Kenesis 32 - Kenesĭs 1914 Ruth 1932 (Erromanga)

¹ Im Iēkob yĭmnavan ra selat eni, mōvun agelō eni Nōbū dūmevetĭt iran.

² Im Iēkob yenūwi pol sugkū yokes‐ōra, memokū, Imō oti tentūrū eni Nōbū; miyi yatov nin nūrū mori yūi Mahanēĭm.

³ Im Iēkob yĭmtamūl‐ōra ōvun tandekō worōbūm pugi Iso avĭnsī eni, ra nūrū Sier, mori nūrū Idom.

⁴ Miyi yĭmpasewok‐onda memokū, Unūwi nam pugi Iso narisah enyx magkū, Iēkob lĭvsx enugkĭk umanūwi magkū, Yx mipmetĭndōwi ūndū Lēban mafeli nĭmpugon marima.

⁵ Im ya kum mantipe enyx ōvun kūrimatx, mōvun as, mōvun sĭmsĭmak, mōveteme turugat, mōv asiven torugat, ĭm ya okotamūl‐ōra worenūwi pe pugi narisah enyx ma kĭk agesi ves yx.

⁶ Mōvun tandekō mori dōmūvelum pugi Iēkob mō mūnūwi mūmokū, kam live pugi Iso avĭnsī kĭk, miyi umampelum, mōveteme fōr hunder dal iyi worevetĭt iram.

⁷ Im Iēkob yĭmetet tamas mō mefokerarū en tarū eni; miyi yĭmetevafegi gi netevokontū dal iyi, mōvun sĭmsĭmak sū,

⁸ mōvun kamel, ra nugkon en dūrū, mō menūwi memokū, Nagkū Iso ampelum pugi nugkon mō mĭntī, nugkon sī mōmū anti neviēōwara.

⁹ Im Iēkob yenūwi memokū, Ah! Nobū eni Ebraham ĭtemen‐e‐yx, ĭm Nōbū eni Isakĭtem en‐e‐yx, Iehōva mori menūwi po yx mokū, Torĭloki ra nūrū enugkĭk ĭm pun ōra aapmisīeme ĭm ya ampīeves kĭk;

¹⁰ ya otū aremī worevī ūrekĭs marugi togesoveli enugkĭk mĭtnesog omwisū mori sū kĭk movugi lĭvsx enugkĭk, ĭt yx, gi woresentūrū enyx, metumpugones imō Yordan, ĭm marima yx numpūn lō en dūrū.

¹¹ Sĭmsĭmpari irag ya kum mĭntagkolok margui nokoben eni Iso avūgsī: ĭt ya kum mamtetugi iyi, kū en tawi iyi ampelum mō mĭntī yx, ĭm dĭneme dal ōvun nĭtnĭme eni.

¹² Im kĭk, kĭmenūwi memokū, Itnesog ya ampīeves kĭk, mō menumpi novsen enugkĭk sugkū nariven ran tok mori otū nesepi popōwo sikat wokon.

¹³ Miyi yĭmorokote lap yūi ima pūmrok mō mevī ra ov nūrah sū eni, ĭtemas nĭsekon Iso avĭnsī eni;

¹⁴ ōvun nani ĭtōvasiven tū hunder, mĭtōvateman twenti, mōvun pugipugi ĭtōvasiven tū hunder, mĭtōvateman twenti,

¹⁵ mōvun kamel dumpone turti dal ōvun nĭtni en irora, mōvun kūrimatx ĭtōvasiven, mōvun okes ten, mōvun as ĭtōvasiven twenti, mōvun nĭtni en irora ten;

¹⁶ Miyi yĭmetipe irora ra mumpon nokobĭnda ōvun torugat eni, ĭm nugkon‐eme dūtevi natora; miyi yenūwi pun ōra ōvun torugat eni memokū, Ubūm irag, mūtevi natora.

¹⁷ Miyi yĭmpasewugi nugkon mampūm memokū, Pol sugkū Iso avūgsī avetĭt iram, mō mĭntagkelok, magkū, Kĭk ene mē? Kĭmampēa? Irora‐mō ūnĭmtum ene mē?

¹⁸ Pol kĭk anūwĭ magkū, Eni Iēkob līvsx enugkĭk; ĭtemas nĭsekon Iso narisah enyx; ĭm pah, iyi mori kitant.

¹⁹ Miyi yĭmpasewugi nugkon dūrūgi, ĭm deselugi memokū sugkū, momwisū mori dūmūrōra ōvun sĭmsĭmak, Unūwi pugi Iso nĭmpugon wavetĭt iran magkū sugkū ĭmō.

²⁰ Pah, Iēkob lĭvsx enugkĭk oti kitant; ĭt iyi yenūwi memokū, Ya onesoveli iyi ugi ĭtemas mori ya kum tamūli umampūm irag, penūri ya agesi nĭpmi eni:

²¹ kō iyi yorokote lap wi pūmrok dal irora netevokontū eni.

²² Miyi yevsora ima pūmrok mori mō mevī retepon en dūrū eni, mōvun torugat ĭtnasiven en dūrū eni, mōvun nĭtnĭme eleven eni mō mokompogones ĭkeri ra nĭntelep Yabok.

²³ Miyi yĭmtōr‐ōra mō ĭm tamūl‐ōra nugkon‐nū momwi sū eni sugkū.

²⁴ Im Iēkob yeti e ko sī, ĭm dūmalira, iyi Sī mori ūndū iyi mefeli yumti nxevitavū.

²⁵ Miyi yokili memokū otū mĭntantevakepe iran; miyi yisugkori numpūn‐nevan eni, ĭm numpun‐nevan eni Iēkob yiselekon polekū dūmalira.

²⁶ Miyi yenūwi memokū, Tenĭmpe yx, yx mampe, ĭt dan umprokumpi nxevitavū. Miyi yĭmtamsi memokū, Ya otū ontenĭmpe kĭk kū en tawi kampīeves yx.

²⁷ Miyi yĭmtagkeli iyi memokū, Mē nin e kĭk? Miyi yĭmtamsi pugi memokū, Iēkob.

²⁸ Miyi yōmenūwi pugi memokū, kotū onatov nin magkū Iēkob, kō, Isrēel, ĭt kĭk sī Novsūromon ūndū Nōbū, ĭm dal irora ōveteme, ĭm kĭmĭntantevakepe.

²⁹ Im Iēkob yoĭmtagkeli memokū, ya kum mĭntagkolok, Enuwi po yx nin e kĭk. Miyi yōmenūwi memokū, Irantiē kĭk emĭntagkeli, magkū ugi nin enyx? Miyi yivīeves iyi yūi.

³⁰ Im Iēkob yatov nin nūrū i yūi memokū Peniel; memokū, ĭt ya okesi nĭpmi eni Nōbū, mō meti neviēōwara nomūrep enyx.

³¹ Miyi yavan‐go Penūel, ĭm nĭpmĭnen yĭmtūok, miyi yitovsok ugi numpūn‐nevan eni;

³² mōveteme Isrēel ūtūm neni ra narep ra numpūn‐nevan mori yĭmsalekelekon mafeli imōn dan, popōwo Iyi mori yĭmsugkori narep ra numpūn‐nevan eni Iēkōb mori yĭmsalekelekon.