Yoane 17 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Iesū yemenūwi imosū memelasah ra pokōp memenūwi, memokū, Nate, nempugon okovelum; umpi nilasilaswi iran Netum ma Netum onumpi nilasilaswi iram;

² ĭt kĭmovugi iyi nempasewugi iranda oveteme omwisū, memokū Iyi ampunorasū nomūrep ūbrūni mori kĭmovugi Iyi.

³ Im imo nomūrep ūbrūni ma irora wagkilok, Nōbū itnesog siteven, ĭm Iesū Krĭstō mori kĭratamūli.

⁴ Ya umnumpi nilasilaswi iram ra nemap; ya umnokompelisū numpūrah mori kimenūwi memokū ya onumpi.

⁵ Im marima, Ah Nate, umpi nilasilaswi irag ūndū kĭk, ugi nilasilaswi mori yaū mepĭmpĭ irag ūndū kĭk, pol sugkū tawi natipotnin nemap.

⁶ Ya umanūatumpene nin enugkĭk punora oveteme mori kemovoyaū ra nemap; irora dūmūte enugkĭk ĭm kĭmovoyaū irora; mirora umnalekoleki nam enugkĭk.

⁷ Marima irora umagkili ma omwisū mori kĭmovoyaū dūpmumne marug kĭk;

⁸ popōwo nam mori kemepmovoyaū, yaū movunora, mirora ūvĭ mūmagkili ma yaūĭmpelum memne ra kĭk mūmuntavnirĭgi ma kĭmtamūli yaū.

⁹ Ya umnufwaki memagkū ugi irora; ya otūmnufwaki memagkū ugi ōvetemesū ra nemap, ugi irora wokon mori kĭmovoyaū; ĭt irora enugkĭk.

¹⁰ Im siamesū omwisū enyaū, enugkĭk; im siamesū enugkĭk enyaū,

¹¹ ĭm ya umumpī nilasilaswi irag ra irora, Ya otūante ra nemap, irora umante ra nemap, ĭm ya umampelah punok. Nate tumpora, efĭnte irora ra nin enugkĭk, mori kĭmovoyaū, ma irora wanti siteven sugkū kos.

¹² Nempugon yaū dal irora ra nemap ya umafĭnte irora ra nin enugkĭk. Ya umafĭnte irora mori kĭmovoyaū, im tawi sī ra irora umampiugki, kō, iyi netemĭndi mori umampiugki; worokompeli nam ra mumpon ōvun netiyi tumpora.

¹³ Im marima ya umampelum punok; imo ya umanūwi ra nemap, memagkū irora wonavos ugi navos enyaū.

¹⁴ Yaū movunora nam enugkĭk ĭm nemap dūmakan punora, popōwo irora dūtūmne ra nemap, sugkū yaū metūmne ra nemap.

¹⁵ Ya otūmnesenugkĭk memagkū kampī irora marugi nemap, ya umagkū kafĭnte irora marugi sat sū.

¹⁶ Irora dūtūmne ra nemap, sugkū yaū metūmne ra nemap.

¹⁷ Umpi irora sentevives wokon ūnōwanda ugi nam itnesog enugkĭk; nam enugkĭk itnesog.

¹⁸ Kĭmtamūli yaū ra nemap, ĭm ya umentamūlora ra nemap sugkū.

¹⁹ Ya umasepen numpi yaū tumpora popōwo ugi irora; ma irora wanti tumpora sugkū ra ĭtnesog.

²⁰ Im ya otūmnufwaki memagkū ugi iroramo wokon; ya umagkū ugi irorasū sugkū mori wontavnirigi yaū ugi nam enirora;

²¹ ma irora omwisū wanti siteven sugkū kĭk Itemen ra mumpon yaū, ĭm yaū ra mumpon kĭk, ma irora sugkū wanti siteven ra mumpon kos, ma nemap wontavnirigi kīmtamūliyaū.

²² Im nilasilawsi mori kĭmovoyaū, yaū movunora; ma irora wanti sīteven sugkū kos kūmante siteven;

²³ yaū ra mumpon irora ĭm kĭk ra mumpon yaū, ma irora warapūtokonda; ma sugkū nemap wagkili kĭmtamūli yaū, memelintokonda, sugkū kĭmnelintokoyaū.

²⁴ Nate, ya umagkū aremī ma irora mori kĭmovoyaū wante dal yaū ra nūrū ya antewi, ma irora wagesi nilasilaswi enyaū, mori kĭmovo yaū; it kĭmelintokoyaū pol sugkū tawi natipotnin nemap.

²⁵ Ah Nate tanepōves nemap ūtūmagkilok; kō, ya umagkilok; miroramo ūmagkili ma kĭmtamūli yaū.

²⁶ Im yaū raenūatumpene nin enugkĭk punora; ĭm ya ōmanūatumpene; ma sugkū nelintugi mori kĭmelintokoyaū ugi antendōwi ūnisog irora, ĭm vaū ra mumpon irora.