1 कुरन्थीयो 11 - जीवन को च्यानणो (सेकावाटी नया नियम की पोथ्या)

¹ म मसी की जंय्यां जीबा की कोसिस करूं हूँ, बंय्यांई थे बी करो।

परबु की भगती की टेम लूगाया को सीर ढकबा को रिवाज

² म थारी बडाई करूं हूँ क्युं क म कंय्यांसिक जिऊँ हूँ बिनै थे ध्यान म राखो हो अर मेरी सीख प चालो हो।

³ अर म थानै बताबो चाऊँ हूँ क लूगाई को सीर बिको मोट्यार ह, अर मोट्यार को सीर ईसु मसी ह, अर ईसु मसी को सीर परमेसर ह।

⁴ इ ताँई जखो बी मिनख सीरनै ढकर अरदास करै ह अर परमेसर की बाता खेवै ह बो मसी को निरादर करै ह। क्युं क मसी बिको सीर ह।

⁵ अर जखी लूगाई उघाड़ै सीर अरदास करै ह अर मिनखा क सामै परमेसर की बाता बोलै ह बा आपका मोट्यार को निरादर करै ह जखो बिको सीर ह। अर बा लूगाई बि लूगाई की जंय्यां ह जखी आपका बाळानै कटवा दिनी हो।

⁶ ज कोई लूगाई आपको सीर कोनी ढकै जणा बिनै आपका बाळ कटवा लेणा चाए। अर ज बाळ कटाबो एक लूगाई ताँई निरादर की बात ह जणा बिनै चाए की बा सीर बी ढकै।

⁷ पण मोट्यारनै सीर नइ ढकणो चाए क्युं क बो परमेसर क रूप म परमेसर की मेमा ताँई बणायो गयो ह। पण एक लूगाई आपका मोट्यार की मेमा करै ह।

⁸ क्युं क मोट्यार मऊँ लूगाई निकळी लूगाई मऊँ मोट्यार नइ।

⁹ अर मोट्यार लूगाई ताँई कोनी रच्यो गयो पण लूगाई मोट्यार ताँई रची गई ह।

¹⁰ इ ताँई अर ईस्बर नगरी दुता की बजेऊँ एक लूगाईनै आ दिखाबा ताँई की बा आपका मोट्यार क अधिकार म ह आपको सीर ढकणो चाए।

¹¹ इकै पाछै बी परबु म नइ तो नर नारीऊँ न्यारो ह अर नइ नारी नरऊँ।

¹² क्युं क जंय्यां सऊँ पेली नारी नरऊँ बणाई गई ही बंय्यांई इब नर बी नारी को फळ ह। अर परमेसरई सगळी चिजानै बणायो।

¹³ अर थेई इ बात को फेसलो करो। लूगाई को उघाड़ै सीर परमेसरऊँ अरदास करबो चोखो ह के?

¹⁴ अर थे खुद इ बातनै कोनी जाणो के क एक मिनख को बडा बाळ राखबो बी ताँई निरादर की बात ह,

¹⁵ अर एक लूगाई ताँई बाळ बढाबो स्यान की बात ह? क्युं क बाळ बिनै बिकी ओडणी क रूप म दिआ गया हीं।

¹⁶ पण ज कोई मिनख जिदा-जादि करबो चावै जणा बो आ जाणले की इ रीत क अलावा नइ तो म्हारी अर नइ परमेसर की बिस्वासी मंडळी की ओर कोई रीत ह।

परबुभोज

¹⁷ मेरा आगला आदेसा म थारै ताँई बडाई का बोल कोनी हीं, क्युं क अरदास ताँई थारो एक सागै भेळो होबो भलाई की बजाय नुकसान को कारण होर्यो ह।

¹⁸ पेली बात तो म आ सुण्यो हूँ क जद थे बिस्वासी मंडळी म एक सागै भेळा होवो हो जणा थारै म गुटबाजी होवै ह। अर मनै क्युंक हद ताँई आ बात सची बी लागै ह।

¹⁹ क्युं क इमै कोई सक कोनी क थारै मांयनै मतभेद कोनी, जिऊँ जखा मिनख खरा हीं बे सामै आ सकै।

²⁰ अर जद थे भेळा होवो हो जणा अंय्यां कोनी लागै क सच म परबुभोज खाबा ताँई भेळा होवो हो।

²¹ क्युं क थारै मऊँ क्युंक ओराऊँ पेल्याई पेट भरली हीं जणा घणकरा क क्युंई हात कोनी आवै। अर कई तो अंय्यां का हीं जखा पीर मतवाळा होज्यावीं हीं।

²² खाबा-पीबा ताँई के थारै घर कोनी? नहिस थे परमेसर की बिस्वासी मंडळीनै बेकारई जाणो हो, अर जिकै कनै क्युंई कोनी बानै छोटो जाणो हो? म थारूँ काँई खेऊँ? के म थारी बडाई करूं? पण थे जाणो हो की आ कोनी होवै।

परबुभोज को तरिको

²³ क्युं क आ बात मनै परबुऊँ मिली ह अर इब म आ थानै मांडर्यो हूँ। जि रात परबु ईसु धोकाऊँ पकड़ायो जार्यो हो, जणा बो रोटी ली,

²⁴ अर परमेसरनै धनेवाद देर तोड़ी अर आपका चेलानै खयो, “आ रोटी मेरी काया ह, जखी थारै ताँई ह। अर थे मनै याद करबा ताँई अंय्यांई कर्या करो।”

²⁵ अर अंय्यांई बो रोटी खाबा क पाछै कचोळो लिओ अर खयो, “ओ कचोळो परमेसर को नयो करार ह: जिपै मेरै लोयऊँ म्होर लगाई गई ह। जद बी थे इनै पीओ, जणा मेरी याद म पीआ करो।”

²⁶ इको मतबल ओ ह क परबु क आबा ताँई जद बी थे इ रोटीनै खाओ अर इ कचोळा मऊँ पीओ जणा थे परबु की मोत को हेलो पाड़ो हो।

²⁷ इ ताँई जखो बी मिनख परबु की रोटी अर बिका कचोळा मऊँ गळत रीतऊँ खावै अर पिवै जणा थे परबु की काया अर बिका लोय को निरादर करो हो।

²⁸ इ ताँई थानै चाए क थे इ रोटीनै खाबाऊँ अर इ कचोळा मऊँ पीबाऊँ पेल्या खुदनै जाचो।

²⁹ क्युं क जखो मिनख इनै खाबा अर पीबाऊँ पेल्या परबु की कायानै कोनी जाणै बो इनै खार खुदकै उपर परमेसर की स्यामत ल्यावै ह।

³⁰ अर इ बजेऊँई थारै माला कई कमजोर अर रोगला हीं, अर क्युंक मर बी गया।

³¹ अर ज आपा खुदनै परखां जणा आपणा प परमेसर की स्यामत कोनी पड़ै।

³² पण परबु आपानै सजा देर सुदारबो चावै ह क आपा इ दुनिया क सागै सजानै नइ भोगां।

³³ इ ताँई ओ मेरा लाडला बिस्वास्यो, जद थे खाबा ताँई भेळा होवो जणा एक दुसरानै उडिको।

³⁴ अर ज थारै मऊँ कोई भूखो होवै तो बो आपकै घरा जार खाले, जिऊँ थारो भेळो होबो थारै ताँई स्यामत की बजै नइ बणै। अर जखी बाता रेह्गी बानै म आर ठिक करस्युं।