Mark 2 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Im penūri nugkon ovun dan tawi sikat, iyi yōĭmtorimpe ra Kaperneum; mirora dūmūrigi ma iyi yeti ūnisog nimo.

² Im marimago sikat dūmūsemsimokonda, im tawi sī nūrū nisekonda, tawi ran tan nimo sugkū: miyi yemtorenūwisah nam punora.

³ Mirora dūmūvelum pugi, dūmutori sī namarat ugi palse, ōveteme devat dūmuriuki iyi.

⁴ Im popōwo dūtū faneteme woreve botpot iran popōwo oveteme tamas, dūmūtĭpelah nimo imelūo, mori iyūi yemete: mirora dūmūtisep bed namarat mori ugi palse yemalewi.

⁵ Im pol sugkū Iesu yemokesi tavniri isenda, yemenūwi pugi namarat palse memokū, Netūg, satsū enugkĭk umafielintugkĭk ugi.

⁶ Kō nugkon ra irora ovun somūl dūmūtesep iyūi dūmūtarū ūnōwanda mūmūnūwi mūmokū,

⁷ Irasie imo neteme umanūwi nam sat? Nōbū wokon faneteme worefielintugi sat.

⁸ Im marimago, polekū Iesū yemelavenūri ma irora dūmūtarūtarū imosū ūnōwanda, iyi yemenūwi punora memokū, Irasie kūm muntarūtarū imosū ūnōwami?

⁹ Itokowo ĭtemelepon worenūwi pugi iyi mori namarat ugi palse, Sat sū enugkĭk oti efielintugkĭk ugi; kū worenūwi memokū, Etūok, ĭm pī bed enugkĭk mavan?

¹⁰ Kō magkū kimi kwagkili ma Netni eni neteme oti fanteme worefielintugi sat sū, iyi yemenūwi pugi namarat ugi palse,

¹¹ Yakum magkū punok, Etūok, impī bed enugkĭk, mōĭmpe ra nimo enugkĭk.

¹² Im marimangō iyi yemtūok, yivi bed mori, mōĭmpe ūniminda omwisū; mirora dūmavlugi tamas, mōmūvietevesep Nōbū, mūmokū, Kam letokesi ĭndowi sugkū imo.

¹³ Iyi yōĭmpe ran telugon tok; ĭm semsimak sū dūmūve pugi, miyi yemtavsokonda.

¹⁴ Im pol sugkū yemumprokeve, yemokesi Livī netni eni Alfius yemetesep ra nūrū, worevi muni, miyi yemenūwi pugi memokū Uri yaū, Miyi yemtūōk mō mūri iyi.

¹⁵ Im yometepū pol sugkū Iesū yemtesegi ra nevag ūnisog nimo eni Livī, ma, sikat ovun publikan mōvun narekisat dūmūtesep sugkū dal Iesu ĭm ovun nūrie eni; ĭt irora dūti sikat, mirora dūmūri iyi.

¹⁶ Im pol sugkū ovun Somol movun Faresi dūmokesi ma iyi yemeni nevag dal ovun publikan movun narekisat, irora dūmūnūwi punora ovun nūrie eni mūmokū, Irasie iyi umneni mō moneki dal ovun publikan ĭm movun narekisat?

¹⁷ Im Iesu, pol sugkū yemorĭgi, yemenūwi punora memokū, Irora ōvun horĭgeves otumnakĭugi neteme sakrefīs kō ovun narekisat wokon: yaotūvelum worovrokonda ovun tanepo kō ōvetemĭnda worevīeves nōwanda.

¹⁸ Im ovun nūrie eni Yōanē movun Faresi dūmūsakrefīs ugi nevag; ĭm irora dūmūvelum dūmūnūwi pugi mūmokū, Irasie ōvun nūrie eni Yōanē movun Faresi ūmūsakrefīs ugi nevag, kō ōvun nūrie enugkĭk otum numpi sugkū?

¹⁹ Im Iesū yemenūwi punora memokū, ōvun netnime eni iyi mori yemeteveterugi otum evieni nevag pol sugkū iyi dal irora.

²⁰ Kō ampelum nĭmpugon mori, anti vīparokonda neteme yemeteveterugi, ĭm itnesog irora evieni nevag ran dan sū mori.

²¹ Tawi sī umanteri nĭvlugkon itevaū ran tan nemas iterōvat, popōwo pe mori yeteri neteri woresumpat, mamti mō mĭntavaseri nemas mōmū tamas.

²² Im tawi sī umwosĭlĭgi wĭn itevaū ūnisog botel numpūmetūo; kū entawi ampulet botel ugi wĭn itevaū, im ante wosĭlĭgi wĭn, mō mumpi ūr botel: kō irora wosĭlĭgi wĭn itevaū ūnisog botel itevaū.

²³ Im iyi yemavan ra mumpon denūok whit ran danemindog; Im ōvun nūrie eni, pol sugkū dūmūve, dūmatipotni worareki dugon whit.

²⁴ Im ovun Faresi dūmūnūwi pugi mūmokū, Pah, irasie irora umnumpi ran danemindog mori tawi sugkū nam alam?

²⁵ Miyi yemenūwi punora memokū, kūtūsepi nam kū ugi ima mori Dēvĭd yemumpi, pol sugkū tawi nevag isen, ĭm yevieni, iyi, ĭm irora dal iyi?

²⁶ Yive ūnisog nimo eni Nōbū, ra nĭmpugon Abĭadar yeti neteme woresakrefĭs, yemoni brēd tumpora, oveteme sakrefīs wokon umneni, miyi yemovunora dal iyi sugkū.

²⁷ Iyi yemenūwi punora memokū, Dūmumpi danemindog nisekon neteme, tawi neteme ugi danemindog:

²⁸ Popōwo pe Netni eni neteme oti Narisah ra danemindog.