1 यहून्ना 5 - जीवन को च्यानणो (सेकावाटी नया नियम की पोथ्या)परमेसर का टाबर दुनियानै जीत लिआ हीं 1 जखाबी मिनख ओ बिस्वास करीं हीं क, ईसुई मसी ह बे परमेसर का टाबर हीं, अर जखाबी परमेसरऊँ परेम करसी बे बिका टाबराऊँ बी परेम करसी। 2 अर ज आपा परमेसर का टाबराऊँ परेम करां हां, जणा इऊँ आ साबित होवै ह क, आपा परमेसरऊँ परेम करां हां अर बिका हुकमानै बी माना हां। 3 परमेसरऊँ परेम करबा को मतबल ओ ह क, आपा बिका हुकमानै माना अर बिका हुकमानै मानबो दोरो कोनी। 4 अर जखाबी मिनख परमेसर का टाबर बणज्यावीं हीं बे दुनियानै जीत लेवै ह। इकी बजे आपणो बिस्वास ह। 5 जखोबी ओ बिस्वास करै ह क, ईसु मसीई परमेसर को बेटो ह , बो इ दुनिया प जीत हासिल करै ह। ईसु क बारां म गुवाई 6 ईसु मसी जखो आपणै कनै पाणी अर लोय क सागै आयो। बो बस पाणी को बतिस्मो लेबाई कोनी आयो पण बोतो इकै सागै आपको लोय बहाबा ताँई आयो। इ बात की गुवाई परमेसर की आत्मा देवै ह अर आत्मा की गवाई सची ह। 7 अर गुवाई देबाळा तीन जणा हीं। 8 पबितर आत्मा, पाणी अर लोय आ तीन्या की गुवाई एकई ह , अर अ इमै सेमत बी हीं। 9 अर आपा तो मिनखा की गुवाईनै अत्तो मान देवां हां, जणा परमेसर की गुवाई को तो खेबोई काँई। क्युं क परमेसर की गुवाई तो मिनखा की गुवाईऊँ बडी ह। अर परमेसर आपका बेटा ताँई गुवाई दि ह। 10 अर जखो बी मिनख परमेसर का बेटा प बिस्वास करै ह, बो परमेसर की गुवाईनै मानै ह। अर ज कोई परमेसर की खेईड़ी बाता प बिस्वास कोनी करै, बो परमेसरनै झूठो बोलै ह। क्युं क परमेसर आपका बेटा ताँई गुवाई दिनी ह। 11 परमेसर बिकी गुवाई आ खेर दिनी क बो आपानै अजर-अमर जीवन दिओ ह , अर ओ जीवन बिका बेटाऊँ आवै ह। 12 जिकै कनै परमेसर को बेटो ह, बिकन जुग-जुग को जीवन बी ह। अर जिकै कनै परमेसर को बेटो कोनी बिकन जुग-जुग को जीवन बी कोनी। जुग-जुग को जीवन 13 परमेसर का बेटा प बिस्वास करबाळो, म, अ बाता थानै इ ताँई मांडूँ हूँ, जिऊँ थे ओ जाणल्यो क अजर-अमर जीवन थानै मिल्यो ह। 14 आपा परमेसर प अंय्यां को बिस्वास करां हां क, जद बिऊँ बिकी इंछ्या गेल अरदास करां हां जणा बो आपणी सुणै ह। 15 अर आपा आबी जणा हां क, जदकी बो आपणी सुणै ह अर जद आपा बिऊँ माँगा हां जणा आपा जाणा हां क, जोक्यु आपा माँग्या हां बो आपानै मिलगो ह। 16 अर ज कोई मिनख खुदका बिस्वासी भाईनै अंय्यां को पाप करता देखै जिको फळ जुग-जुग की मोत कोनी ह जणा बो परमेसरऊँ बिकै ताँई अरदास करै जणा परबु बिनै जुग-जुग की मोत की सजा कोनी देसी पण बाकी अरदास सुणर जुग-जुग को जीवन देसी। पण म बा मिनखा ताँई अरदास करबा ताँई कोनी खेऊँ जखा अंय्यां का पाप करै ह जिको फळ जुग-जुग की मोत ह। 17 सगळा बुरा काम पाप ह पण अंय्यां का पाप बी ह जिको फळ जुग-जुग की मोत कोनी। 18 आपा जाणा हां क, जखोबी मिनख परमेसर को ह बो पाप कोनी करतो रेह्वै क्युं क परमेसर बिनै बचावै ह अर बिकै सेतान हात कोनी अड़ा सकै। 19 आपा आबी जाणा हां क, सगळा जगत का मिनख सेतान क बस म ह, पण आपा परमेसर का हां। 20 इ बातनै बी आपा जाणा हां क परमेसर को बेटो ईसु मसी आयो अर आपानै समज दिओ जिऊँ आपा सचा परमेसरनै जाण सकां, अर आपा बिकै सागै रेह्वां जखो सचो ह, मतबल ईसु मसी क सागै। ओई सचो परमेसर अर अजर-अमर जीवन देबाळो ह। 21 मेरा भाईड़ो, थे खुदनै मूरती धोकबाऊँ बचार राखज्यो। |
(c) 2010-2017, New Life Computer Institute. All rights reserved