2 कुरन्थीयो 2 - जीवन को च्यानणो (सेकावाटी नया नियम की पोथ्या)

¹ इ ताँई म ध्यारमाली ही क म थारै कनै ओज्यु कोनी आऊँ जिऊँ नइ तो म थानै दकालूं अर नइ थे बिऊँ दुखी होवो।

² क्युं क ज म थानै दुखी करूं जणा मनै कूण राजी करसी? के थे जिनै म दुखी करतो? नइ!

³ जणाई तो म थानै गेलड़ी चिठी म मांड्यो हो क जद म थारै कनै आऊँ जणा थारूँ जखा मनै सुक देवै ह बाऊँ दुखी नइ होऊँ। क्युं क मनै थारै उपर भरोसो ह क मेरी खुसी मई थारी खुसी ह।

⁴ क्युं क म अ बाता दुखी हियाऊँ अर पिड़ा म आसुआ क सागै थानै मांडी ही। इको मतबल ओ कोनी क म थानै दुखी करबो चावै हो पण इ ताँई मांडी ह क जखो परेम म थारूँ करूं हूँ बिनै थे जाणल्यो।

बुराई करबाळानै माफ करो

⁵ इब म बि मिनख क बारां म मांडबो चाऊँ हूँ जखो आपका करमाऊँ मनैई नइ पण थानै मेरूँ बेत्ती दिन घाल्यो ह। इकै बावजुद बी म इ मामलानै ओर बेत्ती कोनी खिचबो चाऊँ।

⁶ अंय्यां करबाळा मिनखनै बिस्वासी मंडळी का घणकराक मिनख ओळमो दे दिआ हीं आ सजा बि ताँई बोळी ह।

⁷ इब थे बिनै ओर सजा देबो बंद करो अर बि मिनखनै माफ कर बिकी हिमत बढाओ जिऊँ अंय्यां नइ होवै क बो दुख मई पड़्यो रेह्‍वै।

⁸ इ ताँई म थानै बोलुँ हूँ क थे बिऊँ सचो परेम करो।

⁹ म सगळी बाता इ ताँई थानै मेरी गेलड़ी चिठी म मांडी ही जिऊँ मनै ओ बेरो पड़ सकै क थे मेरी हिदायतानै मानो हो क कोनी।

¹⁰ पण ज थे कोईनै बी कोई बात ताँई माफ करो हो जणा म बी बिनै माफ करूं हूँ। अर जोक्यु बी म माफ करूं हूँ बो मसी क सामै थारै ताँई करूं हूँ,

¹¹ जिऊँ क आपा सेतान की भंगर्या म नइ आवां। क्युं क आपा बिकी चालाऊँ अणजाण कोनी हां।

तरोआस म पोलुस की चिंत्या

¹² जद म मसी का चोखा समचार को परचार करबा तरोआस गयो हो जणा मेरै ताँई परबु गेलो खोल दिओ।

¹³ पण बठै जद मनै बिस्वासी भाईड़ो तितूस कोनी लाध्यो जणा मेरा जीव म तसली कोनी आई। अर म बठैऊँ बिदा होर मकीदुनिया कानि चाल पड़्यो।

¹⁴ परमेसर को धनेवाद हो क बो आपानै मसी की बजेऊँ सदाई जीत का गेला प लेज्यावै ह। अर परमेसर मसी की बाता का ज्ञाननै च्यारूमेर फेलाबा ताँई आपानै चोखी सुगंद की जंय्यां काम म लेवै ह।

¹⁵ जखा नास कर्या जावै अर बचाया जावीं हीं बाकै मांयनै आपा बि धूप की सुगंद की जंय्यां हां जखी मसी परमेसर क चढावै ह।

¹⁶ क्युं क जखा मोत का गेला प नास होबा ताँई जार्या हीं बा ताँई मोत की बास हां। अर जखा छुटकारा का गेला प जार्या हीं बा ताँई जीवन की सुगंद हां। पण आ बाता क जोगो कूण ह?

¹⁷ परमेसर का बचना को परचार को धंधो करबाळा बोळा हीं बे आपको फाईदो चावै ह। पण म्हें अंय्यां का कोनी हां, म्हानै परमेसर सचाई क सागै बोलबा ताँई ईसु मसी का दास क रूप म भेज्यो ह।