Yoane 12 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Dansū sikes pol sugkū dūtūumpi narigari mori, Iesū yivelum mafeli ra Betani, yūi Lasarus mori yimaswi, mori Iyi yemtōrisah marugi nemás.

² Mirora dūmumpi sī narĭgari nĭsekon; ĭm Marta yemtavini, Lasarus sī ra irora mori dūmūtesĭgi dal Iyi.

³ Im Mēri yivi dumpon ves, aremī wokon, sī paūn, yemali ugi ōvun nurah nempen ves, memavūi ra nōwon eni Iesū memsentevi noan ugi novlĭmpū numpūn; memovūarugi ra nimo ugi nempen ves marugi dumpon mori.

⁴ Im sī ra irora ōvun nūrie eni, Yūdas Iskariot, netni eni Sīmon, mori yemempirigi Iyi, yemtagkelora, memokū,

⁵ Irasie otūvasi imo dumpon ves ugi ōvun peni tri hunder, woretavūrakwokonda ōvun narumkor?

⁶ Miyi yemenūwi imo tawi popōwo magkū ugi numpeleves isen nisekonda ōvun narumkor, kō, popōwo iyi neteme numprok, memafĭnte vēyū enirora, memuriukisū dūmūtipe ra mumpon.

⁷ Im Iesū yemenūwi, memokū, Owi iyi; iyi yefĭnte imo nimsin tenumiyaū.

⁸ Ovun narumkor dal kĭmi ĭndōwi; kō, ya otūantendowi dal kĭmi ĭndōwi.

⁹ Im sikat oveteme Isrēel, numpūn lō tamas, dūmūkili ma Iyi yūi; mirora dūmūvelum, tawi popōwo ugi Iesū wokon, kō dūmōkū, wagesi Lasarus sugkū, neteme mori yemtorisah marugi nemás.

¹⁰ Kō, ōvun tavsogi horog dūmaūorugi, mūmōkū irora wontalugi Lasarus sugkū;

¹¹ popōwo ugi iyi ōveteme Isrēel sikat dumūwi irora mūmūtavnirigi iran Iesū.

¹² Rat mran numpūn lō tamas mori dūmūvelum ra narigari tumpora mūmūrigi ma Iesū unprokovelum ra Yerūsalem, dūmūvī ōvun nugkelen nē pam,

¹³ mūmūve worevtĭt iran, mumūnūwisah, Hosana; Nevīeves Iyi mori umampelum ra nin eni Novsūromon; Natemonōk ra nūsian enirora ōveteme Isrēel.

¹⁴ Iesū yemokesi sī as mori yetūtalam, memetesep ran tan sugkū pemetĭyi, memokū, Itnumpokon ra Sīon, etūmtetugi;

¹⁵ okesi Natemonōk ra nūsian enugkĭk umampelum, memantesep ran tan netni as.

¹⁶ Mōvun nūrie eni, ra nempugon mori, dūmūmgīugi imo; kō, pol sugkū Iesū yōmĭntorĭmpe ra nilasilaswi eni irora dūmuntemi nam yemetīyi, memokū sugkū ugi Iyi; mirora dūmumpi imosū nisekon.

¹⁷ Mirora ra numpūn lō dal Iyi dūmumpūvsok iran mūmūnūwi, mūmōkū, Iyi yemovrugi Lasarus marugi velitenemi, memtorisah marugi nemás.

¹⁸ Im popōwo imo sugkū numpūn lō mori dūmūvtĭt iran, ĭt irora dumūrĭgi ma Iyi yemumpi imo numpūrah horog.

¹⁹ Popōwo imo sugkū, ōvun Faresi dūmūsepennenūwi punora mūmōkū, Okesi, kimi kūtūmuntanevakepe ugi sī; ōvetemesū ūmnūri Iyi.

²⁰ Im dal irora mori dūmūsah mūmōkū wontevita ra narĭgari, nugkon ōveteme Krik.

²¹ Irora mori dūmūvelum pugi Fĭlĭp, neteme Betsīda, ra Kalĭli, mūmūnūwi pugi, mūmōkū, Natemonok, kakĭmlenakīugi worokesi Iesū.

²² Fĭlĭp yivelum menienūwi pugi Anderū; penūri Anderū ĭm Fĭlĭp dūmūnūwi pugi Iesū.

²³ Im Iesū yemenūwi punora, memokū, Okovelum nempugon woretipe nilasilaswi iran Netni eni neteme.

²⁴ Itnesog, itnesog, ya umanūwi pugkūm, memagkū, sī novsen korn amol ra nemap, ĭm nagkū otūamas onalē wokon; kō, nagkū amas ontali mōmampūo sikat.

²⁵ Iyi sī umneliutugi nomūrep eni, ampiugki; miyi sī umnakan pugi nomūrep eni ra imo nemap afinte mafeli ra nomūrep ūbrūni.

²⁶ Nagkū sī umagkū iyi ontorugat irag, aremī iyi onampelesi irag; ĭm ra nūrū yaū yūi, iyi lĭvsaū enyaū yūi sugkū. Im nagkū sī olĭvsaū irag, Itemene yaū antipe nilaswi iran. Marima naviat enyaū umandĭgi sat.

²⁷ Im ya anūwi magkū sie? Nate, eviyaūēōwara marugi imo nempugon, kū? Ko, popōwo ugi imo ya okovelum mafeli imo nempugon.

²⁸ Ah, Nate, umpi nilasilaswi iran nin enugkĭk. Popōwo ugi imo, sī navian yivelum, yemne ra pokōp memenūwi, memokū, Ya umpi nilasilaswi iran nin enyaū, ĭm ya omenumpi nilasilaswi iran.

²⁹ Mōveteme mori dūmūtūrū mūmūrigi, dūmūnūwi mumokū, Yōwara; ĭm nugkoneme dūmūnūwi, mūmōkū,

³⁰ Sī nagelō onūwi pugi, Iesū yemenūwi, memokū, Imo navian otūvelum popōwo ugi yaū, kō, popōwo ugi kĭmi.

³¹ Nūrian ugi imo nemap marima; marima ontevelĭguni narisah ra imo nemap.

³² Im yaū, nagkū wandiukisah yaū marugi nemap, ya onereveni omwisū poyaū.

³³ Iyi yemenūwi imo, memokū nokowo Iyi amas.

³⁴ Numpūn lō dūmūtamsi, mūmūnūwi pugi mūmōkū, Ka kelorigi nam ra mumpon ōvun nempasewugi, memokū, Krĭstō umante ūvūm nevisū. Kĭk emanūwi memagkū, Wandiukisah Netni eni neteme, nokowo? Mēiyi imo Netni eni neteme?

³⁵ Iesū yōmenūwi punora memokū, Nempugon virok mōmū miyi Nilara antelap dal kĭmi. Wavan ranempugon Nilara mori umante dal kĭmi, kū nelebokevat ampelum irami; popōwo iyi sī mori umnavan ra nelebōkevat otūmagkili iyi umampēa.

³⁶ Nempugon iyi Nilara dal kĭmi, ūtavnirĭgi Nilara, ma sugkū kĭmi kwanti ōvun netnime Nilara. Iesū yemenūwi imo mōĭmpe mesepen namon marokonda.

³⁷ Iyi yemnumpi ōvun numpūrah horog sikat ūnimĭnda, kō irora dūtūtavnirĭgi Iyi;

³⁸ ma sugkū wonampesog nam eni Isēya profet, mori yemenūwi, memokū, Novsūromon, mē umentavnirĭgi nam enugkam? Osesi pugi mē nelepon nokoven eni Novsūro mon?

³⁹ Popōwo ugi imo irora dūtūfaneteme wontavnirĭgi, ĭt Isēya yōmenūwi, memokū,

⁴⁰ Iyi osumpat niminda, momumpi nōwanda nugkugko, Ma sugkū ūtūagesi ugi niminda, Mūtūagkili ūnōwanda, Mūtūontorĭleki, Ma sugkū ya amkororĭgives.

⁴¹ Isēya yemenūwi imo, ĭt iyi yemelavenūri nilasilaswi eni memenūwi memokū ugi Iyi.

⁴² Kō, sikat ra irora ōvun natemonok ra nūsian dūmūtavnirĭgi Iyi; mirora dūtūnūatumpene Iyi, popōwo ugi ōvun Faresi, ma sugkū ūtūontevelĭgunora marugi nimo tavsogi;

⁴³ ĭt irora dūmolintugi nevietevisep enirora oveteme mōmū ra nevietevisep eni Nōbū.

⁴⁴ Iesū yemtorenūwisah, memokū, Iyi sī umentavnirĭgi yaū, otūmuntavnirĭgi yaū, kō iran Iyi mori yemtamūli yaū.

⁴⁵ Miyi sī ūmagesi yaū umagesi Iyi mori yemtamūli yaū.

⁴⁶ Yaūĭmpelum Nilara ra nemap, ma iyi sī umentavnirĭgi yaū otūantendōwi ra nelebokevat.

⁴⁷ Im nagkū sī umandĭgi nam enyaū metūmentavnirĭgi, ya otūmnūrian iran; ĭt yaū metūvelum worūrian iranda oveteme, kō, worumkorēōwara.

⁴⁸ Iyi sī mori umesatevokoyaū, metūmumpĭ nani enyaū, umante sī mori onūrian iran. Nam mori ya umanūwi onūrian iran ran dan nisah.

⁴⁹ Popōwo ya otūsepen nenūwi; Iyi Itemen mori yemtamūli yaū yemovoyaū nempasewugi, memokū ugi nam mori ya umentavsokonda, memanūwi.

⁵⁰ Im ya umagkili ma nempasewugi eni nomūrep ūbrūni. Popōwo imo sugkū, nam mori ya umanūwi, ya umanūwi memagkū sugkū Itemen yepmenūwi poyaū.