1 यहून्ना 4 - जीवन को च्यानणो (सेकावाटी नया नियम की पोथ्या)झूठा परमेसर की खेबाळाऊँ बचर रेहज्यो 1 लाडलो, हरेक मिनख की बाता को बिस्वास मना करो जखो खेवै ह क, म, आत्माऊँ बोलुँ हूँ। पण सदाई बाकी आत्मानै परखो अर देखो क बामै परमेसर ह क कोनी। म थारूँ अंय्यां इ ताँई खेर्यो हूँ, क्युं क इ दुनिया म बोळा झूठा परमेसर की खेबाळा घुमर्या हीं। 2 थे परमेसर की पबितर आत्मानै अंय्यां जाण सको हो: जिकी बी आत्मा आ खेवै ह क, “ईसु मसी, मिनख काया म इ धरती प आयो।” बिकी आत्मा परमेसर क कानिऊँ ह। 3 अर हरेक बा आत्मा जखी ईसु मसी क बारां म इ बातनै कोनी मानै बा परमेसर क कानिऊँ कोनी। बा मसी का बेरी की आत्मा ह, जिकै बारां म थे पेल्याऊँई सुण चुक्या हो क बो आबाळो ह। बो आबाळो के ह बो तो इब बी इ दुनिया मई ह। 4 ओ टाबरो, थे परमेसर का हो। इ ताँई थे झूठा परमेसर की खेबाळानै जीत लिआ हो। क्युं क थारै मांयनै रेह्बाळो परमेसर, इ दुनिया म रेह्बाळा सेतानऊँ बडो ह। 5 बे झूठा परमेसर की खेबाळा इ दुनिया का हीं, अर इकै बारां मई बात करीं हीं अर आ दुनियाई बाकी बाता सुणै ह। 6 पण आपा परमेसर का हां अर जखो बी परमेसरनै जाणै ह बो आपणी बाता सुणै ह। पण जखो परमेसर को कोनी बो आपणी कोनी सुणै। अर इ बातऊँ आपा आ जाण सकां हां क, कूणसी आत्मा सच की ह अर कूणसी आत्मा भंगराबाळी ह। परमेसरई परेम ह 7 लाडलो, आपा एक दुसराऊँ प्यार-परेम करां। क्युं क परमेसरई परेम ह अर जखा बी प्यार-परेम करै ह बे परमेसर का बेटा-बेटी बणग्या हीं अर बे परमेसरनै जाणी हीं। 8 जखोबी मिनख परेम कोनी करै बो परमेसरनै कोनी जाण्यो। क्युं क परमेसरई परेम ह। 9 परमेसर आपका एकलोता बेटानै इ दुनिया म भेजर आपको परेम परगट कर्यो जिऊँ आपानै बिका बेटा की बजेऊँ जीवन मिल सकै। 10 सचो परेम इमै कोनी क आपा परमेसरऊँ परेम करां हां पण इमै ह क परमेसर आपणाऊँ परेम कर्यो अर आपका बेटानै आपणा पाप ताँई बलिदान होबानै भेज दिओ। 11 लाडलो, जदकी परमेसर आपणाऊँ अंय्यां को परेम कर्यो ह जणा पाछै आपानै बी एक दुसराऊँ प्यार-परेम करबो चाए। 12 परमेसरनै कोईबी कदैई कोनी देख्यो, पण ज आपा एक दुसराऊँ प्यार-परेम करां जणा परमेसर आपणा म बास करै ह अर बिको परेम आपणै मांयनै पूरी तर्या ह। 13 अर आपानै पूरो बिस्वास बी ह क बो आपणा म बास करै ह अर आपा बी बिकै सागै चालां हां क्युं क बो आपानै खुदकी पबितर आत्मा दिओ ह। 14 परम-पिता आपका बेटानै इ जगत का मिनखा को छुटकारो करबा ताँई भेज्यो। अर म्हें बिनै देख्या अर बिका गुवा बी हां। 15 अर जखो बी इ बातनै मानै ह क, “ईसु परमेसर को बेटो ह,” जणा परमेसर बिकै मांयनै बास करै ह अर बो परमेसर को होज्यावै ह। 16 जंय्यां को परेम परमेसर आपाऊँ करै ह बिनै आपा जाणा हां अर आपा बिपै बिस्वास बी करां हां। परमेसर परेम ह, अर जखो बी मिनख परेम करै ह बो परमेसर म बण्यो रेह्वै ह अर परमेसर बिमै बास करै ह। 17 इऊँ आपणा म परेम साबित होयो ह क, जद न्याय होसी जणा बिस्वास म बण्या रेह्वां, क्युं क आपा बंय्यांई इ दुनिया म जीवन जीवां हां जंय्यांकी मसी जीवन जियो हो। 18 जखो मिनख परेम करै ह बो डरै कोनी क्युं क परेम डरनै दूर करै ह। डर को सागो सजाऊँ ह, इ ताँई जखोबी मिनख डरै ह बिमै परेम कदैई कोनी हो सकै। 19 म्हें इ ताँई परेम करां हां क्युं क परमेसर पेल्या आपणाऊँ परेम कर्यो ह। 20 अर ज आपा खेवां क, “म्हानै परमेसरऊँ परेम ह।” पण मेरा भाईऊँ नफरत ह जणा आपा झूठा हां, क्युं क जि पाड़ोसी भाईड़ानै आपा देखां हां बिऊँई परेम कोनी करां, जणा बि परमेसरऊँ जिनै कदै देख्याई कोनी कंय्यां परेम कर सकां हां? 21 मसी आपानै ओ हुकम दिओ ह क, ज आपा परमेसरऊँ परेम करां हां जणा आपानै पाड़ोसी भाईड़ाऊँ बी परेम करबो चाए। |
(c) 2010-2017, New Life Computer Institute. All rights reserved