Yoane 18 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Iesū yemenūwi imo nam mempe dal ōvun nūrie eni nugkon nūmpe nentelep Kedron, sī denūok yūi, miyi yive ūnisog, mōvun nūrie eni dal.

² Im Yūdas mori yem-pirĭgi Iyi yemokili nūrū, ĭt Iesū yemorun semsimokonda dal ōvun nūrie eni yūi.

³ Im Yūdas yempī telienlō mōvun nivūo marokonda ōvun tavsogi horog mōvun Faresi, mūmūvelum yūi ugi ōvun nilūo mōvun lamp, mōvun nirum.

⁴ Im popōwo Iesū yemokili siamesū mori wampelum iran, Iyi yivelah memtagkelora, memokū, kumnesorugi niē? Irora dūmūnūwi mūmōkū, Iesū neteme Nasaret.

⁵ Iesū yemenūwi punora memokū, yaū.

⁶ Yūdas mori yempirīgi Iyi yemetūrū dal irora. Pol sugkū Iyi yemenūwi punora memokū, Yaū, irora dūmavan kitanda mūroūmol ra nemap.

⁷ Miyi yōĭmtagkelora, memokū, kūmnesorugi me? Mirora dūmūnūwi, mūmōkū, Iesū neteme Nasaret.

⁸ Iesū yōmenūwi, memokū, Ya onūwi pugkūm mokū, yaū; nagkū, kūmnesorokoyaū, Uwi iroramo wampe;

⁹ worokompeli nam mori Iyi yemenūwi, memokū, Ya otūviugki si ra irora mori kĭmovoyaū.

¹⁰ Sīmon Piter yemasenduri naūetūgi eni memtantevi telugon meves eni lĭvsaū eni tavsogi tumpora, Nin eni lĭvsaū mori, Malkus.

¹¹ Im Iesū yemenūwi pugi Piter, memokū, Etipe naūetūga enugkĭk ra mumpon vēwon; kup mori Itemeneyaū ovoyaū, ya amoneki, kū?

¹² Telienlō mori, miyi Narisah enirora, mōvūn nivūo enirora oveteme Isrēel,

¹³ dūmūlekavi Iesū mūiti, mūmūtōri pugi Anas mampūm, ĭt iyi ĭtemakesi eni Kēafas tavsogi horog ra nevi mori.

¹⁴ Kēafas mori yemenūavsokonda ōveteme Isrēel, memokū aremī sī neteme amas woretampnemokonda ōvun netevokontū.

¹⁵ Im Sīmon Piter yemūri Iesū, ĭm sī mōmū nūrie mori tavsogi horog yemokili; miyi yive ūndū Iesū ūnisog silebok eni tavsogi horog. Piter yemetūrū ran tan bukitampet ratilat.

¹⁶ Im nūrie mori tavsogi horog yemokili, yive ilat, memenūwi pugi nasiven mori yemavles ra bukitampet memtōri Piter ūnisog.

¹⁷ Nesiven mori yemavles ra būkitampet yemenūwi pugi Piter, memokū, Kĭk sī ra irora ōvun nūrie eni neteme mori, kū?

¹⁸ Iyi yemenūwi memokū, Tawi. Mōvun lĭvsaū, mōvun nivūo dūmūtūrū mūtovuni nom ugi potmelevag popōwo dūmūteponta mirora, dūmūrugum; ĭm Piter yemetūrū dal, memorugum.

¹⁹ Tavsogi horog yemtagkeli Iesū memokū ugi ovun nurie eni, mugi nam tavsogi eni.

²⁰ Iesū yemtamsi memenūwi pugi, memokū. Yaū menūwi ūniminda ōvetemesū; nempugonsū yaūĭmtavosokonda ra mumpon ōvun nimo tavsogi, ĭm nimo tumpora, yūi oveteme Isrēel ūmesemsimokonda dansū; yaū metūnūwi vamon sī nam.

²¹ Kĭmentagkoloyaū, irasie? tagkelora mori dūmūrĭgi nam yaūmenūwi punora; irora ūmnentemi nam yaū menūwi.

²² Im pol sugkū Iyi yemenūwi imo, sī ra irora ōvūn nivūō mori yemtūrū potipot, yemtī Iesū gi mumpon nokoven, memenūwi, memokū, Kĭk emanūwi sugkū, pugi tavsogi horog, kū?

²³ Iesū yemenūwi pugi, memokū, Nagkū ya onūwi sat, umpūvsok ugi sat mori; kō, nagkū aremī, irantie kementīyaū?

²⁴ Im Anas yemtamūli iyi nēeti pugi Kēafas tavsogi horog.

²⁵ Sīmon Piter yemetūrū memorūgum. Mirora dūmūtagkeli mūmōkū, Kĭk sī ra irora ōvun nūrie eni, kū? Iyi yōmenūaveni memenūwi, memokū, Tawi.

²⁶ Sī ra irora ōvun lĭvsaū eni tavsogi horog, Piter yemtantevi telugon eni aven, yemenūwi, memokū, Ya okesok ran denūok ūndū iyi, kū?

²⁷ Piter yōmenūaveni; marimago netūo yemasora.

²⁸ Mirora dūmūtōri Iesū marugi Kēafas ūnisog nimo worūrian. Yumti dan; mirora oveteme Isrēel, dūtūve ūnisog nimo mori, ma sugkū ūtūwampĭ nelilūo iranda, ĭt irora dūmōkū woneni paska.

²⁹ Im Pīlat yive ilat punora, memtagkelora memokū,

³⁰ Sie kūvievri iran imo neteme? Mirora dūmūtamsi mūmūnūwi, mūmōkū, Nagkū iyi tawi narekĭndi ka pūtūtamūli punok.

³¹ Pīlat yemenūwi punora, memokū, Kĭmi, ūvi iyi mūrian iran sugkū nam alam enugkĭmi. Oveteme Isrēel dūmūnūwi pugi mūmōkū, Nam alam enugkĭmi umanūali pugkam worevīpelah nomūrep eni sī;

³² ma sugkū onekompeli nam Iesū yemenūwi, memokū nokowo Iyi amas.

³³ Pīlat yōĭmpe ūnisog nimo worūrian, movrugi Iesū memtagkeli memokū, Kĭk Natemonok ra nūsian enirora ōveteme Isrēel, kū?

³⁴ Iesū yemtagkeli, memokū, Kĭk osepen tagkeli imo, kū? kū oveteme ūnūwi punok mokū sugkū ugi yaū, kū?

³⁵ Pīlat yemtamsi memenūwi, memokū, Yaū, neteme Isrēel, kū? Lō enugkĭk, mōvun tavsogi horog ūtamūlok poyaū; sie kĭk umpi?

³⁶ Iesū yemenūwi pugi, memokū, Lō enyaū ūtumne ra nemap Nagkū lō enyaū ūmne ra nemap ōvun torugat enyaū patekĭsah mūmōkū oveteme ūtūosenteriyaū punora oveteme Isrēel. Kō, lō enyaū marima tawi sugku sī lō ra nemap.

³⁷ Im Pīlat yōmenūwi pugi, memokū, Im kĭk sī Natemonok ra nūsian, kū? Iesū yemenūwi, memokū, Kĭk onūwives. Yaū mumprokomol ĭm yaūĭmpelum ra nemap worumpūvsok ugi itnesog. Irorasū mori ūmnelintugi itnesog umandĭgi naviag. Pīlat yemtagkeli memokū, Itnesog sie?

³⁸ Im pol sugkū iyi yemenūwi imo, yōĭmpe ilat punora oveteme Isrēel, memenūwi punora, memokū, Ya otūmagesi sī sat iran.

³⁹ Kō, ra nempugon paska kĭmi kūmesūli sī kūmagkū ugi; kūmagkū ya osūli mē? Ya osūli nisekomi Natemonok enirora oveteme Isrēel, kū?

⁴⁰ Irora omwisū dūōmovrugisah, mūmōkū, Tawi iyi, kō, Barabas. Im Barabas neteme torefora.