Reveleson 13 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Im yaū mokesi sai nūrah yemsah marugi tok, ĭm yeti ten nimpati ĭm seven numpūn iran, ĭm ra ōvun nimpati isen dūmūtē ten kraūan, ĭm ra ōvun numpūn isen ōvun nin nam sat nūsian wokon.

² Im nūrah mori yaū mokesi sugkū leopard, ĭm nowon sugkū nowon bēr, im nugon sugkū nugon laion: ĭm drakon yemevugi horog eni iyi, ĭm potnumpūtūō isen, ĭm narigi nūsian.

³ Im yaū mokesi ĭm numpūn sai isen sugkū dūmūtai mafeli nemas; ĭm yemetū nampon tai mori iran: ĭm ōveteme omwisū ra nemap dūmavlugi nūrah mori:

⁴ ĭm irora dūmūtevita iran drakon mori, popōwo yevugi nūrah mori natigi isen; ĭm dūtevita iran nūrah, ĭm dūmūnūwi, mūmokū. Mē sugkū ima nūrah? ĭm mē faneteme worumpi navakat iran?

⁵ ĭm dūmūvugi nūgon worenūwi nam horog ĭm ōvun nam sat nūsian; ĭm dūmūvugi woretindowi itais forte-tū.

⁶ Im yempaipelah nūgon worenūwi ōvun nam sat iran Nōbū, worenūwi nam sat ra nin isen, ĭm ra nimo isen, ĭm iranda umante ūnpokop.

⁷ Im yeti woreougi worumpi navakat iranda ōvun tanepo, ĭm woretantevakepe iranda: ĭm yetin avugi worarisah iranda ōvun savetasū ĭm ōvun netevokoutū sū im lō sū ĭm iranda ra ōvun nam sū.

⁸ Im lō sū omwisū ra nemap wonteveta iran, ĭm irora sū omwisū mori dūtū taiyi sū ra netaiyi nomūrep eni Lam mori dūmūtalugi iyi ra nempugon etūai mori ĭm tawi nemap.

⁹ Im nagkū sai ĭm telugon wororigi, aremai iyi andigi.

¹⁰ Im nagkū sai ĭm iyi nimsin norūleki, aremai iyi ampe sugkū ugi norūleki iran: Im nagkū sai ontalugi ugi naūitūgo, aremai wontalugi iyi sugkū ugi naūitūga. Imo oti nivnak ĭm tavniri isenda ōvun tanepo.

¹¹ Im yaū mokesi ĭm sai mōmū nūrah yemash marugi nemap; ĭm yeti nimpati endūrū isen sugkū netni pugipugil ĭm navian eni yeti sugkū drakon.

¹² Im iyi umnari horog sugkū nūrah mori mampūm ĭm ūnipmi isen. Im iyi emagkū ugi nugkugko ma nemap ĭm irora sū ra nemap wontevita iran nūrah mampūm, mori yemetū sū nampon tai talugi mori.

¹³ Im yemumpi nokesinapūp horog, ma sugkū iyi onumpi nom woroyep marugi pokop ra nemap ūniminda ōveteme.

¹⁴ Im iyi emumpiriwokonda morimori ūmante ra nemop popōwo ugi ōvun navlugi yetin avugi worumpi ūnipmi nūrah mori, miyi yeniokū pun ora ōveteme ūmante ra nemap, memagkū irora wonumpi safi nūrah mori yivai nampon naūitūga, mōimamūrep.

¹⁵ Im yetin avugi werevugi nesumsah, mori pugi safi nūrah mori, ma safi nūrah mori anūwi nam, ĭm ma wontalokonda omwisū mori ūtū onteveta iran safi nūrah mori.

¹⁶ Im iyi yemokū wampai safi ra nokovenda mevis, kū ra nafinenda, mori irora sū mori ōveteme horog ĭm irora mori ōvun lō wokon, ĭm ōvun noete ĭm ūvun norumkor, ĭm irora mori ūmeyevsaū wokon ĭm irora mori ūtū mumpi levsaū iranda, ĭm mat awi sai faneteme woresevasi sie sai,

¹⁷ kō irora mori dūmūvai safi mori, mori nin nūrah mori, kū number ra nin eni. Imo pe nelekon.

¹⁸ Iyi morĭm nointanwi isen, aremai iyi aspi number ra nūrah mori; popōwo it iyi oti number eni neteme: ĭm number isen oti siks hunder ĭm siksti-siks.