Hibru 12 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Im popōwo umafeafe irant ōvun numpūvsok netevokontū tamas ūmtopotneme irant, aremi kos kelen tafugi marugkos ōvun nokelar omwisū umesompatamtugkos,

² ĭm imo sat omampelat irant, ĭm maloves ugi natekisah, res mori umantipe ūnimint, ĭm lintopneme iran Iesū iyi mori natipotni tavniri enugkos yemekompeligi, mori popōwo ugi navosavos dūmūtipe ūnipmi eni yevi nemas iran ra neumparum, metokū sie ugi norumprom ugi pe, ĭm iyi umantesep ra nugkon meves ra potnimpūtūwō eni Nōbū.

³ Im ūtarūgi iyi mori yevi sendoeikia nugkugko isenda ōvun narekisat iranda ma kĭmi ūtū wante numpok, ĭm netromore ūnōwami.

⁴ It, kūmūti atekisah ĭndowi kĭmi mafeli nemas nugkugko wore sompat sat;

⁵ ĭm kūmūtavrivi nam aremī dūmūyevekūmugi, mori ūmesesives pugkum sugkū pun ora ovunyan, memagkū, Ah netūg etūtasevivoa nurian eni Novsuromon, Im etute netromore polsugkū iyi umeyevok;

⁶ Popōwo Novsūromon umnūrian iranda mori iyi umnelintokonda, Im iyi umeselatevora ōvun netni omwisū isen mori iyi umampi isen.

⁷ Nagkū Nōbū umnūrian irami; kimi kwante sugkū ovunyan isen; mē netni mori ĭm itemen otun nurian iran?

⁸ Kō nagkū otum nūrian irami, kĭmi sugkū ōvelalaū ran topavū, ĭm tawi ōvalalaū ĭtnesog ugi tanepo, mori umnūrianda,

⁹ Im mōmūgo, dūmūte ōvun ĭtement worūrian irant, ĭm kos ĭmlisesieves iranda; ĭm kos keletū sesieves mōmūgo iran ĭteman ōvun naviat enugkos mo mamūrep kū?

¹⁰ Popōwo irora dūmūrian irant nempugon botipot sugkū ugi nakiugi ĭm tarū isenda; kō iyi yemūrian worumpi aremī irant,

¹¹ ma kos kelampī netevūreves tanepoves isen. Tawi sī umnavos ra nempugon marima ugi nūrian iran, popōwo iyi umnageri ugi lap; kō ra nisah umvoūwo nōvūwn ninparata nisekonda mori dūmūvī imo nūrian mori pe nōvūwan ra tanepoves.

¹² Im popōwo pe ūvīsah ōvun nokopmi ūmnatau, ĭm ōvun numpūn nearin enugkimi netromorowi;

¹³ ĭm kwumpi ōvun selat nugko nimsin nōame, ma ima mori noetet otū avan pelah numgi, kō ampi horīgeves.

¹⁴ Usorugi ninparata tovun ora ōveteme omwisū, ĭm wumpi aremī, iyi sī kū sī mori otū onumpi imo otū agesi nipmi Novsūromon:

¹⁵ ūfinte aremi kĭmi kū entawi sī amol kitan metūvi ĭtemaspaū eni Nōbū;

¹⁶ kū antepū noatnin sie sī nakan worumpi neyompeligivi nowami, mōmumpi ūr ōveteme tamas ugi; kū entawi ante sī neteme tampalaū, kū neteme sendoeikia, sugkū Iso, more iyi netemefe, kō popōwo ugi nevag sīteven isevasi nete monok isen iyi.

¹⁷ Popōwo kĭmi kūmagkili memagkū penuri ra nisah ra ima sū yemagkīugi worevi nevieves mori nisekon, yeti nugkugko worevi pe; yemesorugi pe ugi natekisah ĭm nageri tamas, kū yetokesi sī nemolsep ūnōwan iteman pugi.

¹⁸ Popōwo pe kūmūtūvelum ra sī numpūō ĭtemelepon woreti, kū woratni ugi masekam, kū pugi nelebokevatwi,

¹⁹ ĭm pūmrok, ĭm nemetagi nūsian, ĭm navian tovū, ĭm navian nam; ĭm irora mori dūmūrĭgi

²⁰ navian nam mori dūmūsenigi tamas ma ūtū anūwi mōmūgo nam pun ora: popōwo irora tawi faneteme mōmū woroigi nam alam yepmenūwi ugi punora ugi memokū, It nagkū sī nūrali sugkori numpūō mori, antevi ugi nevat;

²¹ ĭm popōwo veti sugkū sie nugkugko mori dūpmokesi, ma Moses yemenūwi memokū, yaum nemetet tamas wokon mampekorekor;

²² ko kĭmi kūmūvelum, pugi numpūō Sion, ĭm pugi sĭte eni Nōbū nomurep, mori Yerūsalem ūnpōkop, ĭm pun ora ōvun netevokontū ōvun nagēlō nūsian tamas nugkugko worespi,

²³ ĭm pugi semsimak horog ĭndowi ĭm nelepon sī lō tumpora, enirora ōvun kalesia ĭtnetemefi, mori umantipe ninda ūnpokop, ĭm pugi Nōbū mori Nurie onūrianda ōveteme sū omwisū, ĭm pun ora ōvun naviat isenda ōveteme aremī mori dūmumpi irora aremī wokon ĭndowi,

²⁴ ĭm pugi Iesū umnumpi ninparata ugi nam ūnam ĭtevaū, ĭm pugi nde mori maviviugi, mori umanūwi siame mōmū aremī iran imo mori eni Ebel.

²⁵ Ufinte ma kĭmi ūtū imrū ugi iyi umanūwi Popōwo nagkū dūtūsūlora, mori dūtūrigi iyi mori yemenūwi punora ra nemap, nugkugko mōmū tamas irant pe kos worelevi, mori kos mori kos kemletūrĭgi iyi mori umanūwi pugkos marugi pokop,

²⁶ ĭm navian ra nempugon mori yemukeri nemap; kō marima iyi umanūwi memagkū, Nempugon sīmōmū

²⁷ sītevengo ya onumpi worugkeri tawi nemap wokon, kō pokop sugkū. Im imo nam, Nempugon sīteven mōmū, fan nam ugi, nevīpelah siame mori umugkeri, sugkū ugi siame umnumpi, ma siame mori dōtū ugkeri pe wantĭndowi ūnam.

²⁸ Im popōwo pe, kos kĭm livi lō mori nugkugko worugkeri, armī kos kel antindowi ūnam ra nelintugi isen,

²⁹ memagkū ugi imo kos kelintorugat aremī iran Nōbū ugi sesieves ĭm nemtitugives; popōwo Nōbū enug kos oti nom umatni aveni ĭndowi tiame.