Yoane 11 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Sī neteme, nin eni Lasarus, neteme Betani, yamarat; nimote mori eni Mēri ĭm Marta, avensi eni,

² Mēri mori yemavūi Novsūromon ugi dumpon ves, memesentevi noan eni ugi novlĭmpū numpūn, ĭm man Lasarus yamarat.

³ Revevenme endūrū dūmūtamūli pugi Novsūromon mūmūnūwi mūmōkū, Novsūromon, iyi mori kemnelintugi umnamarat

⁴ Iesū yemorigi memenūwi, memokū, Imo namarat tawi ugi nemás kō, nĭmsĭn nilasilaswi eni Nōbū, ma Netni eni Nōbū, ampi nilasilaswi iran popōwo ugi.

⁵ Im Iesū yemelintugi Marta, ĭm avensi eni, ĭm Lasarus.

⁶ Im pol sugkū yemorigi iyi yamarat Iyi yemorokotelap dan dūrū ra nūrū mori Iyi yemetewi.

⁷ Penūri imo Iyi yemenūwi punora ōvun nūrie eni, memokū, Kos loĭmlampe ra Yūdia.

⁸ Mōvun nūrie dūmūnūwi pugi mūmōkū, Rabi, oveteme Isrēel dūmosorugi mūmōkū wantevok ugi nevat, ĭm kĭk ōmampe yūi kū?

⁹ Iesū yemenūwi, memokū, Ovun nugkon twelv ra sī dan, kū? Nagkū sī umnavan ra nempugon dan iyi otumuntamsal, popōwo iyi umagesi nilara ra imo nemap.

¹⁰ Kō, nagkū sī umnavan pūmrok iyi umosiīevo, popōwo tawi nilara ūnisog iyi.

¹¹ Iyi yemenūwi imo, mōmenūwi punora, memokū, Avetsī umnalēpo; kō, ya umampe menōiugi.

¹² Ovun nūrie eni dūmūnūwi, mūmōkū, Novsūromon, Nagkū iyi umnalēpo, ampiēōwara iyi.

¹³ Kō Iesū yemenūwi memokū ugi nemás eni; ko irora dūmōkū Iyi yemenūwi memokū ugi nalēpo wokon.

¹⁴ Iesū yemenūwisū punora, memokū, Lasarus okemas.

¹⁵ Im ya umnavos popōwo ugi kĭmi, ma sugkū kimi kwontavnirĭgi, ma yaū tawi yūi.

¹⁶ Kō, kos kelampe pugi. Im Tomas nalĭg eni Dĭdĭmus, yemenūwi punora ōvun nūrie mori, memokū, kos kelampe, kos sū, eĭm lamas dal Iyi.

¹⁷ Im Iesū yivelum memokesi iyi yemale ra velitenemi dan devat.

¹⁸ Betani potipot Yerūsalem, ĭsūt sugkū mīl endūrū.

¹⁹ Im sikat oveteme Isrēel dūpmūvelum pugi Marta ĭm Mēri woretugi, popōwo ugi man.

²⁰ Im pol sugkū Marta yemorigi ma Iesū umprokevelum, iyi yempelah mevtit iran, kō Mēri yemetendōwi ūnisog nimo.

²¹ Marta yemenūwi pugi Iesū, memokū, Novsūromon, nagkū kĭpimante igko, manūg petūmas.

²² Kō, ya umagkili ma Nōbū ampunok marima sīsesĭ kĭk onesenĭgi Nōbū magkū ugi.

²³ Iesū yemenūwi pugi, memokū, Manum ōmamsor marugi nemas.

²⁴ Marta yōmenūwi pugi, memokū, Ya umagkili ma iyi ōmontūok marugi nemás ran dan nisah.

²⁵ Iesū yōmenūwi pugi, memokū, Nevsorasah marugi nemás, ĭm nomūrep, ūmamne ra yaū; iyi sī umentavnirĭgi yaū, nagkū iyi okomas, kō, iyi ōmamūrep.

²⁶ Miyi sī umnomūrep mementavnirĭgi yaū, otūamas. Kĭk ementavnirĭgi imo, kū?

²⁷ Marta yemenūwi pugi memokū, Monokowo, Novsūromon, ya umentavnirĭgi ma kĭk Krĭstō, Netni eni Nōbū, kokevelum ra nemap.

²⁸ Im pol sugkū iyi yemenūwi imo, iyi yivelah, memovrugi vamon Mēri avensi eni, memenūwi, memokū, Tavsogi igko, umamperug kĭk.

²⁹ Im pol sugkū iyi yemorigi, marimago iyi yemtūok mempe pugi.

³⁰ Iesū yetūvelum mafeli ūntemne, yemorokotelap ra nūrū mori Marta yemevtĭt iran.

³¹ Mōveteme Isrēel mori dūmūte dal iyi ūnisog nimo, mūmageri dal, dūmōkesi Mēri yemtūok itnum mempe ilat, mūmūri, mūmūnūwi, mūmōkū, Iyi umampe ra velitenemi worageri yūi.

³² Im pol sugkū Mēri yivelum ra nūrū mori Iesū yemetelapwi memokesi, iyi yumol ra nōan eni, memenūwi pugi memokū, Novsūromon, nagkū kĭpimante igko manūg petūmas.

³³ Popōwo imo sugkū, pol sugkū Iesū yemokesi ma iyi yemnageri, mōveteme Isrēel mori dūmūri dūmageri, Iyi yemesesorū ūnisog naviat eni,

³⁴ memesepen yēōmpeli Iyi memtagkelora memokū, Ia kūtenemia? Mirora dūmūnūwi pugi mūmōkū, Novsuromon, elum, mokesi.

³⁵ Iesū yemageri. Mōveteme Isrēel dūmūnūwi mūmōkū,

³⁶ Ah Iyi olintugi iyi tamas.

³⁷ Kō, nugkon ra irora dūmūnūwi, mūmōkū, Iyi mori yeratīpelah nipmi eni neteme nĭmtipat tawi faneteme worefinte imo neteme marugi nemas, kū?

³⁸ Popōwo imo sugkū Iesū yōmesesora ūnōwan, mempelum ra velitenemi, veli, ĭm nevat yemsumpat. Iesū yemenūwi, memokū, Uvīpelah nevat.

³⁹ Marta, veven neteme mori yimas, yemenūwi pugi, memokū, Novsūromon, Iyi umampen sat popōwo dan devat iran.

⁴⁰ Iesū yemtagkeli memokū, Ya onūwi punok mokū, nagkū kĭk ontavnirigi kagesi nilasilaswi eni Nōbū, kū?

⁴¹ Mirora dūmūvīpelah nevat mori marugi nūrū neteme yimas yemale. Im Iesū yemelasah, memenūwi, memokū, Nate ya umnumpalugi iram popōwo kĭk orĭgi yaū.

⁴² Im ya umagkili ma kĭk emandĭgi yaū indōwi; kō popōwo ugi numpūnlō mori umantūrū igko ya onūwi, ma irora wontavnirĭgi ma kĭmtamūliyaū.

⁴³ Im pol sūgkū Iyi yemenūwi imo Iyi yemovrugi gi naviansah, memokū, Lasarus, elum ilat.

⁴⁴ Miyi mori yimas yivelum ilat, dūmovsen nokoven ĭm nōan eni ugi ōvun nevlugkon némas, dūmūseni nipmi ugi sī némas. Iesū yemenūwi punora, memokū, Usūli iyi woravan.

⁴⁵ Sikat ra irora ōveteme Isrēel mori dūmūvelum pugi Mēri mūmōkesi imo Iesū yemumpi, dūmūtavnirĭgi Iyi.

⁴⁶ Kō, nugkon ra irora dūmūve punora ōvun Faresi, mūmūnūwi punora imo mori Iesū yemumpi.

⁴⁷ Popōwo imo sugkū, ōvun tavsogi horog, mōvun Faresi dūmūsemsimokonda mūmaūorugi, mūmūsepen tagkelora, mūmōkū, Sie kos kĭmlenumpi? Popōwo imo neteme mori umnumpi ōvun numpūrah horog sikat.

⁴⁸ Nagkū kos kelawi sugkū, omwisū wontavnirigi Iyi; mōveteme Rōm wampelum mampi lō ĭm nūrū enugkos.

⁴⁹ Im sī ra irora, Kaifas, tavsogi horog ra nevi mori, yemenūwi punora, memokū, Kĭmi kūtūmagkili sīsesī;

⁵⁰ kūtūmuntarū ma aremī nĭsekont ma sī neteme amas woretampnemokonda ōvun netevokontū, ma savūtasū soret ūtūonamiap.

⁵¹ Miyi yetūsepen nenūwi imo; kō, iyi tavsogi horog ra nevi mori, yepmenūwi imo nam pugi ugi Naviat,

⁵² memokū, Iesū amas woretampnemokonda lō Isrēel, ĭm tawi woretampnemokonda imo lō wokon, kō yemokū osemsimokonda ōvun netnime eni Nōbū; marugi nūrūsū dūmnaseviokonda, ra semsimak siteven.

⁵³ Popōwo imo sugkū, marugi dan mori irora dūmaūorugi mūmōkū wontalugi.

⁵⁴ Im popōwo imo isugkū Iesū yetūōmavan ūnimĭnda ōveteme Isrēel; Iyi yivelah, memōwi nūrū yūi, ra nokorin nūrū wokon, ra sĭti, nin Efraĭm. Miyi yemetelap yūi dal ōvun nūrie eni.

⁵⁵ Paska enirora ōveteme Isrēel yemumpotipot; ĭm sikat mori dūmne ra nimotesū dūmūsah ra Yerūsalem worevī sentevives pol sugkū nempugon paska yetūvelum.

⁵⁶ Mirora dūmosorugi Iesū, mūmūsepen nenūwi punora mūmōkū, pol sugkū irora dūmūtūrū ūnisog nimo tumpora, kūmagkū sie? Iyi ampelum ra narĭgari, kū?

⁵⁷ Mōvun tavsogi horog, mōvun Faresi, dūmūmpasewokonda, mūmōkū, nagkū sī neteme agkili nurū Iyi yemetewi, anūatūmpeni Iyi, ma sugkū irora wonelekavi.