2 यहून्ना 1 - जीवन को च्यानणो (सेकावाटी नया नियम की पोथ्या)

राजी-खुसी का समचार

¹ म बिस्वासी मंडळी को मुखियो, आ चिठी बि लूगाईनै अर बिका टाबरानै मांडू हूँ। जिनै परमेसर टाळ्यो हो, अर बिका टाबराऊँ, म बाकै सचाई प चालबा की बजेऊँ परेम करूं हूँ। अर मई थारूँ परेम कोनी करूं पण बे सगळा जखा सचाईनै जाणगा हीं बे बी बाऊँ परेम करीं हीं।

² ओ बि सच की बजेऊँ होयो ह जखो आपणा म बास करै ह अर जखो सदाई आपणै सागै रेह्सी।

³ परम-पिता परमेसर अर ईसु मसी की दया, किरपा अर स्यांती सचा परेम क सागै आपणा प होती रेह्‍वै।

⁴ म, इ बातऊँ बोळो राजी हूँ क, थारा क्युंक टाबर सच प चालै ह जंय्यां क परम-पिता आपानै सच प चालबा ताँई हुकम दिओ हो।

⁵ इ ताँई, ए स्याणी इब, म तनै कोई नयो आदेस कोनी मांडर्यो पण बोई हुकम ओडाऊँ हूँ जखो जुगाद म दिओ गयो हो। म चाऊँ हूँ क आपा सगळा बिस्वासी एक दुसराऊँ परेम राखां।

⁶ परेम करबा को मतबल ओ ह क, आपा परमेसर का हुकमा प चालां। अर ओ बोई हुकम ह जखो आपानै जुगाद म दिआ गयो हो क आपानै परेम क सागै जीवन जिबो चाए।

⁷ म आ बात इ ताँई बोलुँ हूँ, क्युं क इ दुनिया म बोळा भटकाबाळा मिनख हीं। अर जखो बी मिनख इ बातनै कोनी मानै क ईसु मसी इ धरती प मिनख काया को रूप लेर आयो, जणा बो छळ करबाळो ह अर मसी को बेरी ह।

⁸ इ ताँई थे खुद समळर रेहज्यो जिऊँ थे बिनै जिकै ताँई म्हें बोळी मेनत कर्या हा गुमा नइ द्‍यो पण पूरो-पूरो इनाम पाओ।

⁹ अर जखो मिनख मसी की सीखऊँ न्यारो चल्यो जावै ह बो परमेसर क कनै कोनी जा सकै। पण जखो मिनख बिकी सीखनै मानै ह बिकन परम-पिता अर बिको बेटो दोन्युई रेह्‍वै ह।

¹⁰ अर ज कोई थानै मसी की सीख कोनी देवै जणा थे बि मिनखनै थारै घर म मना आबा द्‍यो अर नइ बिकी आवभगत करज्यो।

¹¹ क्युं क जखो मिनख बिकी आवभगत करै ह बो बिका बुरा करमा म सामिल होवै ह।

¹² थानै मांडबा ताँई तो मेरै कनै ओर बी बोळो क्युं ह, पण म बानै कागद प स्याईऊँ मांडबो कोनी चाऊँ। इकै बदलै म आ आस करूं हूँ क म थारै कनै आर आमै-सामै बतळाऊँ जिऊँ क आपा राजी होवां।

¹³ तेरी बिस्वासी भाण का टाबर-टिकर, थानै राजी-खुसी का समचार बोल्या हीं जानै परमेसर टाळ्यो।