Yakobo 2 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Ravugsieme, ūtūtarūgi mampum sie ĭm sie nō wanda ōveteme ma kwonumpalugi iranda kĭmi, kō ūtarūgi mampūm ĭm ute ūnam ra tavniri eni Iesū Krĭsto Novsuromon ra nilasilaswi.

² Popōwo nagku ampelum ra semsimak enugkimi sī neteme umevī kold rig ra nokoven, ĭm mevīugi iyi ra nemas nilasewi, ĭm ampelum sī neteme norumkor umevevīugi ugi nemas ūr;

³ ĭm kĭmi kūmūseseves iran iyi umevīugi nemas aremī, ĭm manuwi pugi, memagkū, Etesep igko kĭk ra nūrū aremīwi ĭm pugi neteme norumkor, memokū, kantūr nimpe kĭk, kū etesep ra nakoren woretipe nowog;

⁴ ĭm kĭmi tawi ugi tarū endūrū ūnōwamī kĭmi kū, ĭm ōvun nurian nimpiri ra tarū enugkimi kū?

⁵ Urigi, ravūgsīeme paū; kĭmi kūmagkili ma Nōbū yemtampolora mori ovunnorumkor ra siame ra nemap woreti ōvun nōēte ra tavniri, ĭm woreti ōvun tampenum ra lō mori yepmenūwi ugi nisekonda mori ūmnelintugi iyi.

⁶ Ko, kĭmi kūmumpi nugkugko iran neteme norumkor. Oveteme nōēte ūmnumpi nugkugko irami, mōmūyevekūm ra potnumputūō nūrian.

⁷ Im irora ūmanūwi nin aremī mori umamperugkūm ugi ra nam sat enirora.

⁸ Kō nagku kĭmi kwonekompeli nam alam narigi aremīwi, sugkū mori dūmūtīyi, memokū, Konelintugi neteme ran temne sū umbotibot iram sugkū kĭk pe kĭk kwonumpi aremī kĭmi:

⁹ kō nagkū kwonumpi sī ĭm sī ra sesieves enugkĭmi nisekonda ōveteme, kĭmi kūmumpi sat, ĭm nam alam umanūwi irami sugkū ōvun nareki nam.

¹⁰ Popōwo nagkū sī onekompeli nam alam omwisū, mō mareki ra sie sī siteven siugi pe, iyi umnowarepatevi ugi omwisū.

¹¹ Popōwo iyi mori yemokū, kōtū mentampalau, yemonūwi sugkū, kōtū montalugi. Kō nagkū kĭmetūi tampalaū, kō kotalugi sī, ĭtnesog kĭm areki nam alam.

¹² Aremī ōvun nam, ĭm ōvun numpi enugkĭmi, wante sugkū irora mori wanūwi nūrian nisekonda ra nam alam mori umesūlives ugi nemolsep ĭm tanepo.

¹³ Iyi mori otum numpi nelintugi wonurian iyi ĭm tawi nelintugi nisekon: popōwo nelintugi umentantevakepe iran nurian.

¹⁴ Ravūgsīeme, sie aremī nisekon, nagku sī neteme anūwi, magkū, ya um tavniri, ĭm tawi sī numpurak isen ugi pe? imo tavniri wokon isen amkorēyōwara iyi kū?

¹⁵ Nagku sī neteme, ĭtnateman, kū itnasiven, ĭm tawi sī nemas isen,

¹⁶ ĭm tawi nevag, ĭm sī irami anūwi punora, magkū. Uve ra ninparata, ūte ra navos ugi nevag ĭm nemas; ĭm kūmūovunora imosū siame aremī nimsin nokolisiran; ĭm sie aremī ugi?

¹⁷ Im sugkū tavniri, nagkū tawi numpūrak, oti nemas wokon ra iyi pe iyi.

¹⁸ Kō, nigoi sī anūwi, magkū, kĭko tavniri, kō yaum numpūrak: sesi po yaū tavniri wokon enugkĭk kĭmetū torugat, ĭm yaū ya onesesi punok tavniri enyaū ugi numpūrak enyaū.

¹⁹ Kĭkem tavniri magkū umante Nōbū siteven; kĭmanūwives, ōvun naviatĭndi umentavniri sugkū, mōmampekorakora.

²⁰ Kĭk kagkili kū? Ah neteme numgi, memagkū, tavniri enugkĭk oti numlat nagkū tawi numpurak.

²¹ Yeti tanepo Ebraham itement kū? ugi numpūrak, polsugkū yemetinimpe Isak netni isen ra nefate worete sakrefis.

²² Kĭk okesi, memagkū tavniri isen yemtorugat ugi numpūrak, ĭm ugi numpūrak yemumpi aremī wokon tavniri;

²³ ĭm yemapesog nam mori yetinenūwi, memokū, Im Ebraham yemtavniri iran Nōbū, ĭm yetinenūwi nisekon, memagkū, tanepoves isen; ĭm dūmatovnin iyi, magkū, avin eni Nōbū kĭmi.

²⁴ Kūmagesi ma ōvun numpūrak umnumpi neteme tanepo, kō tawi ugi tavniri wokon.

²⁵ Im sugkū, Rēhab mori nasiven tori yempī tanepo ugi numpūrak mori yemumpi, mori yevi ōveteme mori dūtamūlora worakos, mōĭmtamūlora pelah ra selat sī.

²⁶ Im sugkū, nokolisiran oti mas nagkū tawi naviat, ĭm tavniri sugkū, oti mas nagku tawi numpūrak.