1 यहून्ना 3 - जीवन को च्यानणो (सेकावाटी नया नियम की पोथ्या)आपा परमेसर का टाबर हां 1 सोचो परम-पिता आपणाऊँ कतो बेत्ती परेम कर्यो ह, जिऊँ क आपा बिका टाबर खुवा सकां अर सच म आपा हां बी। आ दुनिया परमेसरनै कोनी जाणी आई बजे ह क बा आपानै बी कोनी जाणै। 2 ओ लाडलो, इब आपा परमेसर का टाबर हां, पण आबाळा टेम म आपा काँई होस्यां इकै बारां म आपानै ज्ञान कोनी करायो गयो ह। पण चाए जखोबी हो आपा आ जाणा हां क जद मसी ओज्यु परगट होसी जणा आपा बिकै जंय्यां का होज्यास्यां, क्युं क जंय्यां बो ह बंय्यांई बिनै आपा देखस्यां। 3 अर जखो बी मिनख बिमै आस करमाली ह, बो खुदनै बंय्यांई पबितर राखै जंय्यांकी मसी पबितर ह। 4 पण जखो बी मिनख पाप करै ह, बो परमेसर का हुकमानै कोनी मानै अर परमेसर का हुकमानै नइ मानबोई पाप ह। 5 क्युं क थे आ तो जाणोई हो क मसी मिनखा का पापनै धोबा ताँई आयो , अर आबी जाणो हो क बिकै मांयनै क्युंई पाप कोनी। 6 अर जखोबी मिनख मसीनै मानै ह बो पाप करतो कोनी रेह्वै। अर जखो बी पाप करतो रेह्वै ह बिनै नइ तो मसी को दरसाव मिल्यो ह अर नइ बो मसीनै जाण्यो ह। 7 ओ टाबरो, थे कोई कई भंगर्या म मना आज्यो। क्युं क जखो मिनख धरम का काम करै ह बोई मसी की जंय्यां धरमी ह। 8 जखोबी मिनख पाप करतो रेह्वै ह बो सेतान को ह, क्युं क सेतान जुगादऊँई पाप करतो आयो ह। जणाई तो परमेसर को बेटो परगट होयो जिऊँ क बो सेतान का कामा को नास करदे। 9 जखोबी परमेसर को बेटो बणगो ह बो पाप करतो कोनी रेह्वै। क्युं क बिकै मांयनै मसी बास करै ह अर बो परमेसर को बेटो ह इ ताँई बो पाप करतो कोनी रेह्वै। 10 थे कंय्यां जाण सको हो क कूण परमेसर को बेटो ह अर कूण सेतान को बेटो ह? पण बे मिनख जखा धरम का काम कोनी करै अर आपका पाड़ोसी भाईऊँ परेम कोनी करै, बो पिता-परमेसर क कानिऊँ कोनी। एक दुसरा क सागै प्यार-परेमऊँ रेह्ओ 11 थानै एक दुसरा क सागै प्यार-परेमऊँ रेह्णो चाए क्युं क ओ चोखो समचार थानै सरू मई सुणायो गयो हो। 12 आपानै कैन की जंय्यां कोनी बणणो ह जखो सेतान को हो, जखो आपका भाईड़ानै मार गेर्यो ह। अर बो अंय्यां इ ताँई कर्यो क्युं क बिका खुदका काम तो बुरा हा पण बिका भाई का काम धरम का हा। 13 ओ भाईड़ो थे इ बातऊँ ताजूब मना करो क आ दुनिया थारूँ नफरत करै ह। 14 क्युं क आपा मोतऊँ बचर जीवन पाबा ताँई आग्या हां अर इकी बजे आ ह क आपा भाईड़ाऊँ प्यार-परेम करां हां। अर जखो बी मिनख परेम कोनी करै बो इब बी मोत को गुलाम ह। 15 बे सगळा मिनख जखा खुदका बिस्वासी भाईऊँ नफरत करै ह बे हत्यारा हीं अर थे आ तो जाणोई हो क जखो मिनख हत्यारो ह बिकन अजर-अमर जीवन की आस कोनी। 16 मसी आपणा ताँई आपको जीवन तज दिओ इ बात की बजेऊँई आपा जाण सकां हां क परेम काँई ह। इ ताँई आपानै बी खुदका बिस्वासी भाईड़ा ताँई ज्यान देबानै त्यार रेह्णो चाए। 17 ज थारै मऊँ कोई मिनख सादन सम्पन होवै अर बिका बिस्वासी भाईड़ानै ख्या चिज की जुर्त होवै अर ज बो जुर्तमंद पाड़ोसी भाईड़ा प तरस नइ खावै जणा आपा कंय्यां खे सकां हां क बिकै मांयनै पिता-परमेसर को परेम ह? 18 ओ मेरा टाबरो, आपा बोली अर जबानऊँई प्यार-परेम नइ करां पण ओ प्यार-परेम करमाऊँ अर सचो होणो चाए। 19 अर इऊँ बेरो चालै ह क आपा सचा हां, अर जद आपा परमेसर क सामै जावां जणा आपानै सरमिन्दो कोनी होणो पड़ै। 20 पण ज इकै पाछै बी आपणो हियो आपणा बुरा कामाऊँ सरमिन्दो होवै, जणा आपानै याद राखबो चाए क परमेसर हाल बी आपणा हियाऊँ बडो ह अर बो हर बातनै समजै ह। 21 ओ लाडला भाई-भाणो, ज आपणो हियो आपानै मूरती पूजा नइ करबा बेई दोसी कोनी मानै जणा आपानै परमेसर क सामै सरमिन्दो कोनी होणो पड़ै। 22 अर आपा जोक्यु बिऊँ माँगा हां बो आपानै मिलै ह, क्युं क आपा बोई काम करां हां जखो परमेसरनै भावै ह अर आपा बिका हुकमानै बी माना हां। 23 अर परमेसर को हुकम ओ ह क, आपा बिका बेटा ईसु मसी का नाम प बिस्वास करां अर इकै सागैई ईसु मसी क कह्या गेल एक दुसराऊँ प्यार-परेम करां। 24 अर जखोबी मिनख परमेसर का हुकमानै मानै ह, बिकै मांयनै परमेसर को बास रेह्वै ह अर बो मिनख परमेसर म बण्यो रेह्वै ह। अर पबितर आत्मा की बजेऊँई जखी आपानै दि गई, आ जाण ज्यावां हां क आपणै मांयनै परमेसर को बास ह। |
(c) 2010-2017, New Life Computer Institute. All rights reserved