा मनऊँ परमेसरऊँ अरदास करबा लागरी ही।

पतरस को छुटबो

⁶ जद हेरोद पतरस प मुकदमो चलाबा ताँई बिनै ल्याबाळो हो, बि रात पतरस दो साँकळाऊँ बांदेड़ो दो सिपाईड़ा क बिच म सुत्यो हो। अर कोठड़ी क बारना प रूखाळा पेरो देर्या हा।

⁷ अर बठै चाणचुकई के होयो क परबु को एक ईस्बर नगरी दुत बि कोठड़ी म परगट होयो। जिऊँ बि कोठड़ी म जोरको च्यानणो होगो अर बो पतरस की पासड़्या प हात धर बिनै जगार बोल्यो, “बेगोसो खड़्यो हो।” अत्ता मई बिकै हातऊँ साँकळा खुलर पड़गी।

⁸ अर ईस्बर नगरी दुत बिऊँ बोल्यो, “तेरो कोटियो, कमर पट्टो बां'दर जुती पेरले अर फटाफट त्यार होज्या।” जणा पतरस बिकै कह्या गेल हात्युहात त्यार होगो जणा पाछै बो बिनै आपकै गेल आबा ताँई बोल्यो।

⁹ अर बो बिकै गेल होगो पण बो आ कोनी समज सक्यो क ओ जोक्यु बो परबु को ईस्बर नगरी दुत करर्यो हो बो सच ह के? बिकै भाऊँ तो ओ एक दरसावई हो।

¹⁰ बे पेला अर दुसरा पेराऊँ निकळर लौ का बारना क कनै पुग्या जखो नगरी म खुलतो हो। बि बारना को दरूजो बा ताँई मतैई खुलगो, अर बे बठैऊँ एक गळी मांयकी गया, इकै पाछै ईस्बर नगरी दुत बिनै छोडर चलेगो।

¹¹ जणा जार पतरस चेता म आयो अर आपका मुंडाऊँ बोल्यो, “इब म जाणगो क सचमई परबु ईस्बर नगरी दुतनै भेजर मनै हेरोद क हातऊँ छुटा लिओ अर यहूदि मिनखा की सगळी मनस्या प पाणी फेर दिओ।”

¹² आ जा'णर बो यहून्ना जिनै मरकुस बोलै ह बिकी माँ मरीयम क घरा आयो, बठै पेल्याऊँई बोळासारा मिनख भेळा होर अरदास करबा लागर्या हा।

¹³ बिकै कुआड़ खुड़काबा प रूदे नाम की एक दासी बारना प आई।

¹⁴ पतरस की उवाज पिछाणर बा कुआड़ तो खोली कोनी पण राजी होर पेली मांयनै गई अर सगळानै खे सुणाई क पतरस बारना म खड़्यो ह।

¹⁵ बे बिऊँ कह्या, “तू बावळी तो कोनी होगी ह? ओ कंय्यां हो सकै ह।” पण बा तो आपकी बात प अड़ी री जणा जार बे कह्या, “हो सकै ह क ओ बिको ईस्बर नगरी दुत होगो।”

¹⁶ अर बठिनै पतरस कुआड़ खुड़कातो रिह्यो जणा बे कुआड़ खोल्या अर बिनै सामै देखर सुन्ना होगा।

¹⁷ जणा बो मुंडा प आँगळी धर बानै इसारो कर्यो क चुप रेह्‍वै अर बो बानै बे सगळी बाता बताई क परबु कंय्यां बिनै जेळऊँ अजाद कर्यो। अर ओ ओडार क, “याकूब अर दुसरा भाई-भाणानै बी आ बात बता दिज्यो,” बो बठैऊँ दुसरी झघा चलेगो।

¹⁸ दिन उगताई बा सिपाईड़ा क घालामेली लागगी क पतरस को काँई होयो बो कठै चलेगो।

¹⁹ हेरोद बिकी खोज करवाई पण बो बिकै हात कोनी लाग्यो, जणा बो बा रूखाळानै बुलाया अर बाऊँ पुछाताछी कर बानै मारबा को हुकम काड्या। अर हेरोद यहूदिआनै छोडर कैसरिया म जार क्युंक दिना ताँई बसगो।

हेरोद की मोत

²⁰ हेरोद सूर अर सैदा म रेह्बाळा मिनखाऊँ नराज हो जि बजेऊँ बे सगळा मिलर बलास्तूस जखो राजा की राण्या की देखभाळ करबाळो खास करमचारी हो। बिनै बुलार बिऊँ सुळजेटो करबो चायो क्युं क राजा क देसऊँई बाका देस म खाबाळो समान भेज्यो जातो हो।

²¹ एक दिन हेरोद राजा हाळी पोसाक धारण कर न्यायहाळा सिंघासन प बेठर जनतानै भासण देबा लागर्यो हो।

²² जणा बिकी सुणर लोग जोरऊँ बोलबा लाग्या क, “आ बाणी तो कोई देवता की ह मिनख की तो आथ कोनी।”

²³ बि टेमई परबु को ईस्बर नगरी दुत बिनै मार्यो क्युं क बो परमेसरनै मेमा कोनी दि। अर बिकी काया म किड़ा पड़्या अर बिनै खाबा लाग्या जिऊँ बो मरगो।

²⁴ पण परमेसर को बचन फेलतो अर बढतो गयो।

²⁵ बरनाबास अर साऊल यरूसलेम म आपको काम खतम कर यहून्नानै जिनै मरकुस खेता हा आपकै सागै अंताकीया लेर आया।