1 तिमूतियूस 5 - जीवन को च्यानणो (सेकावाटी नया नियम की पोथ्या)बिस्वास्या ताँई जिमेबारी 1 जद तू बूडा-ठेरा मिनखानै चेतावै जणा बानै मना दकालजे, पण बाऊँ ईज्जतऊँ बोलजे जंय्यां क खुदका बापऊँ बोलै ह। अंय्यांई जवान मोट्यारा क सागै खुदका भाई की जंय्यां बरताव कर। 2 अर बूडी-ठेरी लूगायानै माँ जंय्यां अर जवान लूगायानै पूरी खराई क सागै भाण समजर बरताव कर। 3 बा खालीहोइड़ी लूगाया की ईज्जत कर जाकी देखभाळ करबाळो कोई कोनी। 4 पण ज कोई खालीहोइड़ी क टाबर-टिकर, दोइती-दोय्ता नहिस पोती-पोता होवै जणा आ टाबरानै सऊँ पेल्या चाए क, अ आपका परवार क सागै भगती को बरताव करै। अर आपका माँ-बाप दादी-दादा की सेवा कर बाकै उपकार को जस दे, क्युं क अंय्यां करबाऊँ परमेसर राजी होवै ह। 5 बा जखी सचमई खालीहोइड़ी लूगाई ह जिकै कनै बिकी साळसमाळ करबाळो कोई कोनी, अर जखी परमेसर म आस राखै ह अर रात-दिन अरदास करै ह अर परमेसरऊँ मदद माँगै ह। 6 पण जखी खालीहोइड़ी लूगाई मोज-मस्ति म पड़गी बा जीता-जी मरगी। 7 आ सगळानै आ बाता ताँई आदेस दे जिऊँ बापै कोई लालछण नइ लागै। 8 पण ज कोई आपका रिस्तेदारा की, खासकर आपका घरहाळा की साळसमाळ नइ करै जणा बो बिस्वासऊँ मुकरगो ह अर बो एक बिस्वास नइ करबाळाऊँ बी भत्तर होगो ह। 9 बि खालीहोइड़ी लूगाई को नाम इ बिदवा सायता सूची म मांडजै जखी साठ बरसऊँ कम नइ होवै, अर बा एकरई ब्याईड़ी होवै, 10 जिको चोखा काम करबा म नाम होयड़ो हो, अर जखी आपका टाबरानै सूल पाळी हो, जखी पराया अर अणजाण मिनखा की आवभगत करी हो, परमेसर का मिनखा को खुदका घर म आवभगत करी हो, दिन-दुखीया की मदद करी हो, अर जखी खुदनै चोखा काम करबा म लगादि होवै। 11 पण जवान खालीहोइड़ी लूगाया को नाम बिदवा सायता सूची म मना मांडजै। क्युं क मसी बई बाकी भगती प जद बिकी काया की इंछ्या सवार होवै जणा बे ब्या करबो चावीं हीं। 12 जणा बे अंय्यां कर परमेसर क सागै करेड़ा बाका पेल्या का वादाऊँ मुकर पापण बणी हीं। 13 अर बे घर-घर हांडर खुदको टेम बरबाद करबो सीखीं हीं, अर इऊँ बी भत्तर बे फाँप मारबो अर दुसरा का काम म टांग अड़ाबो सीखीं हीं, अर जखी बाता क बारां म बात नइ करनी चाए, बाकै बारां म बतळावीं हीं। 14 जणा म चाऊँ हूँ क, जवान खालीहोइड़ी लूगाई ब्या कर टाबर जलमै, अर आपका घर की देखभाळ करै, जिऊँ बे आपणी बुरी चितबाळानै आपणै खिलाप बुरो खेबा को मोको नइ दिं। 15 क्युं क क्युंक जवान खालीहोइड़ी लूगाया पेल्याऊँई सेतान की भंगराया म आर बिकै गेल होली ह। 16 ज कोई बिस्वासणी क परवार म खालीहोइड़ी लूगाई ह जणा बा बिकी देखभाळ करै अर बिस्वासी मंडळी प बिको बोज नइ गेरै, जिऊँ बिस्वासी मंडळी बा खालीहोइड़ी लूगाया की देखभाळ कर सकै जाको कोई कोनी। 17 एक मुखिया क रूप म, जखाबी बिस्वासी मंडळी का मुखिया, चोखो काम करीं बे दुणा मान क जोगा समज्या जावै, खासकर बे जखा परचार अर सीखाबा म घणी मेनत करीं हीं। 18 क्युं क नेम-कायदा बोलै ह, “थे कोईको पेट मना दुखाज्यो” अर “ध्यानग्यानै ध्यानगी मिल्णी चाए।” 19 कोईबी बिस्वासी मंडळी का मुखिया क खिलाप दो नहिस बिऊँ बेसी गुवा बिना बिपै लगाया गया दोस मना सुणजै। 20 जखा पाप करीं बाकै सगळा क सामै दकाल लगा जिऊँ दुसरा पाप करबाऊँ डरै। 21 म तनै परमेसर, मसी ईसु अर टाळेड़ा ईस्बर नगरी दुता की मोजूदगी म बोलुँ हूँ क, बिना कोईकी भीड़ लिये तू आ आदेसानै मानजै अर ख्यामई कोईकै सागैई भेद-भाव मना करजे। 22 मिनखा क सीर प आसिरबाद देबा ताँई हात म्हेलर बानै परमेसर की सेवा म देबा ताँई तावळ मना करजे। दुसरा क पाप म सामिल मना होए, खुदनै पबितर बणायो राख। 23 पाणीई मना पीआ कर पण पेट अर बारबार होबाळी बिमारी की बजेऊँ चीनिसी अँगूरी बी पी लिआ कर। 24 क्युंक मिनखा का पाप चोड़ा म रेह्वै अर बाकै गेल बाको न्याय बी होवै, पण कया का बुरा कामा को पाछै बेरो पड़ै ह। 25 अंय्यांई चोखा काम बी सामै आवीं हीं अर जखो भला काम सामै कोनी आया बे ओला म कोनी रेह्सी। |
(c) 2010-2017, New Life Computer Institute. All rights reserved