1 कुरन्थीयो 9 - जीवन को च्यानणो (सेकावाटी नया नियम की पोथ्या)भेजेड़ा चेला की जिमेदारी 1 के म अजाद कोनी हूँ? अर म भेजेड़ो चेलो कोनी के? के मनै आपणा परबु ईसु को दरसाव कोनी होयो? अर के थे बी परबु म मेरै काम की बजेऊँ कोनी हो? 2 ज दुसरा मिनख मनै भेजेड़ो चेलो कोनी मानी जणा बी म थारै ताँई तो भेजेड़ो चेलो हूँ। क्युं क थे परबु म इ बात को सबूत हो क मेरै कनै भेजेड़ा चेला को ओदो ह। 3 अर जखा मिनख मेरी जाच पड़ताळ करबो चावीं हीं बा ताँई मेरो जुबाब ह। 4 के म्हानै ओ हक कोनी क थे म्हारो पेट भरो? 5 अर ज म्हें ब्याईड़ा होवां जणा के म्हानै ओ हक कोनी? जंय्यां दुसरा भेजेड़ा चेला, अर परबु का सगा भायानै अर पतरसनै ह। की बे आपकी बिस्वासी लूगायानै जानै बे ब्या राखी ह बानै जठै बे जावीं हीं बठै लेज्यावीं हीं। 6 अर के मनै अर बरनाबासनै इ जिंदगीनै जीबा ताँई काम करबो चाए? 7 थे बताओ सेना म अंय्यां को कूण मिनख होवै ह जखो खुदका खरचा प एक सिपाई की जंय्यां काम करै? अर अंय्यां को कूण ह जखो खुदका अँगूरा का बाग म अँगूर की बैल उगार बिका अँगूर कोनी खावै? के अंय्यां को बी कोई मिनख ह जखो रेवड़ की रूखाळी कर बाको दुद कोनी पीतो हो? 8 के म अ बाता मिनखा का अधिकारऊँ बोलुँ हूँ? के आ बाता क बारां म सास्तर कोनी खेवै? 9 अर मूसा का नेम-कायदा म मांडेड़ो ह क, “खेती को काम करती टेम बळद को मुंडो मना बांदो।” के आ बात परमेसर बळदा प बोली ह? 10 के बो अंय्यां आपणा बेई कोनी खेवै? ओ आपणा बेई पबितर सास्तर म मांड्यो गयो हो। क्युं क फसल बोबाळो अर लावणी करबाळो क्युं मिलबा की आस मई आप-आपको काम करीं हीं। 11 अर अंय्यांई म्हें बी थारै म आत्मिक बीज बोया हां जणा ज म्हें थारूँ कोई चिज-बस्त की मदद चावां जणा बा के कोई घणी बडी माँग ह? 12 जद दुसरा मिनखनै आ चिजा म पाँती लेबा की अजादि ह जणा के म्हानै बाऊँ बेत्ती कोनी ह? पण म्हें थार प हक कोनी जताया, जदकी म्हें सक्यु भोग्या जिऊँ मसी का चोखा समचारनै कोई अड़चल नइ आवै। 13 के थे ओ जाणो कोनी जखा मिनख मनदर म काम करै ह बे मनदरऊँई पेट भरै ह। अर जखो मनदर की बेदी प चढावो चढावीं हीं बे बि चढावा म पाँतीवाळ ह? 14 अंय्यांई परबु आपानै बी सास्तर म मांडर दिओ ह क चोखा समचार सुणाबाळा मिनखा को घर बी बिऊँ चालबो चाए। 15 पण म तो अंय्यां कोनी कर्यो। अर ना म अंय्यां की कोई बात मांडी जिऊँ थे मेरै ताँई क्युं करो। जि बात को मनै गुमान ह बिनै कोई खोसले इऊँ पेली म मरबो पसंद करस्युं। 16 इ ताँई ज म चोखो समचार सुणाऊँ हूँ जणा इमै मनै गुमान करबा की जुर्त कोनी क्युं क ओ तो मेरो फरज ह। अर ज म चोखा समचार कोनी सुणाऊँ जणा आ बात मेरै ताँई बोळी बुरी ह। 17 अर ज ओ काम म मेरी इंछ्याऊँ करूं हूँ जणा म इको फळ पाबा जोगो हूँ। पण म ओ काम फरज क रूप म करूं हूँ क्युं क परमेसर मनै ओ काम सूप्यो ह। 18 जणा मनै क्याको फळ मिलसी? इ बात को क, चोखा समचार सुणाबा को काम सितमित करूं। बिना मेरा हक को दावो कर्या चोखा समचारनै सुणाबा को काम एक सोभाग ह। 19 म कोई कई बंदण म कोनी जणा पाछै बी म खुदनै सगळा को दास बणा लिओ। जिऊँ म मसी म बोळा मिनखानै जीत सकूँ। 20 अर म यहूदि मिनखा ताँई यहूदि मिनख की जंय्यां बण्यो जिऊँ बानै मसी म ल्या सकूँ। जदकी म यहूदि नेम-कायदा क तळै कोनी हो इकै बावजुद बी म बिनै मान्यो जिऊँ क म बाका हियानै जीत सकूँ। 21 अर जखा गैर-यहूदि मिनख हा बानै मसी म बचाबा ताँई म गैर-यहूदि मिनख की जंय्यां जियो यहूदि नेम-कायदा क बिपरीत। इको मतबल ओ कोनी क म परमेसर का नेम-कायदानै कोनी मानू। नइ, पण म मसी का नेम-कायदा क तळै जिऊँ हूँ। 22 अर म बिस्वास म कमजोर ताँई कमजोर बण्यो जिऊँ म बानै मसी म ल्या सकूँ अर म मिनखा ताँई क्युंना क्युं बण्यो जोक्यु हो सकै हो बो म कर्यो की म बामैऊँ क्युंकनै बचा सकूँ। 23 अर म ओ सक्यु चोखा समचार ताँई करूं हूँ क म दुसरा मिनखा क सागै इमै बाको साती-संगी बण सकूँ। 24 के थे ओ कोनी जाणो दोड़ म तो सगळाई दोड़ीं हीं, पण इनाम तो एकनैई मिलै ह? अर थे बि अंय्यां दोड़ो की जीत सको। 25 अर थे जाणो हो क खेल-कूद म भाग लेबाळा सगळा खिलाड़ी सगळी बाता प खराईऊँ चाली हीं। अर बे तो नास होबाळा मुकटनै पाबा ताँई अंय्यां करै ह, पण आपा बि मुकट ताँई कर्या हां जखो कदैई नास कोनी होबा को। 26 इ ताँई म बी मिनख की जंय्यां दोड़ूँ हूँ जिकै सामै एक मुकाम होवै ह म अँधेरा म तीर कोनी चलाऊँ। 27 पण म तो मेरी कायानै बस म कर मेरै खया म चलाऊँ हूँ, क्युं क कदै अंय्यां नइ हो क म दुसरानै तो परचार करूं पण खुद निकम्मो खुवाऊँ। |
(c) 2010-2017, New Life Computer Institute. All rights reserved