Netiyi Eni Pol Apostol Punora Oveteme Rom 11 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Im popōwo yakum magkū, It Nōbū yemtafugi ōveteme isen kū? Eyin tawi. It yaū, yaū sugkū neteme Isrēel, ugi novsen eni Ebraham, ĭm savūtasū isen Benyōmen.

² Nōbū yetū tafogi ōveteme isen mori yepmovūm mūkilora. Kū kūmūtū kili kĭmi nam mori dūmūtīyi ugi Elīya? mori nokowo iyi yemesenigi Nōbū iranda lō Isrēel, memokū,

³ Pah Novsūromon, irora dūmūtalokonda ōvun profet, dūmokeli talepasi ōvun nefate tumpora enugkĭk: ĭm ya umante, yaū ko sī, mirora ūmagkū woretalokoyaū.

⁴ Kō Nōbū umentamsi pugi memagkū sie? Ya otipe, mori umante nisekūg seven taūsen oveteme, mori dūtū sumpūneterin pugi Bēel.

⁵ Im popōwo pe sugkū ra imo nĭmpugon marima umante nugkon virok yetin tampolora ugi ĭtemas paū.

⁶ Kō nagkū ugi ĭtemas pau, ĭt tawi mōmū ugi ōvun numpūrak: kū entawi ĭtemas paū tawi mōmū ĭtemas paū.

⁷ Nagkū sie? Sie mori lō Isrēel dūmosorugi, dūtūvī tawi;

⁸ kō ōvun tampoli dūmūvī, ĭm nugkon dūte nugkugko: sugkū yetin netiyi, Nōbū yemovunora naviat numgol; niminda kō dūtokesi, telugonda kō dūtūrĭgi, mafeli imon dan.

⁹ Im Dēvĭd yemokū, Aremī tēbel enirora ante snēr, ĭm trap, Im sugkū netakeli, ĭm tampenigi iranda:

¹⁰ Aremī ante nēi niminda, ma sugkū irora ūtū wagesi, Im kumpi nagkaū tanda indowi.

¹¹ Im yakum magkū, Irora dūmūtakeli ma sugkū irora wamol? Eyin tawi sugkū: kō ugi nomol enirora nēyōwara okovelum punora lō sū pelah sī, worumpi nowanda naraki ugi.

¹² Im nagkū oveteme ra nemap wampi noete ugi nomol enirora, ĭm okeni enirora nimsin noete enirora lō pelah sī; mōmū tamas mōmū nevi omwisū enirora?

¹³ Kō yakum manūwi pugkum, kĭmi mori lō pelah sī. Popōwo ĭt yaū sī apostol isenda lō pelah sī, ĭm ya amnavos ugi imo torugat enyaū:

¹⁴ nagkū ugi natekisah horog ya anoiokonda ōvun numpūnarag mō mampēyōwara nugkon ra irora.

¹⁵ It popōwo nagkū wosatevokonda ugi oti sugkū nemolsep ūnowanda lō sū lō sū, ante sugkū sie netovorugi, nomūrep ma vugi nemas pe nokowo?

¹⁶ Im nagkū oti tumpora novwan yovum, fan omwisū oti tumpora sugkū: ĭm nagkū ĭt tumpora noatnin, ōvun dugon tumpora sugkū.

¹⁷ Kō nagkū dūmūtantevisep nugkon ōvun dugon, ĭm kĭm eti olev nagon, kĭk, dūmūtūte iram dal iranda, ĭm kĭm pī dal irora marugi noatnin ĭm dumponves ra ne olev; etū avos ugi nakan enugkĭk ugi ōvun dugon:

¹⁸ kō nagku kon avosavos, ĭt tawi kĭm evī noatnin, kō noatnin yivi kĭk.

¹⁹ Kō kagkū, Dūmareki ōvun dugon marugi, ma antūte yaū iran tevtev.

²⁰ Aremī; popōwo ugi netū tavnirĭgi enirora dūmareki—wokonda, ĭm kĭm ante ugi tavniri enugkĭk. Etūte ugi nugkugko ūnōwam, kō emtetugi kĭk:

²¹ popōwo nagkū Nōbū yetū umkorēyōwara ōvun dugon itnesog (Isrēelĭ, iyi) otū umkumēyōywar sugkū.

²² Okesi nelintugi ĭm nugkugko eni Nōbū: punora dūmumol, nugkugko; kō tovunok, nelintugi nevīeves eni Nōbū, nagkū kante ūnam ra nelintugi isen: nagkū tawi, kĭk antin tantevi sep.

²³ Im irora sugkū nagkū irora ūtū wantĭndowi ra netū tavnirigi enirora, wantin netūti irora tevtev: popōwo Nōbū faneteme woromen netūte irora.

²⁴ Im nagkū dūmorovok marugi imo oti ugi netevarū isen ne olev nagon, ĭm dūmūtūte kĭk tawi sugkū netevarū ugi numpi isen ra sī ne olev aremī: mōmū tamas mōmū wantin netūte irora, mori ōvun dugon itnesog, iran nē olev enirora?

²⁵ Popōwo ravūgsīeme, ya otū akīugi ma kwamnīugi imo umesesĭgi ugi, kū entawi kum magkū kĭmi ōvun nelekon, memagkū nugkugko mōmūgo okovelum iranda lō Isrēel, mafeli wantin torora omwisū lō sū pelah sī; ĭm sugkū lō Isrēel antin nēyōwara:

²⁶ sugkū yetin letiyi, Amne marugi Sīon Neteme semsempari, Iyi osumpat numpindi isenda savūta Yēkob morokonda:

²⁷ Im imo nam unam enyaū punora, Pol sugkū ya ampī pelah ōvun satindi enirora.

²⁸ Popōwo ugi nam navosavos, irora novsin popōwo ugi kĭmi: kō ugi tampoli ugi, irora ōvun nelintugi popōwo ugi itemend.

²⁹ Popōwo Nōbū otū mentarū tarū ugi ōvun itemas paū isen ĭm ōvun novrugi iranda ōveteme.

³⁰ Im popōwo etūwĭ kĭmi kūmūtū sendiokives Nōbū, kō marima kĭmi kūmūvī togesoveli popōwo ugi irora dūtū sendiokives,

³¹ memagkū popōwo ugi togesoveli irami irora sugkū wampī marima togesoveli.

³² It iyi Nōbū yemsompat omwisū ra nugkugko a sendūkiye, ma iyi ontogesovelora omwisū.

³³ Pah! sugkū sie nūsian aremi noĭntanwi ĭm nelekon isen Nōbū! nagkū wonesorugi nūrian nelekon isen wagkili sugkū sie, nugkugko, ĭm mē faneteme worokili netevarū isen!

³⁴ Im mē yemokili nowan eni Iehōva? ĭm mē mē yemtampigi, me yem maūor ūndū?

³⁵ kū mē yemovum movugi sie, ĭm antin tampenūm iran penūri tevtev?

³⁶ Popōwo marugi iyi, ĭm ugi iyi, ĭm ran iyi umante siame sū. Wumpi nilasewi nisekon ivūm nevi sū. Amen.