Netiyi Eni Pol Apostol Punora Oveteme Rom 15 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Aremai kos ōvun torugat wontarū nisekonda ōvun netromora, metū tarū ugi kos pe kos.

² Aremai ma kos sū kos kelen umpalug iranda ōvun numpūnarant ugi imo mori aremai,

³ ĭm umnumpi aremai ugi pe. Popōwo Kristo sugkū yetū tarū nisekon iyi pe iyi: kō, sugkū umnetaiyi ugi, memagkū, Ovun tavūntan sat enirora dūmūtavūntan iram dūmūte irag yaū.

⁴ Popōwo tiame sū dūmūtaiyi ĭtetūwai dūmūtaiyi nimsin woretavsogkos, ma nagkū ugi nemolsep ra nakaiugi ĭm nelugelugives ugi ōvun netaiyi tumpora, kos kwampai ratevet ūwi ūnōwant.

⁵ Im aremai ma iyi Nōbū nelintugi ĭm nelugelugives ampūgkūm woretarū tarū saiteven pugkūm kĭmigo sugkū ugi Iesū Kristo:

⁶ memagkū kĭmi ugi nōwami saiteven ugi nogumi saiteven umpi nilasilasewi Nōbū

⁷ Itemen eni Novsūromon Iesū Kristo enugkos. Popōwo pe ūvai kĭmi ūnōwami kĭmigo, sugkū Krĭsto yemevai kĭmi, sugkū pugi nilasilasewi eni Nōbū.

⁸ Popōwo ya magkū yemumpi Kristo lĭvsaū ra surkumsion popōwo ugi nam itnesog eni Nōbū, magkū ugi nam ĭtnesog eni Nōbū, magkū iyi onumpi ūnam ōvun nam dūmūnūatumpeni pun ora ōvun retaiseme,

⁹ ĭm ma ōvun lō pelah wonumpi nilasilasewi iran Nōbū popōwo ugi togesoveli isen; sugkū dūmūtaiyi, memagkū, Popōwo pe ya onumpalugi iram pun ora ōvun lō pelah, Im ya onesemsi numplin nin enugkĭk.

¹⁰ Im iyi ūmagkū mōmū memagkū, Wavos kĭmi, ōvun Ityentail, ūndū lō isen.

¹¹ Im sai mōmū, Wumpalug iran Novsūromon, kĭmi sū Lō Ityentail; Im wonumpalugi iran oveteme omwisū wonumpalug iran.

¹² Im, Iaisēah ūmagkū Wante noatnin eni Jesse, Im iyi mori umentūōk worare iranda ōvun Ityentail; Iran iyi ōvun Ityentail wontesūwai.

¹³ Im Nōbū ugi ratevetūwi umpi ūvūwarugi nōwami ugi navosavos ĭm ninparata ra tavnirigi, ma kwon nenum ugi ratevetūwi, ra horog eni Naviat Tumpora.

¹⁴ Im yaū pe yaū sugkū yakum magkili ugi kĭmi, ravūgsaieme, ma kĭmi pe kĭmi oti ūvwarugi numpeleves, ūvwarugi ōvun nelekon omwisū, ĭm faneteme woresitū irami kĭmi ugi nam aremai.

¹⁵ Kō yakum netaiyi mōmū horog pugkūm mōmūgo, sugkū ma kĭmi kwon enteme kĭmi, popōwo ugi ĭtemas paū mori Nōbū yemovoyaū,

¹⁶ ma ya ante lĭvsaū eni Iesū Kristo pun ora lō Ityentail, worenūatokeli nam navosavos eni Nōbū, ma sakrefais—memagkū Ityentail—ante aremai, popōwo ugi numpūrak eni Naviat Tumpora.

¹⁷ Im popōwo pe sugkū ya okevai nilasilaswi enyaū ra Iesū Kristo ugi tiame isen Nōbū.

¹⁸ Popōwo ya otū atekisah worenūwi ugi siame sie sai kō pe imosū mori Kristo yemupi ugi numpūrak mori yakum numpi, nimsin tavniri isenda ōvun lō pelah sai, ugi torenūwi pe nam,

¹⁹ ĭm numpūrak, ugi horog ra ōvun safi ĭm navlugi, ra horog eni Naviat Tumpora; ma sugkū marugi Yerūsalem, ĭm magkaū ugi Illerikum, yoim torenūwi sū nam navosavos eni Krĭstō;

²⁰ aremai, yaū ĭm atekisah woretorenūwisah nam navos, tawi iye mori dūmūrigi ugi nin eni Krĭstō, ma ya otū umpi nimo ra nokolugi nimo mori mē sai neteme yemumpi;

²¹ kō sugkū umnetaiyi, Irora wagesi, mori yetuvelum pon ora nam ugi iyi. Im irora mori dūturigi mafeli marima wonelav-enūri.

²² Im popōwo pe itnesog ugi imo yeti nugkugko irag worevelum pugkūm: kō marima,

²³ popōwo tawi saimomū nūrū nisekūg ra nūrū sū imo sū, ĭm popōwo ugi nakaiugi tamas enyaū ra imosū nevisū worevelum pugkūm,

²⁴ ra nempugon mori ya ampe Spēen (popōwo ya magkū ya agkosekūm ra navan enyaū, ĭm ma kwontori yaū ra selat kĭmi, nagku mam-pūm ya amdigi aremai ugi netevarū enugkimi ra

²⁵ selat)—kō marima, ya magkū, ya ampe Yerūsalem, woretorugat iranda ōvun tanepo.

²⁶ Popōwo ōveteme Masedonea ĭm Akea dūmakaiugi woresemsi sai nelintugi nisekonda ōvun norumkora mori ūmante dalirora ovun tanepo ra Yerūsalem. Im itnesog, irora dūmakaiugi worumpi sugkū;

²⁷ ĭm irora dūmokū irora ūmuntampenum ugi pe. Popōwo nagkū ōvun lō pelah dūmūvai ōvun tiame nimsin nomurep naviat dal irora, ĭt oti aremai ma irora worelintokonda ugi ōvun sie ra nemap.

²⁸ Im popōwo pe polsugkū yakum okompli sū imo su, mō mumpi ūnam imo nelintugi ya ampelum pugkūm, penūri ya ampe Spēen.

²⁹ Im yakum magkili polsugkū ya ampelum pugkum, ya ampelum ra horog ra nevaieves eni Kristo.

³⁰ Im yakum nesenugkūm, ravūgsaiēme ra Iesū Krĭstō Novsūromon enugkos, ĭm ugi nelintugi eni Naviat,

³¹ ma kwonesitū iragkĭmi ra nosenug enugkĭmi pugi Nōbū; memagkū osemsempari yaū morokonda ra Yūdia mori ūtūm mentavnirigi, ĭm ma numpūrak imo enyaū nisekon Yerūsalem ante

³² aremai ūniminda ōvun tanepo ma ya ampelum pugkum ra navos ugi tarū eni Nōbū, ĭm ma dal kĭmi ya ampai nemindog.

³³ Antemante dal kĭmi omwisū ninparata eni Nōbū. Amen.