1 यहून्ना 1 - जीवन को च्यानणो (सेकावाटी नया नियम की पोथ्या)

बचन जीवन ह

^1-2 इ चिठी म म्हें, बि एक की बात करां हां, जिनै बचन बोल्यो गयो ह , जखो क्युबी रच्या जाबाऊँ पेली हो, जखो कदैई नइ खतम होबाळो जीवन देवै ह। म्हें बि अजर-अमर जीवन को हेलो थारै मांयनै पाड़ां हां, जखो परम-पिता क सागै हो अर म्हारै प परगट कर्यो गयो। बो जुगादऊँई हो , पण जद बो मिनख रूप मई धरती प आयो जणा म्हें इनै सुण्या, म्हारी आँख्याऊँ देख्या, अर म्हें खुद बिकै हात अड़ाया।

³ म्हें जोक्यु सुण्या अर देख्या बिको हेलो थारै मांयनै पाड़ां हां, जिऊँ थेबी म्हारै सागै पाँतीवाळ होवो। क्युं क म्हें बी परम-पिता अर बिका बेटा ईसु मसी क सागै पाँतीवाळ हां।

⁴ अर म्हें थानै अ बाता इ ताँई मांडां हां क आपणो राजी होबो पूरो होज्या।

च्यानणा म चालो

⁵ म्हें जखो समचार ईसु मसीऊँ सुण्या हा, बोई थानै सुणावां हां क परमेसर च्यानणो ह अर बिमै चिनोसो बी अँधेरो कोनी ह।

⁶ अर ज आपा खेवां क आपा बिकै सागै चालां हां, पण हाल बी पाप का अँधकार को जीवन जीवां जणा आपा झूठ बोलां हां अर सचनै कोनी माना।

⁷ पण ज आपा च्यानणा म चालां जंय्यांकी बो च्यानणा म चालै ह, जणा आपा बिस्वासी होबा क नातै एक दुसराको सागो देस्यां, अर परमेसर का बेटा ईसु को लोय आपानै आपणा सगळा पापऊँ सुद कर देसी।

⁸ अर ज आपा आ खेवां क म्हें कोई पाप कोनी कर्या, जणा खुदनै धोको देवां हां अर आपा सच कोनी बोलां।

⁹ पण ज आपा परमेसर क सामै खुदका पापनै मानल्या जणा बो आपणा सगळा पाप माफ कर देसी अर सगळी बुरायाऊँ आपानै सुद कर देसी। क्युं क बो बिस्वास जोगो अर न्याय करबाळो ह।

¹⁰ अर ज आपा खेवां क म्हें क्युंई पाप कोनी कर्या जणा आपा परमेसरनै झूठो बतावां हां अर इ बजेऊँ बिको बचन बी आपणा म कोनी।