2 थिसलूनिकी 1 - जीवन को च्यानणो (सेकावाटी नया नियम की पोथ्या)

राजी-खुसी का समचार

¹ म पोलुस, आ चिठी सीलास अर तिमूतियूस क सागै मिलर थिसलूनिकी नगरी का बा सगळा मिनखानै मांडर्यो हूँ, जखा परम-पिता परमेसर अर परबु ईसु मसीनै मानबा की बजेऊँ बिस्वासी मंडळीऊँ जुड़ेड़ा हीं।

² परम-पिता परमेसर अर परबु ईसु मसी थार प दया बणाए राखै अर थानै स्यांती देवै।

धनेवाद अर बडाई

³ मेरा लाडला बिस्वास्यो, थारै ताँई म्हानै पिता परमेसरनै धनेवाद देतो रेह्णो चाए अर ओ बाजीब बी ह, क्युं क थे बिस्वास म बोळा बढर्या हो। था सगळा म आपसरी म बोळो प्यार-परेम ह।

⁴ इ ताँई जद कदै म्हें परमेसर की दुसरी बिस्वासी मंडळ्या म जावां हां जणा बाकै सामै थारै बई गुमान करबो कोनी भूलां। क्युं क थे जत्ता बी दुख अर सताव भोगो हो बा सगळा म बानै थारी सेह्बा की सक्‍ति अर बिस्वास क बारां म बेरो चालै ह।

न्याय को दिन

⁵ अ सगळी बाता परमेसर क सचा न्याय को साप सबूत ह। अ बाता थानै परमेसर का राज का जोगा बणावै, जि परमेसर का राज ताँई थे दुख बी भोगर्या हो।

⁶ परमेसर बोई करसी जखो सई ह। जखा थानै दिन घालै ह, बानै बो बी दिन घालसी,

⁷ अर थे जखा कळेस भोगो हो थानै बो म्हारै सागै सुक-स्यांती देसी। आ बात बि दिन होसी जद परबु ईसु मसी आपका ईस्बर नगरी दुता क सागै भबकती आग म ईस्बर नगरीऊँ आसी,

⁸ अर जखा परमेसरनै कोनी जाणै अर आपणा परबु ईसु का चोखा समचारनै कोनी मान्या बानै सजा देसी।

⁹ बे परबु क सामैऊँ अर बिकाळी सक्‍ति की मेमाऊँ नाकै कर दिआ जासी अर जुग-जुग ताँई सजा भोगसी।

¹⁰ ओ बी दिन होसी जद बो आपका सगळा परमेसर का मिनखाऊँ जखा बिपै बिस्वास करीं हीं बाऊँ मेमा अर आदरमान लेबा आसी। थे बी बा मिनखा म होस्यो, क्युं क म्हें जखो चोखो समचार थानै सुणायो ह बिपै थे बिस्वास कर्यो ह।

¹¹ इ ताँई, म्हें थारै ताँई सदाई अरदास करां हां क, आपणो परमेसर थानै जुग-जुग का जीवन जोगो बणावै, जि ताँई थानै बो बुलायो ह। परमेसर थानै सक्‍तिऊँ भरै जिऊँ थे भलाई की हरेक इंछ्यानै अर बिस्वास का हरेक कामानै पूरा करो।

¹² जिऊँ आपणा परमेसर अर परबु ईसु मसी की दयाऊँ आपणा परबु ईसु को नाम थारै म मान पावै अर थे बिमै मान पावो।