I. Korint 12 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Im ugi itemas paū eni Naviat Tumpora, ravūgsĭme ya umnakīugi ma kwagkili ugi kĭmi.

² Kĭmi kimlagkili ma pol sugkū kūmūte ōvun nelebokevat dūmūtorokūm pelah pun ora ōvun natmas natepū ia ĭm ia.

³ Im popōwo pe ya umesūli aremī imo siame pugkūm, memagkū, nagkū sī kū sī umanuwi nam ugi Naviat eni Nōbū, iyi otū magkū Iesū nowarepatevi tawi; ĭm tawi sī faneteme worenūwi memagkū, Iesū oti Novsūromon, kō ugi Naviat Tumpora.

⁴ Umentevūrakugi nilpon sī ĭm sī itemas paū, kō Naviat pe siteven. Im ūmante ōvun torugat sī ĭm sī worenūatumpeni na niēvūos, kō Narisah saiteven.

⁵ Im umnumpiugi numpūrak sī ĭm sī kō Nōbū eiteven, mori umnumpi tiame sū omwisū irora sū.

⁶ Kō umentalug pun ora sī ĭm sī numpūrak eni Naviat Tumpora worumpi aremai omwisū ugi.

⁷ Popōwo umpugi sī ugi Naviat Tumpora nam nelekon;

⁸ ĭm pugi nointanwi, sugkū ugi Naviat siteven: ĭm pugi sī tavniri, ra naviat siteven;

⁹ ĭm pugi sī worumpi torugat ōvun namarat ugi itemas paū, ra Naviat siteven;

¹⁰ ĭm pugi sī worumpi numpūrak navlugi; ĭm pugi sī worenūatokeli. Nam yemeteumpeni; ĭm pugi sī worokili nōwanda ōvun naviat: ĭm pugi sī worokili navianda ōveteme sikat; ĭm pugi sī mōmū woresuli vesfan ra ōvun nam sikat:

¹¹ kō Naviat siteven mori umnumpi imo sū ōvun numpūrak omwisū, mo metevūrah sī ĭm sī pun ora ōveteme sugkū iyi umagkū ugi.

¹² Nokolisiran siteven, ĭm sikat nĭvlugkon, ĭm nĭvlugkon nokolisiran, mori sikat, kō pe nokolisiran siteven wokon; ĭm iyi Krĭstō sugkū.

¹³ Yembaptiso irant omwisū Naviat Tumpora siteven, ra nokolisiran sīteven, ōveteme Yūdia kū ōveteme Kris, ōveteme ūmnagelaū wokon kū ōveteme ūmante wokon; ĭt siteven wokon Naviat mori kos kĭm lomoneki marugi, kos sū.

¹⁴ Popōwo tawi nĭvlugkon siteven nokolisiran eni sī neteme, kō sikat.

¹⁵ Nagkū nowon umagkū, Popōwo yaū tawi nokoven, yaū tawi nĭvlugkon nokolisiran; kō imo nam wokon popōwo ĭtnesog iyi sugkū nĭvlugkon nokolisiran.

¹⁶ Im nagkū telugon umagkū, Popōwo yaū tawi nĭpmi, yaū tawi nĭvlugkon nokolisiran; kō imo tawi ĭtnesog popōwo iyi sī nĭvlugkon sugkū.

¹⁷ Nagkū nokolisirant nĭmĭnt wokon, ĭm kos kelorigi nam nokowo? Im nagkū nokolisirant telugont wokon ĭm kos kel andigi nampen siame nokowo?

¹⁸ Kō ĭtnesog Nōbū yemetipe ōvun nĭvlugkon sī ĭm sī ra nokolisiran sugkū yemokū aremi ugi.

¹⁹ It nagkū ōvun nĭvlugkon pe siteven, ĭm yei pe nokolisiran?

²⁰ Kō irora ōvun nĭvlugkon sikat, kō nokolisiran siteven.

²¹ Nugkugko iran nipmi worenūwi pugi nokoven kĭk nĭmsĭnse irag? kū numpūn worenūwi pun ora nowon isen kĭmi nĭmsĭnse irag?

²² Kō mōmū ĭtnesog mōmū, ōvun nĭvlugkon nokolisirant mori kos kĭm lagkū irora mōmū netromoro, kō irora aremi nisekont:

²³ ĭm kos kĭm lenetovtam mōmū iranda ōvun nĭvlugkon nokolisirant mori kos kĭm lagkū irora mōmū nindewavo: ĭm ōvun nĭvlugkon kos mori tawi iyalepi wokon kō kos kemlenumpi aremi mōmū iranda mori;

²⁴ kō kos kelenumpi aremī nokowo ōvun nĭvlugkon aremī ra nokolisirant? ĭt irora aremī sū: kō Nōbū yemumpi aremī omwisū nokolisirant, miyi yemetovtam mōmū aremi nĭvlugkon nokolisirant mori tawi aremī wokon;

²⁵ memagkū otū onaūor ōvun nĭvlugkon nokolisirant kō ma irora wante mafinte irora irora sū.

²⁶ Nagkū nesorū ra sī nĭvlugkon omwisū umandigi pe ūndū iyi; kū nagkū anūwi narigi aremī sī nĭvlugkon, ovun nĭvlugkon omwisū ūmnavos ūndū iyi sugkū.

²⁷ Kĭmi nokolisiran Kristo, ĭm kĭmi sī ĭm sī ōvun nĭvlugkon nokolisiran iyi.

²⁸ Im Nōbū yemetipe ra kalesia nugkon, mori irora mampūm ōvun apostol penūri ōvun profet, penūri ōvun tavsogi, penūri ōvun nointanwi, penūri ōvun nevīpelah namarat, ōvun torugat, ōvun nelekon, ra nam paū, ĭm ōveteme worokili navianda lōsū lō sū.

²⁹ Omwisū ōvun apostol kū? omwisū ōvun profet kū? omwisū ōvun tavsogi kū?

³⁰ omwisū nointanwi kū? omwisū ōvun nevīpelah namarat kū? omwisū faneteme worokili ōvun nam ra nūrū sū nūrn sū kū irorasū ūmesūli fan nam kū?

³¹ Kō ūsorugi tamas kĭmi ōvun ĭtemas paū ra nūsian aremi. It ya ontavsogkūm netevarū aremī tantevakepe mōmū.