Biblia Todo Logo
Bìoball air-loidhne

- Sanasan -

1 तिमूतियूस 6 - जीवन को च्यानणो (सेकावाटी नया नियम की पोथ्या)

1 ज तू दास ह, तो तनै तेरा मालिक की ईज्जत अर बिको आदर करबो चाए। जिऊँ कोईबी परमेसर का नाम अर आपणी सीख क बारां म बुरो नइ बोल सकै।

2 जखा दासा का मालिक बिस्वासी हीं, बे इ बजेऊँ क, बाका मालिक बिस्वासी हीं बाको मान-समान करबो कम नइ करै, इकी झघा बे बाकी सूल सेवा करै। क्युं क बाका कामा को फाईदो जानै मिलर्यो ह बे बिस्वासी हीं जानै बे परेम करै ह। अ बाता थे लोगानै करबा ताँई बोलो अर सीखाओ।


झूठी सीख अर सचो धन

3 ज कोई, बि सई अर आपणा परबु ईसु मसी की ईस्बरीय सीखनै, नइ मानै अर क्युं न्यारोई सीखावीं,

4 जणा अंय्यां को मिनख मरोड़ म बांको रेह्‍वै, पण बो क्युंई कोनी जाणै। बिकी मत्ती मारी गई, अर बिनै बाता प जिदबो चोखो लागै ह। बिमैऊँ बळोकड़ोपूणो, दोस लगाबो, सूगली बाता अर बुराई निकळै ह।

5 अर बा मिनखा म राड़ होवै ह जाकी मत्ती मारी गई ह, अर जखा सचऊँ दूर होगा हीं, बे सोचीं हीं क, परमेसर की सेवा धन कमाबा को सादन ह।

6 परमेसर की भगती म राजी रेह्बाळो, इ सच म अमीर ह।

7 क्युं क आपा धरती प नइ तो क्युं लेर आया हा अर नइ क्युं लेर ज्यास्यां।

8 ज आपणै कनै रोटी अर गाबा हीं, जणा पाछै आपानै ओर काँई चाए?

9 पण जानै धन भावै, बे लालच अर उजाड़बाळी बोळी बुरी इंछ्या म पड़ीं, जखी मिनखनै बरबादि अर बिनास क गर्त म गेरै ह।

10 क्युं क पिसा को मो सगळी बुराया की जड़ ह। क्युंक मिनख पिसा का लालच म बिस्वासऊँ मुंडो मोड़र बोळा दुख मोल ले लिआ।


तिमूतियूसनै पोलुस की हिदायत

11 पण तू, जखो परमेसरनै मानबाळो ह, आ सगळी बाताऊँ दूर रेह्जे, पण धारमिक्‍ता, भगती, बिस्वास, परेम, थ्यावस अर दिनता म बण्यो रेह।

12 बिस्वास की दोड़ म पूरी ज्यान लगार भाज। अर खुद ताँई अजर-अमर जीवन जीत, जि ताँई तनै परमेसर बुलायो हो, जद तू रोब क सागै तेरा बिस्वासनै बोळा सारका गुवा क सामै दिखायो हो।

13 सगळानै जीवन देबाळा परमेसर क सामै अर मसी ईसु जखो पीळातुस क सामै हिमत क सागै आपका बिस्वासनै दिखायो बिमै, म तनै आदेस देऊँ हूँ,

14 आपणा परबु ईसु मसी क परगट होबाळा दिन ताँई अ आदेस मानबा म बेदाग रेह।

15 बिनै परमेसर सई टेम प परगट करसी, परमेसर धने अर एकई राज करबाळो, राजा-म्हराजा को राजा अर परबुआ को परबु ह।

16 बो एकलोई अजर-अमर ह! बो बि च्यानणा म बास करै ह जिकनै कोई कोनी पुग सकै। नइ कोई बिनै कदै देख्यो ह! अर नइ कोई कदै देख सकै। बिको मान-समान अर राज जुग-जुग होतो रेह्‍वै! अंय्यांई होवै।

17 जखा मिनख इ दुनिया म पिसाळा हीं बानै आदेस दे बे इपै गुमान नइ करै, पण बाकी आस, नास होबाळा धन की बजाय परमेसर म हो, जखो आपानै आपणा सुक ताँई सगळी चिजा देवै ह।

18 चोखा काम करबा ताँई बानै आदेस दे, जिऊँ बे चोखा काम करबाळा, दान देबाळा अर हियाऊँ देबाळा होवीं।

19 अंय्यां कर बे खुद ताँई अंय्यां को धन भेळो करसी जखो आबाळा टेम ताँई एक मजबूत निम म्हेलसी। अर जणा बे बि जीवननै जीतबा जोगा होसी, जखो सचो ह।

20 ओ तिमूतियूस, जखो तनै सोप्यो गयो ह बिनै समाळर राख। दुनियादारी की बात अर बकवास जिरैऊँ खुदनै परै राख जिनै क्युंक मिनख गळतीऊँ “ज्ञान” बोलै ह।

21 क्युंक मिनख इ झूठा ज्ञान प बिस्वास करबा को दावो कर्या, अर जिको नतिजो ओ होयो क, बे सचा बिस्वास का गेलाऊँ भटकगा। थारै सगळा प परमेसर की दया होवै।

(c) 2010-2017, New Life Computer Institute. All rights reserved

Lean sinn:



Sanasan