Yoane 10 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Itnesog, ĭtnesog, ya ūmanū wi pugkum, memagkū, Iyi sī ōtūmĭntorĭmpe ra bukitampet ra nempĭ ra ōvun pugipugi, kō umesuki tantop, iyi neteme numprok im torefora.

² Iyi sī umĭntorĭmpe ra bukitampet, iyi nefĭnte ōvun pugipugi;

³ ĭm nivūo ra bukitampet umentipelah iran. Mōvun pugipugi umandĭgi navian; miyi umamperokonda ōvun pugipugi eni, ugi nĭnda, mementōrora ilat.

⁴ Im pol sugkū iyi otipe ōvun pugipugi eni ra sī nūrū, iyi umampūm iranda, mōvun pugipugi mori umnūri iyi, popōwo irora umagkili navian eni.

⁵ Mirora ūtūonūri sī dōmō, kō, wonalo marugi, popōwo irora ūtūmagkili navian enirora ōvun dōmō.

⁶ Iesū yemenūwi imo parabel punora; kō, irora dūmūmgiugi imo mori Iyi yemenūwi punora.

⁷ Popōwo imo sugkū Iesū yōmenūwi punora, memokū, Itnesog, ĭtnesog, ya umanūwi pugkūm, memagkū, Yaū bukitampet ra ōvun pugipugi.

⁸ Omwisū mori dūpmūbūm irag ōvun numprok, mōvun torefora; kō, ōvun pugipugi dūtūrĭgora.

⁹ Yaū bukitampet mori; nagkū sī onĭntorĭmpe ra yaū ampiēōwara iyi; miyi ampe ūnisog mōmamtūratumpene ilat, magesi nevag.

¹⁰ Neteme numprok umampelum worumprokugi, montalugi, wagkini; yaūĭmpelūm memokū irora wampī nomūrep, nomūrep ūbrūni.

¹¹ Yaū neteme navles aremi enirora ōvun pugipugi. Iyi nefĭnte aremī umampugi nomūrep eni woretampnemokonda ōvun pugipugi.

¹² Kō iyi sī umnafīnte ōvun pugipugi popōwo ugi nipmi eni, im tawi sugkū nefĭnte ĭtnesog popōwo ōvun pugipugi tawi eni, umagesi, wūlf umampelum, miyi awi ōvun pugipugi menalō; miyi wūlf umelekavi irora memnaseviokonda ōvun pugipugi.

¹³ Iyi mori umnafīnte ugi nĭpmi wokon, umnalo popōwo iyi tawi nefĭnte ĭtnesog, metūmagkū ugi ōvun pugipugi.

¹⁴ Yaū Nefĭnte aremī enirora ōvun pugipugi, ĭm ya umagkilora enyaū, mirorasū mori enyaū umagkili yaū.

¹⁵ Iyi Itemen umagkili yaū, ĭm ya umagkili Iyi sugkū. Im ya umampugi nomūrep enyaū woretampnemokonda ōvun pugipugi.

¹⁶ Ovun pugipugi enyaū mōmū, irora tawi ra mumpon imo nempī irora mori, ya ontorora sugkū;

¹⁷ mirora wandigi naviag, manti semsimak siteven, im Neteme nefĭnte siteven. Popōwo imo sugkū, Itemen umnelintokoyaū, popōwo ya umasepen novugi nomūrep enyaū ma sugkū ya ōmampī.

¹⁸ Tawi sī umampi marokoyaū, ya umasepen nōwi. Yaūĭmpi nempasewugi woresepen nōwi; ĭm yaūĭmpī nempasewugi worōmampĭ. Yaūĭmpī imo nempasewugi marugi Itemen enyaū.

¹⁹ Mōveteme Isrēel dūōmūtūyavwora popōwo ugi imo nam,

²⁰ Im sikat ra irora dūmūnūwi, mūmōkū, sī diabolo iran, miyi umamlū; irantie kūmandĭgi iyi?

²¹ Nugkondeme dūmūnūwi, mūmōkū, Imo tawi nam eni sī neteme nemlū. Sī naviatindi faneteme woretīpelah nĭpmĭnda enirora ōvun nĭmtipat, kū?

²² Ra Yerūsalem, ra sī narigari, ĭm nempugon ra nakas;

²³ ĭm Iesū yemavan ra silebōkeves eni Solomon, ra mumpon nimo tumpora.

²⁴ Mōveteme Isrēel dūmūteteliugi Iyi, mūmūnūwi pugi, mūmōkū, kĭk onumpi kam worokilisevat mafeli nigoi? nagkū kĭk Krĭstō enūatumpene pugkam omwisū.

²⁵ Iesū yemenūwi punora, memokū, Ya onūwi pugkūm, ĭm kĭmĭ, kūtūmuntavnirĭgi. Ovun numpūrah mori ya umnumpi memagkū ra nin eni Itemen enyaū, imosū umnumpūvsok irag.

²⁶ Kō, kĭmi kūtūmuntavnirigi, ĭt kĭmi tawi ōvun pugipugi enyaū.

²⁷ Sugkū ya onūwi pugkūm, mokū, Ovun pugipugi enyaū umandĭgi naviag, ĭm ya umagkilora, mirora ūmnūri yaū;

²⁸ ĭm ya umampunora nomūrep ūbrūni; mirora ūtūonamiap; ĭm tawi sī oneforewokonda marugi nokovūg.

²⁹ Itemen enyaū, mori yemovoyaū, Iyi ra nūsiangosū; ĭm tawi sī faneteme woreforewokonda marugi nokoven eni Itemen enyaū.

³⁰ Yaū ĭm Itemen siteven.

³¹ Mōveteme Isrēel dūrūmsi nevat mūmōkū wantevi

³² Iesū yemtagkelora, memokū, Ya osesi pugkūm ōvun numpūrah horog ĭm aremī, sikat, marugi Itemene yaū; popōwo ugi ĭtokowo kūmagkū kwantovoyaū?

³³ Oveteme Isrēel dūmūtamsi mūmūnūwi, mūmōkū, Tawi popōwo ugi numpūrah aremi ka kĭmlantevok; kō, popōwo ugi nam sat; kĭk mori neteme wokon, kemanūwi memagkū kĭk Nōbū.

³⁴ Iesū yōmenūwi punora, memokū, Yemetīyi nam ra mumpon ōvun nempasewugisū enugkĭmi, memokū, Yaū, menūwi memokū, kĭmi ōvun nōbū.

³⁵ Im nagkū Iyi yemenūwi memokū, irora mori nam eni Nōbū, yivelum punora, ōvun nōbū, motūoyukuyeki imo nam, kĭmi kūmanūwi ugi iyi mori Itemen yemumpi memokū tumpora,

³⁶ memtamūli ra nemap, kĭk emanūwi nam sat, popōwo ya onūwi mokū, yaū Netni eni Nōbū, kū?

³⁷ Nagkū ya otūmnumpi ōvun numpūrah eni Itemen enyaū, ūtūtavnirĭgi yaū;

³⁸ kō, nagkū ya umnumpi sugkū, nagkū kĭmi kūtūontavnirĭgi yaū, ūtavnirĭgi ōvun numpūrah mori, ma kĭmi kwagkili montavnirĭgi ma iyi Itemen ra mumpon yaū, ĭm yaū ra mumpon Itemen.

³⁹ Mirora dūōmosorugi mūmōkū wonelekavi Iyi, miyi yelevi nokovenda,

⁴⁰ mōĭmpe nugkon nūmpe Yordan, ra nūrū Yōane yemumbabtiso mampum; miyi yemetendōwi yūi.

⁴¹ Im sikat dūmūvelum pugi yūi, mūmūnūwi, mūmōkū, Yōane yetūumpi sī numpūrah horog; kō, siamesū mori Yōane yemenūwi memokū ugi imo neteme itnesog.

⁴² Im sikat dūmūtavnirĭgi Iyi yūi.