2 कुरन्थीयो 6 - जीवन को च्यानणो (सेकावाटी नया नियम की पोथ्या)

¹ परमेसर का संगी होबा क नातै म्हें थानै समजावां हां क परमेसर की दया थार प होई ह बिनै बेकार मना जाबाद्‍यो।

² क्युं क बो बोल्यो ह, “म सई टेम प तेरी सुणली, अर म छुटकारा हाळै दिन तनै सारो दिओ।” सुणो! सई टेम अर “छुटकारा को दिन” ओई ह।

³ म्हें कोई ताँई आखळी कोनी बणा जिऊँ कोईबी म्हारी सेवा प दोस कोनी लगा सकै।

⁴ पण म्हें सगळी बाता म कळेस, दुख, मुसीबत भोगर थ्यावस क सागै परमेसर का दासा की जंय्यां होबा की कोसिस करता रेह्‍वां हां।

⁵ म्हानै मार्यो, रूंद्‍यो अर जेळ म दिओ गयो म्हारूँ हदऊँ बेत्ती काम करवायो गयो अर म्हें नइ तो सो सक्या अर नइ खा सक्या।

⁶ म्हारी खराई, ज्ञान, थ्यावस, दया, सचो परेम, सच का समचार, पबितर आत्मा,

⁷ अर परमेसर की सक्‍ति की बजेऊँ म्हें परमेसर का दास हां। हमलो करबा अर बचाव ताँई म्हारी धारमिक्‍ता म्हारो राछ ह।

⁸ म्हानै मान दिओ जावै ह अर म्हारी बेजती बी करी जावै ह, म्हानै बुरा बी बतावीं अर भला बी बतावीं, म्हारै सागै अंय्यां बरताव कर्यो जावै ह क म्हें ठग हां। इकै बावजुद बी म्हें परमेसर क सामै बिस्वास जोगा हां।

⁹ म्हानै सूल जाणता बुजता बी मिनख म्हारी अनदेखी करीं हीं। म्हें मोत की छांया म हां पण हाल जीवां हां। म्हानै मार्या तो सई पण ज्यानऊँ कोनी मार्या।

¹⁰ म्हारा हिया म पिड़ा ह पण म्हें सदाई राजी रेह्‍वां हां, म्हें कंगला की जंय्यां दिखां हां पण ओरानै पिसाळा बणा देवां हां, म्हें रिता हात दिखां हां पण म्हारै कनै सक्यु ह।

¹¹ ओ कुरन्थी नगरी का म्हारा भाईड़ो म्हें थारूँ साप-साप बोल्या हां। अर म्हारा हिया की बाता थारै सामै खोल दिनी ह।

¹² अर जखो परेम म्हें थारूँ राखां हां बो कम कोनी होयो। पण थेई म्हारूँ परेम करबो छोड दिओ।

¹³ म आ बात थानै मेरा टाबर समजर खेऊँ हूँ, थे थारा हियानै म्हारै ताँई खोलो।

जीवता परमेसर को मनदर

¹⁴ परमेसर प बिस्वास नइ करबाळा का संगी मना बणो। क्युं क, बुराई को भलाई क सागै अर अँधेरा को च्यानणा क सागै काँई मेळ?

¹⁵ सेतान बलियाल क सागै मसी को काँई लेणदेण? अर बिस्वासी को परमेसर प नइ बिस्वास राखबाळा क सागै काँई मेळ?

¹⁶ परमेसर का मनदर को मूरत्याऊँ काँई नातो? क्युं क आपा खुदई जीवता परमेसर का मनदर हां, जंय्यां बो खुदई खयो हो, “म बामै रेह्ऊँ हूँ, बामै चालू फिरूँ हूँ। म बाको परमेसर हूँ, बे मेरा मिनख हीं।

¹⁷ इ ताँई थे परमेसर म बिस्वास नइ करबाळा मिनखा मऊँ निकळ्याओ, बाऊँ दूर रेह्ओ। परबु बोलै ह, बा चिजा क हात मना अड़ाज्यो जखी असुद ह। जणाई म थानै अपणास्युं।

¹⁸ म थारो बाप होस्युं, अर थे मेरा छोरा-छोरी होस्यो। आ बात सऊँ सक्‍तिसाली परबु खेवै ह।”