Hibru 2 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Popōwo pe aremī kos kelenalekoleki siame mori kos kim lorigi sū ugi, kū entawi kos kelampiokonda.

² Popōwo nagkū yemetĭndowi unam nam mori ōvun nagelo dūmūnūwi, ĭm dūmūrian ugi ōvun sat ĭm ōvun sendūkiye omwisū ugi nūrian tanepo;

³ kos kelen alo iya, nagkū kos kelen tasevioa imo nēyōwara nūsian aremī ĭndowi? mori Novsūromon yovūm menūwi ĭm penuri irora mori dūmūrĭgi dūmumpūsok ugi;

⁴ ĭm Nōbū sugkū yemumpūvsok dal irora, ugi ōvun safi ĭm ōvun navlugi, ĭm ugi ōvun numpūrak nugkugko sikat, mugi ōvun ĭtemasepaū eni Naviat Tumpora, sugkū nesepen tarū isen iyi pe iyi.

⁵ Popōwo yetūtipe ōvun nagelo woreti nivūo horog iranda ōvun siame mori wampelum, mori ka kem lanūwi ugi.

⁶ Kō sī yemenūwi ra netiyi sī memokū, Sie neteme, ma kontarūgi ugi iyi? Kū netni neteme ma kĭk atnemi?

⁷ Kĭm mumpi iyi mōmū virok ra irora ōvun nagelo; Kĭm metipe narigi iran, ĭm nilasilaswi ĭm nam paū nisekon, Im kĭm metipe iyi woreti horog iranda ōvun numpūrak ra nokopmū.

⁸ Kĭm metipe tiame sū ra mumpon nowon. Im popōwo ma nagkū yemetipe iyi mōmū horog iranda ōvun siame omwisū, yetūwi sie sī, yetūtipe ra mumpon nokoven. Kō kos kim letūm lagesi siame sū ra mumpon nokoven lap.

⁹ Kō koʼ kĭm lagesi iyi mori dūmumpi mōmū virok ra irora ōvun nagelo, mori pe Iesū, popōwo yemorigi nesorū ugi nemas iran dumumpi narigi ĭm sesie nisekon, yimas nisekonda ōveteme omwisū popōwo ugi itemas paū eni Nōbū.

¹⁰ Popōwo yeti aremī iran, mori ĭt isen siame sū, miyi yem umkorēyōwara, popōwo ugi norĭgumpūnū.

¹¹ Popōwo sīteven wokon itemenda, magkū iyi mori yemumpi irora aremī ĭm irora mori dūmumpi irora aremī: ĭm popōwo pe sugkū iyi otū onarumprum woratovninda magkū ravensīēme isen,

¹² memagkū, Ya anūwi nin sorum punora ravūgīēme sorūg Ya osemsi narūfo narigi nisekom ūnĭmĭnda semsimak.

¹³ Im pe mōmū, ya ontesūwĭ iran. Im mōmū, Okosyaū kĭk, ĭm ovunyan sorūg mori Nōbū yemovoyaū.

¹⁴ Im popōwo pe sugkū ĭtnesog umante fan ĭm de isenda ovunyan isen, iyi sugkū yivi imo siame sugkū iran; memagkū iyi onumpi nendewavū iyi mori faneteme worumpi nemas, mori, Setan;

¹⁵ memumkorēyōwara mori omwisū dūmorigumpūnū dan sū omwisū ra nomūrep enirora popōwo ugi nemtetugi nemas iranda.

¹⁶ Popōwo iyi otūm naverora ōvun nagelo, kō iyi umnaverora ōvun netnime Ebraham.

¹⁷ Im popōwo pe yeti aremī iran woreti sugkū ravensīeme isen ra ōvun tiame su, ma iyi ante potni sokowara tanepo ĭndowi mō melĭntugkos ra siame sū eni Nōbū, memagkū iyi osokowar ugi ōvun sat enirora ōveteme.

¹⁸ It iyi yemorigi sat ugi tapmi iran, ĭm popōwo pe sugkū iyi faneteme woraverora mori ūmentapmi iranda.