I. Timote 5 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Etūnūwi nam nugkugko pugi neteme talam, kō enūwi metūk pugi sugkū itum; ĭm ōviarep sugkū rapmisĭmē: ovasiven talam sugkū dinemime;

² ōvun ĭtumpūkoneme sugkū revevenomo ra sentevives omwisū.

³ Esitū iranda ōvasiven neviumpūwi itnesog.

⁴ Kō nagkū umante ōvnetnime kū ōvun remokoponeme enirora, aremi irora wagkili worelintokonda ōvun numpūnaranda, ĭm woretampenum aremī iranda ritemendeme isenda: popōwo imo aremī ūnipmi Nōbū.

⁵ Iyi mori neviumpūwi ĭtnesog, ĭm umante teven ĭm norumkor iyi umentesūwī iran Nōbū, miyi umnufwaki ĭm mesenĭgi dan ĭm būmrok.

⁶ Kō iyi mori umnūri navos ra nemap, iyi sugkū neteme mas pol sugkū iyi umamūrep.

⁷ Im imo siame sugkū kanūwi ugi nugkugko, ma irora wantĭndowi aremī ĭm tawi nam iranda.

⁸ Im nagkū sī neteme otū mentarū mafinte aremī ōvun numpunaran ĭm mōmūgo nisekonda mori isen ra mumpon nimo eni, iyi umesendūkiye tavniri ĭm oti mōmū ūr numpurak isen iranda ōvun sendūkiye satindi namlī.

⁹ Etīyi ninda ōvun neviumpuwi wokon mori nevi sū sikesti iranda, nagkū asūon sīteven isenda,

¹⁰ ūmanūwi aremī ugi numpūrak aremī ovunyan enirora, nagkū dūmavegonora ōvun domo, nagkū dūmandewugi nowanda ōveteme aremī, nagku dūmelĭntokonda ōvun norĭgumpūnū, nagkū dūmūri unam ōvun numpurak aremī omwisū.

¹¹ Ko ōvun neviumpūwi ĭtumpūkoneme popōwo pol sugkū irora wanti neyompele ĭm mĭmrū ugi Krĭstō, irora wakīugi worōmontūok;

¹² wanūwi nipmi numpūrak isenda popōwo irora dūmūwi tavniri yepmovūm enirora.

¹³ Im irora ūmnimrū ugi numpūrak, mūmnavanavan ra ōvun temne sikat; ĭm ūtūm nĭmrū ugi numpūrak wokon, kō irora ūmanūwi sebet nam, mūmesemevse mōĭmsumpelūliye ugi siame tawi enirora, ĭm irora ūmanūwi nam tawi aremī irora wanūwi.

¹⁴ Im popōwo pe sugkū yakum magkū ōvun neviumpūwi itumpūkoneme wuntūok, mūvĭ ōvalalaū, mūfĭnte aremī temne enirora mūtū umpi sī sōie sī wontavūntand ugi ōvūn novsen-nakan enirora:

¹⁵ popōwo itnesog nugkon dūmūtorileki pugi Sētan worūri iyi.

¹⁶ Nagkū ūmante ōvun neviumpūwi ūndū sī nasiven tavniri aremī iyi afinte irora, ma sugkū otū onelasewoni nilpon sī lō tumpora; ma sugkū irora wonesitū iranda mori ōvun neviumpūwi itnesog.

¹⁷ Irora wosesieves aremī ōveteme omwisū, ĭm tamas mōmū irnada mori ūmentorugat ra nam ĭm ran tavsogi.

¹⁸ Popōwo dūmūtīyi mūmokū, ūtūēti nugūn okes pol sugkū iyi umowĭ whit, Im, Aremī neteme torugat ampi nipmi numpūrak isen.

¹⁹ Etūrĭgi nam iran elder nagkū ūmanūwi iran, nagkū tawi numpūvsok endūrū kū endesel ugi nam mori.

²⁰ Urianda mori ūmnumpi sat ūnĭmĭnda ōveteme omwisū, ma sugkū irora nugkon wamtitugi.

²¹ Yakum manūwi punok ū nipmi Nōbū, ĭm Iesū Krĭsto, ĭm ōvun nagelo tampoli, magkū kafinte imo sū siame ugi tarū tanepo ūnōwam sīteven, metū umpi sie ugi tampolora ōveteme.

²² Etū akan itnum woretipe nokopmū iran sī kū sī neteme, ĭm etū sompelūliye ra sat enirora ōveteme: kafinte kĭk sentevives.

²³ Etū omoneki nū wokon, kō nugkon vilik win popōwo ugi netnim, ĭm popōwo netromoro sikat enugkĭk.

²⁴ Umamsok mampūm etūwi ōvun sat enirora nugkon ōveteme, penūri nūrian iranda, kō umantiumpene sat lap enirora nugkon ōveteme penūri umamsok.

²⁵ Im sugkū umakilives ugi ōvun numpūrak aremī ĭm numpūrak ūr nugkugko woratiumpene irora.