2 कुरन्थीयो 8 - जीवन को च्यानणो (सेकावाटी नया नियम की पोथ्या)खुला मनऊँ दान देबो 1 सुणो मेरा लाडला बिस्वास्यो, इब म्हें थानै मकीदुनिया दिसावर की बिस्वासी मंडळ्या प जखी दया परमेसर करी ही बिकै बारां म बतावां हां। 2 मेरा खेबा को मतबल ओ ह क बा मंडळ्या का मिनख कळेस म बी बोळा राजी हा अर बे गरीब होतासोता बी दान देबा का मामला म पिछै कोनी रिह्या। 3 अर म बाकै बारां म खे सकूँ हूँ क, बे आपकी पायना गेलई कोनी दिआ पण बिऊँ बढर दिआ। अर अंय्यां बे आपकी सरदा गेल कर्या। 4 बे म्हारूँ हात जो'ड़र बुज्या हा क म्हें यहूदिआ म रेह्बाळा परमेसर का मिनखा की मदद करबा का सोभाग म संगी होबो चावां हां। 5 अर जंय्यां म्हें आस करी ही बिऊँ बेसी बे कर्या। पेली बे खुदनै परबुनै सूप दिआ बिकै पाछै परमेसर की इंछ्याऊँ खुदनै म्हानै सूप दिआ। 6 इ ताँई म्हें तितूसनै बोल्या हा क जंय्यां बो दान भेळा करबा का कामनै थारै मांय सरू कर्यो हो, बिनै सूल पूरो करबा म थारी मदद करै। 7 थे सगळी बाता म बढर्या हो जंय्यां क, बिस्वास म, बोली म, ज्ञान म, ईमानदारी म, परेम म, जखो थे म्हारूँ राखो हो। बंय्यांई दान देबा म बी बढता जाओ। 8 आ बात म हुकम देर कोनी खेर्यो पण इ ताँई खेर्यो हूँ क दुसरा मिनखा क खुला हियाऊँ दान देबा की बात सुणर थारै हिया म दुसरा मिनखा ताँई जखो परेम ह बि परेम की सचाई को सबूत द्यो। 9 क्युं क थे आपणा परबु ईसु मसी की दयानै जाणो हो। बो सक्याको मालिक होर बी थारै ताँई गरीब बण्यो। जिऊँ थे बिकी गरीबी की बजेऊँ हर चिज का धणी बण सको। 10 इ मामला म, म मेरी राय देबा जार्यो हूँ जखी थारै ताँई फाईदा मंद ह। थे गेलड़ा बरस दान देबा की इंछ्या दिखाबा मई नइ पण दान देबा म बी सगळाऊँ आगै हा। 11 इब थे इ कामनै पूरो करो। जखी इंछ्या थे करी ही, बिनै थे जोक्यु थारै कनै ह बि मऊँ दान देर पूरी करो। 12 थे जोक्यु बी थारी हिया की इंछ्याऊँ द्यो हो जणा बो अपणायो जावै ह। अर मेरो खेबो तो ओई ह क थारी पायना गेलई दिज्यो बिऊँ बेसी देबा की जुर्त कोनी। 13 क्युं क म्हें कोनी चावां क थानै तुमत होवै अर दुसरा को काम बणज्या पण म्हें तो सगळा को भलो चावां हां। 14 इ टेम थे थारी बढतीऊँ बाकै आडा आओ जखा कमी-घटी म ह, जिऊँ के बेरो आगै चालर थारी कमी-घटी म बे बी थारै आडै आ सकीं। अर अंय्यां सगळी बाता बराबर बी रेह्सी। 15 जंय्यां पबितर सास्तर म मंडेड़ो बी ह, “जखो बोळो भेळो कर्यो बिकन फालतु कोनी बच्यो, अर जखो थोड़ो भेळो कर्यो बिनै कम कोनी पड़्यो।” तितूस अर बिका साती-संगी 16 परमेसर को धनेवाद हो, क बो तितूस क हिया म थारै बेई बाई चिंत्या दि जखी म राखूँ हूँ। 17 क्युं क बो थारै कनै आबा ताँई म्हारै कनैऊँ रवाना होगो ह। अंय्यां कर बो म्हारी बातनै राखी जखी राखी पण आ बिकी बी इंछ्या ही क बो थारूँ ओज्यु मिलै। 18 अर म्हें बिकै सागै बि बिस्वासी भाईड़ानै बी भेज्या हां, जिको मान चोखा समचारनै परचार करबा की बजेऊँ सगळी बिस्वासी मंडळ्या म कर्यो जावै ह। 19 म्हारै सागै जार दान भेळो करबा ताँई बिस्वासी मंडळ्या इ भाईड़ानै टाळी ह। अर ओ सेवा को काम म्हें ओरा क आडै आबा अर परमेसर की मेमा ताँई करां हां। 20 म्हें एक सागै इ ताँई जावां हां, क्युं क म्हें कोनी चावां क खुला हियाऊँ दियड़ा इ बडा दान क बारां म कोई म्हारै प एक पिसा ताँई बी आँगळी उठावै। 21 क्युं क म्हें परबु की नजर्या मई नइ, पण मिनखा की नजर्या म बी ईमानदार रेह्बो चावां हां। 22 अर बाकै सागै म्हें म्हारा बि बिस्वासी भाईड़ानै भेजर्या हां, जिनै म्हें बोळी बार भलाई करबा ताँई त्यार देख्या हां अर इब बिनै थार प बी बोळो बिस्वास ह, जिऊँ बिमै थारै आडो आबा की इंछ्या बोळी बेत्ती ह। 23 अर ज कोई मनै तितूस क बारां म बुजै, तो बो मेरो साती अर थारै ताँई मेरै सागै काम करबाळो मिनख ह। अर जठै ताँई म्हारा बिस्वासी भाईड़ा को सुवाल ह, बे मसी की मेमा ताँई बिस्वासी मंडळ्याऊँ भेजेड़ा दुत हीं। 24 इ ताँई थे बानै थारो परेम दिखाज्यो अर थारै बारां म म्हें जखी बडाई करां हां, बिनै बिस्वासी मंडळ्या क सामै साबित करज्यो। |
(c) 2010-2017, New Life Computer Institute. All rights reserved