Ruth 4 - Kenesĭs 1914 Ruth 1932 (Erromanga)

NEVLUGHON NETAIYI 4

¹ Boas yivesah iran nugon selat ra nemote memtesep yui; im pah, numpunaran mori Boas yemenuwi memoku ugi yivelum ra nohoren, miyi yenuwi pugi, memoku, Kik, velungo metesep igko. Miyi yivelumgo memtesep.

² Miyi yevai neteme narowalem ra ov’numpumetuo ra nemote memenuwi punor memoku, Utesep igko. Miror dumutesep.

³ Miyi yenuwi pugi numpunaran memoku, Nehomi, mori yovelum marugi nuru Moab, umampasigi nete nuru mori yete noete eni rapmamsai Elimelak.

⁴ Im yau moku ya kontampnemugkik mahku, Sevasi pe unimind mori umentesep igko muni?-?mind ov numpumetuo ra lo enyau. Nagku kik umagku konsevasigi; pe; tampnemoko?-?yau ma ya kagkili: it tawi sai woresevasigi ko kik wohon, im yau penurok. Miyi yenuwi memoku, Ya konsevasigi.

⁵ Penuri pe Boas yemenuwi memoku, Ra dan konsevasigi nete nuru mori marugi nohoven eni Nehomi, aremai konsevasigi sugku marugi Ruth nasiven Moab, retepon eni mori yemas, worevituksah nin eni neteme nemas ra nuru tampenum eni.

⁶ Im numpunaran yenuwi memoku, Yau tawi faneteme woresevasigi nisekug pe yau, kuntawi ya konumpi ur nuru tampenum enyau: vai pe iram, it yau tawi fanteme.

⁷ It imo netevar eniror ra Israel itetuwai gi nesevasi: neteme yemsuli woravan marugi nowen eni movugi pe iran sai, mimo nam numpuvsok itnesog ra Israel.

⁸ Im numpunaran yenuwi pugi Boas memoku, Sevasi pe nisehon. Miyi yemsuli woravan eni.

⁹ Im Boas yenuwi punor ovun numpumetuo im punor lo omwisu memoku, Ire kimi ov numpuvsok, ma ya kovasigi omwisu mori yete eni Elimelek, momwisu mori yete eni Kilyon, im Mahlon, marugi nohoven eni Nehomi.

¹⁰ Im momu, Ruth nasiven Moab, retepon eni Mahlon, ya kovasi worete retug, worevituksah nin eni neteme nemas ra nuru tampenum eni, kuntawi nin eni neteme nemas konamiap marugi ilevoteven ravensaieme im marugi nugon selat ra nuru eni; kimi ov numpuvsok ire.

¹¹ Lo omwisu mori ra nugon selat mov numpumetuo dumunuwi mumoku, Kam ov numpuvsok. Aremai Novsuromon konumpi nasiven mori kokevelum ra numpon nimo enugkik sugku Retyel im sugku Lia, mori iror duru dumuvituksah savut eni Israel; mevai kik noete ra Efratah im netevote ra Betlehem:

¹² Mete nimo enugkik sugku nimo eni Peres mori Tamar yevai pugi Yuda, marugi novsen mori Novsuromon kampunok gi imo nasiven.

¹³ Im Boas yevai Ruth miyi yetepu retepon eni; miyi yive unesug iran miyi Novsuromon, yovugi nisar netni miyi yisar.

¹⁴ Movasiven dunuwi pugi Nehomi mumoku, Nevaieves Novsuromon, mori kotuowi kik marima im tawi numpunaram; aremai nin eni kante tamas ra Israel.

¹⁵ Miyi kante nisehom neteme worovugkik nomurep im nefinte ra numpumetuo enugkik; it rovugon enugkik mori iyi umnelintugkik ote momu aremai iram ra ov netnime sukrim duru, iyi kokisar iyi.

¹⁶ Im Nehomi yevai nalig mori, memetipe ra nemindugon eni memefinte iyi.

¹⁷ Movasiven ov numpunaran eni dumatov nin eni mumoku, Yisar netni nisekon Nehomi; miror dumatov nin eni mumoku, Obed: iyi itemen eni Yese, itemen eni Devid.

¹⁸ Imosu ovun palsi eni Peres: Peres yeti Hesron;

¹⁹ Hesron yeti Ram, Ram yeti Abinadab;

²⁰ Im Aminadab yeti Nahson, im Nahson yeti Salmon,

²¹ Im Salmon yeti Boas, im Boas yeti Obed;

²² Im Obed yeti Yese, im Yese yeti Devid.