Yoane 14 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Utūyēōmpele ūnōwami. Utavnirigi iran Nōbū, mūtavnirĭgi yaū sugkū.

² Unisog nimo eni Itemen yaū ōvun silebōkeves sikat, nagkū tawi sugkū, yaū penūwi pugkūm. Ya umampe woresiman sī nūrū nisekomi.

³ Im nagkū ya ampe woresiman sī nūrū nisekomi, ya umampelum mampi kimi dal yaū;

⁴ ĭm ra nūrū yaū, kimi yūi sugkū; im kĭmi kūmagkili nūrū mori ya umampewi, im kimi kūmagkili selat.

⁵ Tomas yemenūwi pugi, memokū, Novsuromon, ka keletūmlagkili nūrū kĭk emampewi, ĭm ka kelagkili selat nokowo?

⁶ Iesū yemenūwi pugi memokū, Yaū selat, mĭtnesog, ĭm nomūrep. Iyi sī umampelum pugi Itemen umampelum ugi yaū wokon. Nagkū kĭmi pūkili yaū, kĭmi pūkili Itemen enyaū sugkū.

⁷ Marugi nempugon marima kĭmi kūmagkili Iyi, mūmagesi.

⁸ Fĭlĭp yemenūwi pugi, memokū, Novsūromon, sesi pugkam iyi Itemen, ĭm ka keletūlentagkelok mōmū.

⁹ Iesū yemtagkeli, memokū, Fĭlĭp, Yaū dal kĭmi nempugon tantop, ĭm kĭk otūmagkili yaū kū? Iyi sī okesi yau, okesi Itemen; ĭm kĭk eminūwi memagkū, sesi pugkam iyi Itemen, nokowo?

¹⁰ Kĭk ōtūmentavnirĭgi ma yaū ra mumpon Itemen, miyi Itemen ra mumpon yaū, kū? nam mori ya umanūwi pugkūm ya otūmasepen nenūwi; Iyi Itemen mori umantendōwi ra mumpon yaū, Iyi mori umnumpi ōvun numpūrah.

¹¹ Utavnirĭgi yaū, ma yaū ra mumpon Itemen, miyi Itemen ra mumpon yaū; ĭm nagkū tawi, ūtavnirĭgi yaū popōwo ugi ōvnumpūrah mori.

¹² Itnesog, ĭtnesog, ya umanūwi pugkūm, memagkū, iyi sī umentavnirĭgi yaū, ōvun numpūrah ya umnumpi iyi onumpi sugkū, miyi onumpi mōmū horog ra imosū, popōwo ya umampe pugi Itemen.

¹³ Im sīsesī kĭmi kwonesenĭgi magkū ra nin enyaū, ya onumpi, ma iyi Itemen ampi nilasilaswi iran ugi Netni.

¹⁴ Nagkū kĭmi kwonesenĭgi sīsesī magkū ra nin enyaū, ya onumpi.

¹⁵ Nagkū kĭmi kūmnelintoko yaū, walekoleki ōvun nempasewugisū enyaū.

¹⁶ Im ya onesenĭgi Itemen, miyi ampugkūm sī mōmū Nempari nevĭeves woretendowi dal kĭmi ūvūm nevisū.

¹⁷ Iyi mori Naviat ĭtnesog ra nemap tawi faneteme worevi iyi, popōwo ūtū magesi iyi mōmūtūkili iyi kō, kĭmi kūmagkili Iyi, ĭt iyi umante dal kĭmi, miyi antendōwi iramī.

¹⁸ Ya ōtūawi kimi ōvun neviumpūwi; ya umampelum pugkūm.

¹⁹ Nempugon virok ĭm nemap otūōmagkesi yaū; kō, kimi kūmagkos yaū; popōwo ya umnomūrep kĭmi sugkū kwamūrep.

²⁰ Ra nempugon mori kĭmi kwagkili ma yaū ra mumpon Itemen yaū, ĭm kĭmi ra mumpon yaū, ĭm yaū ra mumpon kĭmi.

²¹ Iyi sī umumpī ōvun nempasewugi enyaū, memalekolekisū, iyi mori umnelintokoyaū; miyi sī umnelintokoyaū, Itemen enyaū onelintugi iyi, ĭm ya onelintugi memesepen sesi yaū pugi.

²² Yūdas, tawi Iskariot, yemenūwi pugi memokū, Novsūromon, kĭk asepen sesi kĭk pugkam, ĭm tawi punora ra nemap, nokowo imo sugkū?

²³ Iesū yemtamsi memenūwi pugi, memokū, Nagkū sī umnelintokoyaū iyi onalekoleki nam enyaū; ĭm Itemen enyaū onelintugi iyi ĭm ka kūampelum pugi, ĭm ka kūantendōwi dal iyi.

²⁴ Iyi sī otūmnelintugi yaū otūmnalekoleki nam enyaū. Im imo nam kūmandĭgi, tawi enyaū, eni Itemen mori yemtamūli yaū.

²⁵ Ya umanūwi imo pugkūm nempugon yaū dal kĭmi.

²⁶ Miyi Nempari nevĭeves, Naviat tumpora, mori Itemen ontamūli ra nin enyaū, Iyi mori ontavsokūm ugi siamesū, menumpi kĭmi worentemi siamesū ya umanūwi pugkūm.

²⁷ Ninparata ya awi pugkūm ninparata enyaū ya umampugkūm. Ya otumampugkūm sugkū ōveteme ra nemap. Utūyēōmpeli ūnōwami, ūtūmtetugi, kĭmi kūrĭgi mori ya onūwi pugkūm, mokū, ya umampe, ĭm ya umampelum pugkūm.

²⁸ Nagkū kĭmi polintokoyaū, kĭmi pavos popōwo ya onūwi, mokū, ya umampe pugi Itemen; popōwo iyi Itemene yaū, mōmū horog irag.

²⁹ Im ya umanūwi pe pugkūm marima, pol sugku otūvelum, ma kĭmi kwontavnirĭgi pol sugkū ampelum.

³⁰ Penuri imo ya otūanūwi nam tantop pugkūm; popōwo iyi Narisah ra imo nemap umampelum miyi otūagesi sīsesī eni ūnisog yaū.

³¹ Kō, ma Nemap wagkili ma ya umnelintugi Itemen; ĭm ya umnumpi sugkū Itemen yempasewokoyaū, Utūok; kos kelampe.