1 कुरन्थीयो 12 - जीवन को च्यानणो (सेकावाटी नया नियम की पोथ्या)

आत्मिक बरदान

¹ मेरा लाडला बिस्वास्यो, म ओ कोनी चाऊँ क थे आत्मिक बरदाना क बारां म नइ जाणो।

² क्युं क थे खुदई जाणो हो क जद थे परमेसरनै नइ ध्यारबाळा हा जणा बिना जीव की मूरत्यानै धोक्या करता हा अर बाकीई लीक पिट्या करता हा।

³ इ ताँई म थानै बताऊँ हूँ जखा मिनख म परमेसर की पबितर आत्मा को बास ह बो कदै बी अंय्यां कोनी खेसी क “ईसु सरापित ह।” अर नइ कोई बिना पबितर आत्मा क अंय्यां खेसी क “ईसुई परबु ह।”

⁴ बरदान तो भात-भात का हीं। पण हीं बि एक पबितर आत्मा का;

⁵ अर सेवा बी कई तर्याऊँ करी जावै ह, पण सेवा तो बि एक परबु की करी जावै ह;

⁶ अर काम करबा की न्यारी-न्यारी चिजा होवै ह पण परमेसर एकई ह जखो सगळानै एक खास काम करबा की काबलीयत देवै ह।

⁷ एक दुसरा की भलाई ताँई पबितर आत्मा खुद हरेक बिस्वासी क जरिए न्यारा-न्यारा तरिकाऊँ परगट होवै ह।

⁸ अर पबितर आत्माऊँ एकनै बुदी भर्यो समचार अर दुसरानै ज्ञान की बाता बोलबा ताँई दि जावै ह।

⁹ अर पबितर आत्माऊँ कोईनै बिस्वास करबा ताँई बरदान अर कोईनै इ पबितर आत्माऊँ निरोगो करबा को बरदान दिओ जावै ह।

¹⁰ जणा कोईनै चमत्कार करबा की सक्‍ति, कोईनै परमेसर की बाता खेबा को बरदान अर कोईनै आत्मानै पिछाण्बा को बरदान। अर कोईनै भात-भात की बोली बोलबा को बरदान अर कोईनै बोली को मतबल बताबा को बरदान दिओ जावै ह।

¹¹ पण अ सगळा काम एक पबितर आत्मा करै ह अर बो जिनै चावै बिनै अ बरदान बाट देवै ह।

काया एक, अंग सेस

¹² जंय्यां काया म भात-भात का अंग होर बी बे मिलर एक काया बणै बंय्यांई मसी बी ह।

¹³ क्युं क आपा सगळा चाए यहूदि हो चाए यूनानी, चाए दास हो, चाए अजाद सगळा एकई पबितर आत्माऊँ एक काया होबा ताँई पबितर आत्मा को बतिस्मो लिओ ह अर आपानै एकई पबितर आत्मा को दान दिओ गयो ह।

¹⁴ क्युं क काया एक अंगऊँ कोनी बणै पण कई अंगाऊँ मिलर बणै ह।

¹⁵ अर ज पग खेवै क, “म हात कोनी इ ताँई मेरो इ कायाऊँ कोई लेणदेण कोनी,” बिकै अंय्यां खेबाऊँ के बो काया को हिस्सो कोनी?

¹⁶ अर ज कान खेबा लागै क, “म आँख कोनी” जणा के बिकै अंय्यां खेबाऊँ बो काया को हिस्सो कोनी?

¹⁷ अर ज सगळी काया आँखई होती जणा सुणता कंय्यां? अर ज सगळी काया कान होती जणा सूँघता कठैऊँ?

¹⁸ पण परमेसर आपकी इंछ्या गेल जंय्यां बो चायो बंय्यांई काया का हरेक हिस्सानै बणायो।

¹⁹ अर ज सगळा हिस्सा एकसा होता जणा काया कठै होती?

²⁰ इ ताँई एक काया क सेस अंग होवै।

²¹ आँख हातऊँ कोनी खे सकै क, “मनै तेरी जुर्त कोनी” अर नइ सीर पगाऊँ खे सकै क, “मनै थारी जुर्त कोनी।”

²² पण काया म अंय्यां का बी अंग ह जखा दुसरा अंगाऊँ कमजोर हीं पण बे ओर बी बेत्ती जरूरी हीं।

²³ अर काया का बे अंग जखा बेत्ती आदर जोगा कोनी बाकी आपा देखभाळ करां हां। अर बा अंगानै जखा दिखाबा जोगा कोनी बानै ढकर राखां हां।

²⁴ आपणा दिखबाळा अंगानै ढकबा की जुर्त कोनी पड़ै पण परमेसर आपणी कायानै इ ढंगऊँ रच्यो क आपणी काया का बा अंगानै जानै आदर की कमी ह बानै बेत्ती आदर मिलै।

²⁵ जिऊँ काया म फूट नइ पड़ै पण काया का अंग आपसरी म एक दुसरा की चिंत्या करै।

²⁶ इ ताँई ज काया को एक अंग दुख पावै जणा बिकै सागै सगळा अंग दुख पावै ह अर ज एक अंगनै मान मिलै ह जणा सगळा अंग बिकै सागै राजी होवीं हीं।

²⁷ अंय्यांई थे सगळा मिलर मसी की काया हो, अर हरेक बिकी काया का अंग हो।

²⁸ अर परमेसर बिस्वासी मंडळी म न्यारा-न्यारा मिनखानै न्यारा-न्यारा पद दिओ ह, पेलानै भेजेड़ा चेला को, दुसरानै परमेसर की बात बताबा को, तीसरानै गरूजी को अर कोईनै चमत्कार का काम करबाको, अर कोईनै निरोगा करबाको, अर कोईनै मदद करबाको, अर कोईनै बेबस्ता करबाको तो कोईनै न्यारी-न्यारी बोली बोलबा को काम सोप्यो ह।

²⁹ के सगळा भेजेड़ा चेला हीं? के सगळा परमेसर की खेबाळा हीं? के सगळा गरूजी हीं? के सगळा चमत्कार का काम करबाळा ही?

³⁰ के सगळानै निरोगो करबा को बरदान मिलेड़ो ह? अर के सगळानै न्यारी-न्यारी बोली बोलबा को? अर के सगळानै न्यारी-न्यारी बोल्या को मतबल समजाबा को बरदान मिल्यो ह?

³¹ जणा थे बडाऊँ बडा बरदानानै पाबा की धुन म रह्यो। जि ताँई म थानै ओर बी चोखो गेलो बताऊँ हूँ।