2 कुरन्थीयो 12 - जीवन को च्यानणो (सेकावाटी नया नियम की पोथ्या)

पोलुस प परमेसर की दया

¹ जदकी गुमान करबा को कोई फाईदो कोनी बिकै बावजुद बी म गुमान करूं हूँ, इ ताँई म परबुऊँ मिलेड़ा दरसाव अर परकासन की चरचा करस्युं।

² बरसा पेली एक मिनखनै जखो मसी म ह, बिनै ईस्बर नगरी म तीसरी उची झघा म उठा लिओ गयो हो। म कोनी जाणू बिनै काया म नहिस बिना काया क, आतो परमेसरई जाणै।

³ बिकी काया बठै ही नहिस बिकी आत्मा बठै ही आ म कोनी जाणू पण बस परमेसरई जाणै ह।

⁴ म जाणू हूँ इ मिनखनै ईस्बर नगरी म उठायो गयो बठै बो अनोरी बाता सुणी जानै कोनी बोल्यो जा सकै बे अंय्यां की बाता ही जानै बोलबो मिनख क बस म कोनी।

⁵ अंय्यां का मिनख की बजेऊँ म गुमान कर सकूँ हूँ। पण खुदकी कमजोर्यानै छोडर कोईबी बात प खुद प गुमान कोनी करस्युं।

⁶ अर ज म गुमान करबा की सोची बी ह जणा बी म बावळो कोनी हूँ। क्युं क म सच बोलुँ हूँ क; ज कोई मनै अंय्यां करता देखै नहिस सुणै ह जणा बो मनै बिऊँ बढर नइ मानबो चाए।

⁷ म बोळी ताजूबभरी बाता देखबा की बजेऊँ गुमान नइ करूं इ ताँई मेरी काया म रोग की एक दरदनाक पिड़ा दिनी गई ह, जखी सेतान का एक दुत की जंय्यां मनै मारबा को काम करै ह। पण आ मनै खुद प गुमान करबाऊँ बचावै ह।

⁸ म तीन बर परमेसरऊँ अरदास कर बोल्यो क, इ पिड़ानै मेरूँ दूर कर दे,

⁹ पण बो मनै बोल्यो, “तेरी कमजोरी म मेरी दया जखी तेर प ह बा तनै बोळी, क्युं क कमजोरी मई मेरी सक्‍ति बोळी काम करै।” इ ताँई म मेरी कमजोरी म बोळो राजी होर गुमान करस्युं जिऊँ मसी की सक्‍ति मेर प उतरसी।

¹⁰ हाँ म कमजोर होर, बेजत होर, दुख म, सताव म, परेसानी म राजी हूँ, ज बे मसी की बजेऊँ ह। क्युं क जद म कमजोर होऊँ हूँ, जणाई ताकतबर होऊँ हूँ।

कुरन्थी की बिस्वासी मंडळी ताँई पोलुस की चिंत्या

¹¹ म बावळा की ढाळ बोल्यो, पण अंय्यां करबा ताँई थेई मनै उकसाया। जदकी म तो क्युंबी कोनी हूँ, पण थानै तो मेरी बडाई करबो चाए, क्युं क म थारा बा भेजेड़ा चेला मऊँ, एक बात म बी कम कोनी हूँ।

¹² अर भेजेड़ा चेला क मांयनै जखी बाता होवै ह, बंय्यांई म बोळी थ्यावसऊँ सेलाणी, चमत्कार, अर ताजूब का काम कर दिखायो हूँ।

¹³ थे कूणसी बात म दुसरी बिस्वासी मंडळ्याऊँ न्यारा हो? खाली इकै क म मेरो बोज थारै उपर कोनी लाद्‍यो। मनै इ काम ताँई थे माफई करो।

¹⁴ इब म तीसरकै थारै कनै आबा ताँई त्यार हूँ। पण म थारूँ कोई माँग कोनी करूं। क्युं क मनै थारी धन-दोलत को लालच कोनी, पण थारो लालच ह। अर नइ टाबरानै आपका माँ-बाप ताँई पिसो जोड़बा की जुर्त होवै ह। पण माँ-बाप टाबरा ताँई पिसो जोड़ै ह।

¹⁵ अर जठै ताँई मेरी बात ह, मेरै कनै जोक्यु बी ह, बिनै थारै ताँई राजी होर खरच करस्युं, अठै ताँई क म खुदनै बी थारै ताँई दे देस्युँ। अर जद म थारूँ, अत्तो प्यार-परेम करूं हूँ, जणा थे कंय्यां मेरूँ, थोड़ो प्यार-परेम कर सको हो?

¹⁶ थे मानो हो क, म थार प बोज कोनी हूँ। पण दुसरै नाकै थारै मऊँ क्युंक खेवै ह क, म चलाक होर थानै मेरी चलाकी म फसा लिओ।

¹⁷ थेई बताओ, म जत्ता मिनखानै थारै कनै भेज्यो हो बाऊँ थानै कोई ठग्यो हो के?

¹⁸ म तितूसऊँ जाबा ताँई हाता जोड़ी करी अर बिकै सागै बिस्वासी भाईड़ानै भेज्यो हो। जणा के थे खे सको हो क, तितूस थारो फाईदो उठायो? नइ! क्युं क म्हारै कनै एकई आत्मा ह, जखी म्हारै म एक जंय्यांई काम करै ह।

¹⁹ हो सकै ह! थे अंय्यां सोचो हो क, म्हें अंय्यां बोलर खुदको बचाव करर्या हां। नइ! म्हें मसी का दास होर बोल्या, अर इ बात को गुवा परमेसर ह। ओ मेरा लाडला भाईड़ो! म्हें जोक्यु बी कर्या बो थानै आत्मिक रूपऊँ मजबूत करबा ताँई कर्या।

²⁰ म डरूँ हूँ क, जद म थारै कनै आऊँ, जणा कदै अंय्यां नइ होवै क, जंय्यां म थानै देखबो चाऊँ हूँ, बिऊँ न्याराई दिखो। अर जंय्यांको थे मनै नइ देखबो चाओ हो, बिऊँ न्यारोई देखो। अर मनै ओ बी डर ह क, कदै थारै मांयनै आपसरी म राड़, एक दुसराऊँ बळबो, झाळ काडबो, मतलबीपुणो, बदनामी अर बेजती करबो, काना-फूसी अर हेकड़ोपूणो अर काम बिगाड़बो नइ देखूँ।

²¹ अर मनै ओ बी डर ह क, जद म थारूँ मिलबा आऊँ, जणा मनै परमेसर क सामै सरमिंदा नइ होणो पड़ै। अर मनै बा ताँई रोबो नइ पड़ै जखा पेल्या पाप करता हा, बे कुकरम, सूगली बाता, अर रांडबाजी म जीवन जीता हां, इकै पाछै बी, बे आपका पापऊँ तौबा कोनी कर्या।