भेजेड़ा चेला का काम 1 - जीवन को च्यानणो (सेकावाटी नया नियम की पोथ्या)

सरूआती बाता

¹ प्यारा थियूफिलूस, म मेरी पेलड़ी पोथी म बे सगळी बाता मांडी, जानै ईसु बि दिनऊँ करतो अर बानै सीखातो आयो जि दिनऊँ बो आपको सेवा को काम चालू कर

² ईस्बर नगरी म उठाया जाबाऊँ पेली बो पबितर आत्मा की सक्‍तिऊँ खुदका ग्यारा भेजेड़ा चेलानै जानै बो टाळ्या बानै काँई-काँई करबो ह , बा कामा को हुकम दिओ।

³ बिकै सुळी प दुख भोगर मरबा क पाछै, बो बोळा पुक्‍ता सबूत देर खुदनै मरेड़ा मऊँ जिंदो साबित कर्यो, अर बो चाळिस दिना ताँई बानै दिखतो रिह्यो अर बाऊँ परमेसर का राज क बारां म बतळातो रिह्यो।

⁴ एक खास मोका प जद बे बिकै सागै जिमर्या हा जणा ईसु बानै हुकम दिओ, “थे यरूसलेम क बारनै पग मना धरज्यो, पण जि बरदान क बारां म थे मेरा मुंडाऊँ सुण्या हो बिकी बाट जोता रेहज्यो क्युं क बि बात को करार परम-पिता कर्यो ह।

⁵ अर यहून्ना तो पाणी को बतिस्मो दिआ करतो हो, पण आबाळा दिना म थानै पबितर आत्मा को बतिस्मो मिलसी।”

ईसु को ईस्बर नगरी म उठायो जाबो

⁶ बे भेळा होर बिऊँ बुज्या, “परबु, के तू इ टेमई इजरायली मिनखानै राज पाछो देसी?”

⁷ जणा बो बोल्यो, “बि दिन अर बि घड़ीनै जाणबा को काम थारो कोनी, क्युं क बा परम-पिता का हक तळै ह।

⁸ पण जद पबितर आत्मा थानै मिलसी जणा थारै म परमेसर की सक्‍ति आज्यासी अर थे यरूसलेम, सगळा यहूदिआ, सामरीया का इलाका अर धरती का इ कूणाऊँ बि कूणा ताँई मेरा गुवा होस्यो।”

⁹ आ खेर बो बाकै देखता-देखताई ईस्बर नगरी म उठा लिओ गयो अर एक बादळी बिनै ढक लिनी।

¹⁰ अर बे बिनै जातानै एकटोर आसमान कानि देखर्या हा जणा अत्ता मई दो मिनख एकदम धोळा गाबा म बाकन आर खड़्या होगा।

¹¹ अर बाऊँ बोल्या, “अरै गलिली मिनखो, खड़्या-खड़्या आसमान म काँई देखर्या हो? ओ ईसु जिनै थारै मऊँ ईस्बर नगरी म उठायो गयो ह ओ जंय्यां गयो ह बंय्यांई पाछो आसी।”

यहूदा को ओदो मत्तीयानै मिलबो

¹² जणा पाछै बे जेतून डूँगरी पऊँ जखी यरूसलेमऊँ करीब आदेक कोस परै ही, बठैऊँ ओटा यरूसलेम आया,

¹³ अर बठै पुगताई बे उपला चोबारा म चलेगा, जठै पतरस, यहून्ना, याकूब, अंदरिआस, फलिपूस, थोमा, बरतुल्मै, मत्ती, हलफई को छोरो याकूब, देस भगत समोन अर याकूब को छोरो यहूदा रेह्ता हा।

¹⁴ अर आकै सागै क्युंक लूगाया बी ही, अ सगळा एक चित होर अरदास करबा म लाग्या रेह्ता हा। बामै ईसु की माँ मरीयम अर बिको भाई बी हो।

¹⁵ जणा पाछै बा दिना म पतरस बा बिस्वासी भाई-भाणा म खड़्यो होर बोल्यो जखा गिणत-माणत का एक सो बिस हा,

¹⁶ “मेरा यहूदि भाई-भाणो पबितर सास्तर को लेख जखो यहूदा (जखो ईसुनै पकड़बाळा की मदद करी ही) क बारां म मंडेड़ो ह, जिनै बोळी पेल्या पबितर आत्मा दाऊद क मुंडा होर बोल्यो हो, बो तो पूरो होणोई हो।

¹⁷ बो आपणा मालोई हो, अर इ सेवा म बिको बी हिस्सो हो।

¹⁸ बो आपकी पाप की कमाईऊँ एक खेत मोल लिओ, अर बो सीरवाणी पड़्यो जिऊँ बिकी काया पाटगी अर बिका सगळा आंतड़ा-ओजड़ा बारनै आ पड़्या।

¹⁹ इ बात को बेरो सगळी यरूसलेम नगरीनै पड़्यो। जणाई तो बाकी बोली म बि खेत को नाम हकलदमा पड़्यो जिको मतबल ‘लोय को खेत होवै ह।’

²⁰ अर भजना की पोथी म अंय्यां मंडर्यो ह, ‘बिको घर उजड़ जावै, अर बिमै कोई कोनी बसै।’ अर अंय्यां बी मंडर्यो ह की ‘बिको ओदो कोई दुसरो लेले।’

^21-22 “जणा आ जरूरी ह क, जद ईसु आपणै सागै हो अर बि टेम जखा सदाई आपणै सागै रेह्ता हा बा दिना म, यहून्ना पाणी को बतिस्मो देबो चालू कर्यो हो, बि दिनऊँ लेर ईसुनै आपणा मऊँ ईस्बर नगरी म उठाया जाबा का दिन ताँई बामैऊँ आपानै एक जणो गुवा होबा ताँई टाळ लेणो चाए।”

²³ जणा बे दो जणानै खड़्या कर्या, जामैऊँ एक युसूफ हो जिनै बरसबा खेता हा, जिको दुसरो नाम यूसतुस हो, दुसरो जणो मत्तीया हो,

²⁴ अर बे आ खेर अरदास करबा लागगा क, “परबु थे सगळा का हियानै जाणो हो थे म्हानै बताओ क थे आ दोन्या मऊँ किनै टाळ्या हो।

²⁵ जिऊँ बो थारी सेवा करबा ताँई इ भेजेड़ा चेला का ओदानै ले सकै, जिनै यहूदा छोडर जि झघा जोगो हो बठैई चलेगो।”

²⁶ जणा बे बा दोन्या क बारां म परची गेरी अर परची मत्तीया क नाम प खुली जिकै पाछै बो बा ग्यारा भेजेड़ा चेला म गिण्यो गयो।