1 तिमूतियूस 2 - जीवन को च्यानणो (सेकावाटी नया नियम की पोथ्या)

मिनखा ताँई नियम

¹ इब सऊँ पेल्या म थारूँ अंय्यां अरज करूं हूँ क, बिणती, अरदास, बिचबचाव अर धनेवाद परमेसरनै सगळा मिनखा ताँई दिओ जावै।

² राजा-म्हराजा अर सगळा अधिकार्या ताँई अरदास करी जावै। जिऊँ आपा सुक-स्यांती क सागै भगती अर सरदाऊँ परमेसर ताँई जीवन जी सकां।

³ अंय्यां अरदास करबो चोखो ह, अर ओ आपानै बचाबाळा परमेसरनै भावै बी ह।

⁴ अर बो चावै क, धरती का सगळा मिनख बचज्यावीं अर बे सचनै जाणी।

⁵ क्युं क परमेसर एकई ह अर परमेसर अर मिनखा क बिचमै बिचोलिओ बी एकई ह, मतबल मसी ईसु जखो खुद एक मिनख ह।

⁶ जखो सगळा मिनखानै बचाबा ताँई खुदनै हरजाना क रूप म दे दिओ, जखी सई टेम प इ बात की गुवाई ही क, परमेसर सगळानै बचाबो चावै ह।

⁷ अर इ गुवाईनै गैर-यहूदि मिनखानै सुणाबा ताँई म एक सचा बिस्वास की सीख देबाळो अर ईसु को भेजेड़ो चेलो बणायो गयो हूँ। जिऊँ म बिस्वास का समचार अर सच को हेलो पाड़ सकूँ। म झूठो कोनी हूँ म सच बोलर्यो हूँ।

⁸ जणा इब म चाऊँ हूँ क, हर कठै मोट्यार बिना झाळ भर्या अर बिना मनमुटाव कर्या, खुदका पबितर हातानै जो'ड़र अरदास करै।

⁹ अर ठिक बंय्यांई म भाण-बेट्याऊँ बोलुँ हूँ क, सरम लाज अर थ्यावस क सागै सिदा-सादा पेराणऊँ खुदनै सुवांरीं, चोटी बणार सोना अर मोत्या अर मेंगा गाबाऊँ नइ,

¹⁰ अंय्यां की भाण-बेटी जखी खुदनै परमेसर की भगत मानी हीं बा ताँई ओई चोखो ह क, बे खुदनै भला कामाऊँ सुवांरी।

¹¹ लूगाईनै चुपचाली रेह्‍र सूल कह्या म चालर, सीख लेणी चाए।

¹² म बोलुँ हूँ, लूगाया नइ तो मोट्यारानै सीख देवीं अर नइ मोट्यारानै हुकम ओडावै, पण चुपचाली रेह्‍वै।

¹³ क्युं क पेल्या आदम बणायो गयो अर पाछै हवा।

¹⁴ आदमनै भंगरायो कोनी गयो, पण लूगाई भंगराया म आर पापण बणी।

¹⁵ इकै बावजुद बी लूगाया टाबर जामर बचसी, अर बानै चाए क, बे थ्यावस क सागै बिस्वास, परेम अर पबितरता म मजबूत रेह्‍वै।