Matiyu 24 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Im Iesū yive ilat memōwi nimo tumpora. Mōvun nūrie eni dūmūveluin mūmūsesi pugi ōvun sileboke ves nagkaūugi nimō tumpora.

² Im Iesū yemenūwi punora memokū, Kĭmi kūmagesi imosū kū? Itnesog ya umanūwi pugkūm memagkū, otūantendōwi ĭgko sĭ nevat ran tan nevat; wontalepasi omwisū.

³ Im pol sugkū iyi yemetesep ra numpūo Olivet, ōvun nūrie eni dūmūvelum pugi iyi ko sĭ, mūmūnūwi mūmōkū, Enūwi pugkam, nĭgoi onumpi sugkū? ĭm saf nevelum enugkĭk ĭm nelehūvan nemap sugkū tie?

⁴ Im Iesū yemtamsi memenūwi punora memokū. Ufĭnte kĭmi ma sĭ otūonempiri wugkūm;

⁵ popōwo sikat wampelum ra nin enyaū manūwi magkū, Yaū Krĭstō, momempiriwokonda ōveteme sikat.

⁶ Im kĭmi kwaridūnorĭgi nam ugi ūbrami, mōvun narĭgi ugi ūbrami; ūfĭnte kĭmi mūtūyōūmple; imosū wampelum, kō otūalehūvan itnum.

⁷ It lō wonategeveram ra lō sĭ, ĭm netevokontū ra netevokontū sĭ; ĭm ra nūrū sū sikat ōvun temas mōv navoret mōv nomiōk.

⁸ Imosū omwisū wonatipotni ōvun nelĭleki.

⁹ Mōveteme wonempiri wugkūm woretipe sokomulep irami, montalugkūm, ĭm lō sū wonakan pugkūm popōwo ugi nin enyaū;

¹⁰ ĭm sikat wontamsal momempiri wokonda, irora pe irora, masepen nakan punora irora.

¹¹ Mōvun profet nempiri sikat wampelum momempiri wokonda ōveteme sikat;

¹² mōv numpūrahĭndi wantendamsah, ĭm popōwo ugi mō nelintugi enirora ōveteme sikat ampēyū;

¹³ kō iyi sī onatekisah mantendōwi ūnam afeli ra nisah ampiēōwara iyi.

¹⁴ Im imo nam navosavos wontorenūwisah nĭmsĭn numpūvsok punora ōveteme ra nūrū sū; ĭm penuri imo ampelum nelehūvan.

¹⁵ Im pol sugkū kĭmi kwagesi nūrah ĭteobuki, mori umnumpi nirrīakelep, mori Daniel profet yepmenūwi memokū ugi, umantūrūwi ūnisog nimo tumpora (miyi sī kū sī ūmasepi netīyi ugi,

¹⁶ aremi iyi umagkili fan nam) aremĭ irora ra Yūdia wonalo ra numpūo;

¹⁷ miyi ran tan nimo otūīyep magkū worevĭ sĭ en tie sī ūnisog nimo eni;

¹⁸ miyi ra denūok aremĭ iyi otūontorĭleki magkū worevĭ némas eni.

¹⁹ Irora mori wontandiokumpōh ran dan sū mori mūm navuguni wandĭgi nesorū tamas;

²⁰ ūfwaki ma sugkū kūtūwonalō ra nakas kū ra danemĭndog;

²¹ ĭt sokomulep tamas wampelum sugkū yētūtepū marugi natipotni nemap mefeli nempugon marima, motūōmampelum sugkū;

²² ĭm nagkū petūmnumpotipot dan sū mori petūviēōwara sĭ; kō popōwo ugi irora ōvun tampoli onumpotipot dan sū mori.

²³ Im nagkū sĭ anūwi nam pugkūm magkū, Urĭgi, iyi Krĭstō ĭgko; kū iyi ĭgko; ūtūtavnirĭgi;

²⁴ popōwo ōvun krĭstō nempiri wampelum, mōvun profet nempiri sugkū, mirora wonumpi ōvun nokosĭnpūp navlugi worempiriwokonda ōveteme, mōvuntampoli nagkū irora faneteme.

²⁵ Urĭgi, ya umanūwi pugkūm marima.

²⁶ Popōwoimo sugkū, nagkū irora wanūwi pugkūm magkū, Urĭgi, Iyi ra nūrū wokon ūtūve;

²⁷ kū, Iyi ūnisog seleboke ves vamon, ūtūtavnirĭgi; popōwo nevelum eni Netni eni neteme anti sugkū tūrepis mori umamne ūnūrū mumeselĭ mefeli nelehompeni; ĭt ra nūrū nokolĭsiran ĭtūremas yūi

²⁸ sugkū ōvun sokowavi wosemsimokonda.

²⁹ Im penūri sokomulep dan sū mori marimago nĭpminen anti nelebōkevat, mitĭs otūoselĭ, ĭm mosi sū wamol marugi pokūp, mōvun horogsū ūnpokūp woyeliel,

³⁰ ĭm safi eni Netni eni neteme antūratūmpeni ra pokūp, mōvun savūta sū ra nemap wandĭgumpūnū, inirora wagesi Netni eni neteme umampelum ra ōvun numpūaū ūnēĭ ugi horog ĭm nilasilaswi tamas.

³¹ Miyi ontamūlora ōvun agelō eni ugi nasora tamas ugi tovūi mirora wosemsimokonda ōvun tampoli eni marugi nūrūsū nūrūsū, marugi nugkon ra nugkon pokūp.

³² Ukili parabel tovuni nē fĭk; pol sugkū umesemsi memselevlevi kūmagkili nenum umnumpotipot;

³³ ĭm kĭmi pol sugkū kwagesi imosū omwisū, ūkili imo potipot ra nogūn selat.

³⁴ Itnesog ya umanūwi pug kūm memagkū, imo palsi otūamas sū afeli nempugon imosū omwisū wonekompelisū.

³⁵ Pokūp mūnemap wampia, kō nam enyaū utūampia.

³⁶ Kō dan mori ĭm nugkon dan, tawi sĭ umagkili, ĭm tawi irora ōvun agelō ūnpokūp, Iyi wokon, Itemen yaū.

³⁷ Sugkū dan sū eni Nōa, anti sugkū nevelum eni Netni eni neteme.

³⁸ It irora nempugon nōisap yetūvelum dūmneni mūmnomoneki, mūmnetovrugi, mūmanteventerugi mefeli dan Nōa yive ūnisog ark,

³⁹ mirora dūtūkili mefeli nempugon nōisap yivelum mūmūriokonda sū pelah; nevelum eni Netni eni neteme anti sugkū.

⁴⁰ Ra imo dan dūrū ōveteme ra denūok, ampī sī mawi sī;

⁴¹ dūrū ōvasiven wonĭok, ampĭ sĭ mawi sĭ.

⁴² Popōwo imo sugkū wavles, popōwo kĭmi kūtūmagkili nempugon Novsūromon enugkĭmi ōmampelum Mūkili imo,

⁴³ nagkū iyi neteme ra nimo pĭpmokili ra nugkon pūmrok neteme numprok pivelum iyi pevsora ma sugkū iyi otūonevelugi nimo eni.

⁴⁴ Kĭmi sugkū, ūtaveseves, popōwo Netni eni neteme ōmampelum ra dan kūtūontarūgi.

⁴⁵ Im mē iyi nivūo tanepō im nōĭntanwi, Narisah eni yemetipe worefĭnte irora ra nimo eni memavugunora ōvun lĭvsaū eni ugi nevag dan sū?

⁴⁶ Nevĭeves nivūo mori nagkū Narisah eni pol sugkū ōmampelum agesi iyi

⁴⁷ umnumpi sugkū ĭtnesog ya umanūwi pugkūm, antipe iyi worivūo ra netevote omwisū eni.

⁴⁸ Kō nagkū sĭ nivūo sat asepen enūwi ūnōwan magkū, Natemonōk enyaū otūvelum,

⁴⁹ miyi onatipotni woreselatevora ōvun lĭvsaū dal, memneni memnomoneki dal ōvun naūeteremlū.

⁵⁰ Iyi Natemonōk eni nivūo mori ōmampelum ra dan iyi otūontevetūi, ĭm ra nugkon dan iyi otūagkili ugi,

⁵¹ miyi osentevi, mampugi nĭpmi dal ōvun nempiri; yūi wontugagerisah moneltirit nogūn.