I. Teselonia 2 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Popōwo kĭmi kūmagkili, ravūgsieme, nivelum enugkam pugkūm, memagkū tawi sugkū nindewavū:

² kō kalevĭ norigumpūnū mampum, ĭm dūmūtipe nugkugko tamas ĭm narumprum iramam ra Filipi ĭm kĭmi kumagkili ugi kō kam ĭm latekisah ra Nōbū enugkam woresūlives nam navosavos eni Nōbū ra nesesaū tamas.

³ Im ka kĭm letū tavsogkūm ugi namli, kū ugi nililūo, kū ugi nimpiri:

⁴ kō sugkū Nōbū yemetipe kam nĭmsĭn worefinte nam navosavos, ka kĭm lanūwi sugkū; tawi worevi narigi eni neteme kō isen Nōbū, ĭt iyi umagkili nōwamam.

⁵ Im kam letūnūwi sī nam paū narĭgi nisekon neteme, kūmagkili sū, ĭm tawi ugi nimpiri ugi nōēte,

⁶ Nōbū numpūvsok ugi; ĭm kam letūsorugi narĭgi morokonda oveteme, ĭm tawi marugkūm, ĭm morokonda mē sī, kō it oti tanepo ĭm aremi worfinte kam ĭm woresugkam sugkū, apostol eni Krĭsto.

⁷ Kō kam lete dal kĭmi ugi nemolsep sugkū nasiven umafinte tamas aremī ov netnime isen iyi;

⁸ im sugkū kam mūlĭntugkum tamas, ĭm ka kĭm lavos tawi worevugkūm nam navosavos wokon eni Nōbū, kō naviat enugkam sugkū, popōwo ugi nelintugi enugkam nisekomi.

⁹ Popōwo kĭmi kūmagkili rapmame, numpurak ĭm nagelaū enugkam: ĭm kam lagelaū pūmrok ĭm pūakas, ma ka keletū tipe numpokentom iran mē sū irami, ĭm kam litorenūwi pugkūm nam navosavos eni Nōbū.

¹⁰ Kūmumpūvsok, ĭm Nōbū sugkū, memagkū, kam lumpi aremi ĭm tanepo ĭm sentevives pugkūm ōvun tavniri:

¹¹ ĭm kĭmi kūmagkili nokowo kam lumpi nisekomi omwisū, sugkū neteme nisekonda ōvunyan isen,

¹² mūyevekūm, mōmesitū irami, moĭmsūlives, pugkūm, ma sugkū kĭmi kwanavan aremi ugi Nōbū, mori yemovorugkūm ra lō ĭm nilasilaswi isen.

¹³ Im popōwo pe sugkū ka kĭm lumpalugi pugi Nōbū ĭndowi, ma pol sugkū kĭmi kūmūvī marugkam nam nempasewugi, nam eni Nōbū, kūmūvĭ tawi sugkū nam eni neteme kō sugkū oti ugi itnesog, nam eni Nōbū, mori umnumpi horog ūnōwami mori ūmentavniri.

¹⁴ Popōwo kĭmi rapmamme, kĭmi kūm umpi sugkū ōvun kalesia eni Nōbū mori ūmante Yūdia ra Iesū Kristo: popōwo kĭmi kūmūvĭ nesorū marokonda ōveteme enugkimi, sugkū irora dūmūvi marokonda ōveteme Yūdia;

¹⁵ irora dūmūtalugi Iesū Novsuromon ĭm ōvun profet, dūmūsatevugkam, dūtū umpi aremī ra Nōbū, mirora novsen nakan enirora ōveteme omwisū;

¹⁶ mirora ūmenūwali pugkam ma ka kel letū anūwi nam punora lō pelah sī ma wumkorēyōwara; ma anti nūsian satindi enirora; kō umante nūrian naraki nūsian tamas nisekonda Ravugsieme,

¹⁷ yetin sompatamtugkam marugkūm ugi nempugon virok, kō tawi ugi nowamam, ĭm kam lokū ugi nakiugi tamas mōmū worokesi nemetemi:

¹⁸ popōwo nakiugi tamas enugkam worevelum pugkūm, yaū Pol ĭndowi ĭm dan sū sugkū;

¹⁹ kō Sētan yemsompat, amtugkam. Popōwo sie ratevetūi naīugi enugkam, kū navos, kū nevīugi nilasilasewi. Kĭmi pe nokowo, ūnĭpmi Iesū Novsuromon enugkos pol sugkū iyi ampelum.

²⁰ Popōwo kĭmi oti narigi ĭm navos enugkam.