Biblia Todo Logo
Bìoball air-loidhne

- Sanasan -

1 तिमूतियूस 4 - जीवन को च्यानणो (सेकावाटी नया नियम की पोथ्या)


झूठी सीख देबाळा

1 पबितर आत्मा साप-साप बोलै ह क, क्युंक टेम क पाछै क्युंक मिनख बिस्वास करबो छोड देसी, बे ओपरी बलाया की सीखनै मानसी अर भंगराबाळी आत्मा क कह्या म चालसी।

2 अर अ सीख झूठा पाखंडी मिनखा की बजेऊँ फेलसी, जाकी अन्तर-आत्मा मरेड़ी ह।

3 अंय्यां का मिनख ब्या करबानै गळत अर खाबा की क्युंक चिजाऊँ परेज करबा की सीख देसी, पण परमेसर बा चिजानै इ ताँई बणायो हो क, बिस्वासी अर सचनै जाणबाळा बानै परमेसर को धनेवाद कर खावै।

4 क्युं क परमेसर को सिरजेड़ो सक्यु चोखो ह क्युं बी बगाबा जोगो कोनी, पण धनेवाद कर सक्यु खायो जा सकै ह,

5 क्युं क परमेसर का बचन अर थारी अरदास बा सगळी चिजानै खाबा ताँई सुद बणावै ह।


ईसु मसी को चोखो सेवक

6 ज तू भाईड़ानै अ हिदायत देसी जणा तू मसी ईसु को चोखो दास होसी। इऊँ ओ बेरो पड़ै क, आत्मिक रूपऊँ बिस्वास का बचन अर सची सीख तेरै मांयनै ह, जखी तू मानतो आयो ह।

7 पण खुदनै, नइ खेबा जोगी बा क्हाणी-कथाऊँ परै राख, जामै परमेसर कोनी पण खुदनै परमेसर की भगती म लगायो राख।

8 काया की कसरतऊँ तो चिनोसोई फाईदो होवै, पण परमेसर की भगती तो सगळी बाता म फाईदो करै ह। क्युं क आज अर आबाळा जीवन का सगळा आसिरबादा की जामनी भगती प टिकरी ह।

9 आ सची बात ह जखी हर कानिऊँ बिस्वास जोगी अर मानबाळी ह।

10 आपा इ ताँई मेनत अर कोसिस करां हां, क्युं क आपणी आस जीवता परमेसर म ह। जखो सगळानै, खासकर बिस्वास्यानै बचाबाळो ह।

11 इ ताँई बानै बा बाता ताँई आदेस अर अ सीख देतो रेह।

12 तनै कोई क सामैई निचो नइ देखणो पड़ै क्युं क तू जवान ह, पण बोली-चाली, चाल-चलन, प्यार-परेम, बिस्वास अर खराई म तू बिस्वास्या क सामै नमूनो बणज्या।

13 जद ताँई म थार कनै नइ आऊँ तू तेरो टेम अर तेरी मेनत मिनखानै नेम-कायदानै बाचर सुणाबा, बचन को हेलो पाड़बा अर सीखाबा म लगाजे।

14 तेरै मांयनै जखो आत्मिक बरदान ह जखो तनै बि टेम मिल्यो हो जद परमेसर की खेबाळा अर बिस्वासी मंडळी का मुखिया तेरा सीर प तनै आसिरबाद देबा ताँई हात मेहल्या हा, बि बरदान बई लापरवा मना हो।

15 बा बरदानानै काम म लेतो रेह अर बामै ध्यान लगायो राख, जिऊँ तेरी तरक्की सगळा देख सकै।

16 खुद प अर तेरी सीख प ध्यान दे, अर आमै पक्को हो। क्युं क अंय्यां करबाऊँ तू, खुदनै अर तनै सुणबाळानै बचाबा की बजै बणसी।

(c) 2010-2017, New Life Computer Institute. All rights reserved

Lean sinn:



Sanasan