2 कुरन्थीयो 3 - जीवन को च्यानणो (सेकावाटी नया नियम की पोथ्या)

नया करार की सेवा

¹ के म्हें खुद म्हारी बडाई करर्या हां? नहिस म्हें दुसरा मिनखा की जंय्यां चापलुसी की चिठी मांडर थानै देवां नहिस थारूँ ल्यां?

² म्हारी चिठी तो थे हो, जखी म्हारै हिया की पट्या प मंडरी ह बिनै सगळा मिनख जाणै अर बाचै ह।

³ थे चिठी की जंय्यां हो जिनै खुद मसी मांडी ह अर म्हारै हाता भेजी ह। आ चिठी स्याईऊँ भाठा की पट्या प कोनी मांडी गई पण जीवता परमेसर की पबितर आत्माऊँ मिनखा की हिया की पटी प मांडी गई ह।

⁴ अर म्हें आ बात इ ताँई खेवां हां क्युं क मसी की बजेऊँ म्हानै परमेसर म पूरो बिस्वास ह।

⁵ इको ओ मतबल कोनी क म्हें इ कामनै करबा को बूतो राखां हां। पण म्हानै ओ बूतो परमेसरई देवै ह।

⁶ अर बोई म्हानै नया करार को दास होबा जोगो बणायो ह। अर आ कोई मांडेड़ी बात कोनी ह पण ओ पबितर आत्मा को करार ह क्युं क मांडेड़ो नेम-कायदो तो मारै ह जदकी पबितर आत्मा जीवन देवै ह।

⁷ मोत ल्याबाळी सेवा जखी मूसा का नेम-कायदा गेल होती ही जखो भाठा की पट्या प मांड्यो गयो अर जद ओ बिधान दिओ गयो जणा परमेसर की मेमा परगट होई। बि टेम का मूसा का मुंडा की चमक होळ्या-होळ्या कम होरी ही इकै बावजुद बी बा अत्ती जोरकी ही क इजरायल का मिनख बिका मुंडा कानि कोनी देख पार्या हा।

⁸ जणा जीवन ल्याबाळी सेवा जखी पबितर आत्मा गेल होवै ह बिऊँ बेत्ती भळका मारबाळी क्युं कोनी होसी?

⁹ जद मोत ल्याबाळी सेवा मेमाऊँ भरेड़ी ही जणा जीवन ल्याबाळी सेवा जखी धरमी बणावै ह बा बिऊँ बेत्ती मेमाऊँ भरेड़ी क्युं कोनी होसी?

¹⁰ इ नया करार की सेवा की मेमा क आगै मूसा का बिधान की मेमा क्युंई कोनी।

¹¹ ज मूसा को बिधान क्युंक टेम मई मिटबाळी मेमा क सागै दिओ गयो हो जणा इ कदैई नइ मिटबाळा नया करार की मेमा बिऊँ बोळी जोरकी क्युं कोनी होसी?

¹² म्हारै कनै आ मेमा भरी आस ह जणाई म्हें बेधड़क बोलर्या हां।

¹³ अर म्हें बि मूसा की जंय्यां कोनी जखो आपका मुंडानै गाबाऊँ ढक लिओ हो क्युं क कदै अंय्यां नइ होज्या क इजरायल का मिनख आपकी आँख्याऊँ बि मिटबाळा तेजनै देखले।

¹⁴ पण हालताई बाकी बुदी काम कोनी करै अर बे बि पुराणीया करारनै बाची हीं इ बजेऊँ बाकै आज बी आँख्या प बोई परदो पड़्यो ह। ओ परदो मसीई हटा सकै ह।

¹⁵ आज बी जद कदै मूसा का नेम-कायदा बाच्या जावै ह जणा बो परदो बाकी मती प पड़ज्यावै ह।

¹⁶ पण जखो बी परबु म मन लागावै ह बिकी बुदीऊँ बो परदो हटा दिओ जावै ह।

¹⁷ परबु अर पबितर आत्मा एकई ह अर जठै परबु की पबितर आत्मा ह बठै छुटकारो ह।

¹⁸ इ ताँई आपणा मुंडा ढकेड़ा कोनी। बे परबु की मेमा का तेजनै दरसावीं हीं अर पबितर आत्मा आपानै होळ्या-होळ्या आपणा मेमाभर्या परबु की जंय्यां बणावै ह।