2 पतरस 3 - जीवन को च्यानणो (सेकावाटी नया नियम की पोथ्या)

परबु ओज्यु आसी

¹ ओ लाडलो, आ मेरी दुसरी चिठी ह जखी म थानै मांडी ह, अर म मेरी आ दोन्यु चिठ्या म थानै याद दिवायो हूँ क थानै पबितर हियो राखबो चाए।

² जिऊँ थे बा बातानै जानै परमेसर की खेबाळा पेल्याई खे दिआ हा याद राख सको अर परबु, अर आपणानै छुटकारो देबाळा का हुकमनै याद राखो जखो थानै भेजेड़ा चेला की बजेऊँ दिओ हो।

³ सऊँ पेल्या तो थानै ओ जाणलेबो चाए क, अंत का दिना म हसी ठटा करबाळा आसी, जखा आपकी बुरी इंछ्या गेल चालसी।

⁴ बे बोलसी, “मसी क आबा का करेड़ा करार को काँई होयो? क्युं क आपणा बडका तो मरग्या। अर इब ताँई सक्यु अंय्यांई ह जंय्यांकी इ सरस्टि की सरूआत म हो।”

⁵ पण अ मिनख जाणबूजर भूल बेठ्या हीं क आसमान परमेसर का बचन क जरिए जुगादऊँ ह अर आ धरती पाणी मऊँ बणेड़ी ह अर पाणी मई मजबूत ह।

⁶ अर आई बजे ही क बि टेमकी सरस्टि बाढऊँ नास होगी।

⁷ पण आज का आसमान अर धरती बिका बचनऊँ इ ताँई बणाएड़ा हीं क, बे बाळ्या ज्यावीं। अर अ जद ताँई अंय्यांई रेह्सी जद ताँई पापी मिनखा को न्याय अर बाको नास नइ होज्यावै।

⁸ पण मेरा लाडलो, थे इ बातनै मना भूलज्यो, क परबु की नजर्या म एक दिन झार बरस जंय्यां अर झार बरस एक दिन की जंय्यां ह।

⁹ अर परबु आपका करेड़ा करारनै पूरो करबा म देर कोनी करै, जंय्यांकी कई मिनख सोचै ह। पण परबु आपणा ताँई थ्यावस धरै ह क्युं क बो कोईको बी नास करबो कोनी चावै। पण बो चावै ह क सगळा मिनखानै पापऊँ हिया फेरबा को मोको मिलै।

¹⁰ परबु क ओज्यु आबा को दिन चोर की जंय्यां चाणचुक आज्यासी। बि दिन आसमान जोरऊँ गरजसी अर बो सुजसी कोनी। अर आसमान म जत्ता बी गरह ह बे तपर पिघळ ज्यासी, अर आ धरती अर इपै जोक्यु बी ह बो सक्यु बळ ज्यासी।

¹¹ जदकी अ सगळी चिजा नास होबाळी ह जणा पाछै थे सोचो थारो परमेसर म चाल-चलन किसोक होणो चाए? थानै पबितर जीवन जिबो चाए।

¹² अर थानै परमेसर का न्याय का दिननै उडिकबो चाए। बो दिन तावळो आवै इकी थानै कोसिस करबो चाए। बि दिन आसमान आगऊँ बळ ज्यासी अर बाकी की चिजा पिघळ ज्यासी।

¹³ पण आपा बिका करेड़ा करार गेल नया आसमान अर धरती क मिलबा की आस देखर्या हां, जठै धारमिक्‍ता बास करै ह।

¹⁴ ओ लाडलो, थे आ बाता की आस देखो हो, जणा कोसिस करो क परमेसर की नजर्या म खरा, बेदाग अर स्यांतीऊँ रेह्बाळा बाजो।

¹⁵ अर आपणा परबु का थ्यावसनै छुटकारो समजो, जंय्यां की म्हारो लाडलो भाईड़ो पोलुस बि ज्ञान गेल जखो बिनै मिल्यो हो थानै मांड्यो हो।

¹⁶ पोलुस आपकी सगळी चिठी म आ बाता किई चरचा करी ह, अर जामै कत्ती बाता तो अंय्यां की ह जानै समजबो ओखो ह। अज्ञानी अर जखा मजबूत कोनी बे मिनख बाको गळत मतबल लगार खुदनै नास करीं हीं। बे दुसरा सास्तर की सीखनै मानी हीं।

¹⁷ ओ लाडलो, थे पेल्याऊँई आ बातानै जाणर चेता म रेह्ओ, जिऊँ थे बुराई करबाळा की बाता म आर थारी मजबूतिनै नइ खो द्‍यो।

¹⁸ पण आपणा परबु अर छुटकारो देबाळा ईसु मसी की दया अर बिकी पिछाण म बढता जाओ। बिकी मेमा इब अर सदा-सदाई होती रेह्‍वै। अंय्यांई होवै!