Matiyu 28 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Isūma danemĭndog, mūmumti dan ra nōbūm ra wik, Mēri Makdalini, miyi Mēri sī, dūmūvelum worokesi velitenemi;

² memetepū nomiok tamas popōwo Nagelō eni Novsūromon yivelum, memne ra pokūp, movoleveli nevat marugi nogūn selat, memetesep ran tan.

³ Nĭpmi eni sugkū turepis, Im nemas eni nesebo sugkū snō;

⁴ mōvun navles dūmūvekōrakōra popōwo ugi iyi, mūinūti sugkū Oveteme nemás.

⁵ Miyi Nagelō yemtamsi memenūwi punora ōvasiven memokū, Utūmte ugi; It ya umagkili ma kimi kūmnesorugi Iesū mori dūtalugi ra nēūmparum.

⁶ Tawi iyi ĭgko; ĭt iyi ovsorasah sugku iyi yepmenūwi. Uvelum mōkesi nūrū Novsūromon olēwi.

⁷ Uve mūnūwi punora ōvun nūrie ēni mōkū iyi ovsorasah marugi nemás, miyi umampūm irami ra Kalĭli; kimi kwagesi iyi yūi; ūrĭgi, ya onūwi pugkūm.

⁸ Mirora dūmūve marugi veli ugi nemtetugi ĭm navosavos tamas, mūmalō worenūwi punora ōvun nūrie eni.

⁹ Im pol sugkū irora dūmūve worenūwi punora ōvun nūrie eni, Iesū yemevetet dal, memenūwi punora memokū, Kĭmi paū. Mirora dūmūvelum potipot mūmorūleki nōan, mūmūteveta iran.

¹⁰ Im Iesū yōmenūwi pūnora memokū, Utūmtetugi; ūve mūnūwi punora ravūgsīeme mōkū irora wampe ra Kalĭli, ĭm yūi irora wagesi yaū.

¹¹ Im pol sugkū irora dūmprokeve, nugkondeme ra ōvun navles dūmūve ra sĭti mūmūnūwi punora ōvun tavsogi tumpora mūmōkū ugi tiamesū dūmūtepū.

¹² Im pol sugkū irora, mōvun Talam, dūmūsemsimokonda, dūmaūor ugi, irora dūmafēokondugi ōveteme ūbrami mori, muni tamas,

¹³ mūmūnūwi punora mūmōkū, Unūwi mōkū, Ovun nūrie eni ūvelum pūmrok mumprokugi iyi, ĭm kam alēepo.

¹⁴ Im nagkū iyi Natemonōk andĭgi imo, ka kelanūasumperi pugi ĭm lesemsempari ĭrami.

¹⁵ Mirora dūmūvĭ muni mori, mūmūnūwi sugkū dūmūtavsokondugi; mōveteme Isrēel ūmandūnenūwi mūmagkū ugi imo mefeli imo dan.

¹⁶ Mōvun nūrie Eleven dūmūve ra Kalĭli ra numpūo mori Iesū yepmenūwi punora memokū ugi.

¹⁷ Im pol sugkū irora dūmōkesi iyi, irora dūmūteveta iran; kō nugkondeme dūmūtevrevorūwi.

¹⁸ Im Iesū yivelum memenūwi punora memokū, Yemovo yaū horog omwisū ūnpokūp mūnemap,

¹⁹ Uve mumpi lō sū lō sū, ōvun nūrie enyaū; wumbaptiso iranda ra nin eni Itemen ĭm Netni, ĭm Naviat Tumpora;

²⁰ mūtavso-konda woralekoleki omwisū mori yaū mempasewugkūm; ĭm yaū dal kĭmi dan sū dan sū, afeli ra nisah.