Filipi 3 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Im imo aveni, ravūgsīeme, wavos kĭmi ra Novsūromon. Ya otūm nimrū woretīyi imo nam sīteven pugkūm, ĭm imo siame aremī nisekomi. Ufinte kĭmi marugi ōvun kūri, ūfinte kĭmi marokonda umnumpi numpūrah sat,

² ufinte kĭmi marokonda umnumpi wokon namon iranda:

³ popōwo kos ōvun numpi namon irant, ugi ĭtnesog, popōwo kos kem lumpi ugi Naviat eni Nōbū, ĭm lenavos ra Iesū Krĭsto, mūtū tavniri ugi ōvun numpi ratilat ra nokolisiran:

⁴ yaū faneteme woretavniri siame ra nemap sugkū: ĭt nagkū sī kū sī mōmū neteme umagkū yoretavniri imo siame popōwo yivi, yaū mōmūgo;

⁵ pol sugkū dan sū eēt irag dūmumpi namon irag, yaū memne ra fan Isrēel, ĭm yaū marugi savūtasū eni Benyomin, ĭm neteme Hibrū ra Hibrū ugi fan ĭtnesog;

⁶ im sugkū neteme Faresi ugi alekoleki nam alam; yaū matekisah woretara ōvun kalesia; ĭm ugi tanepo ra nam alam wokon, yaū meti sentevives wokon.

⁷ Kō siame mori faneteme woresitū irag, yaū mokū irora sugkū nindewavū popōwo ugi Krĭstō.

⁸ Im ĭtnesog yaū magkū nindewavū wokon siame sū omwisū popōwo ugi imo mori aremī ĭndowi, memagkū worokili Iesū Kristo Novsūromon enyaū: ĭm ya otafugi siame omwisū, memagkū irora sugkū nililūo wokon,

⁹ ma ya ampi Krĭstō, ĭm woretindowi ra iyi, ĭm woretū tavniri ra sī netevarū nugko enyaū sugkū ugi nam alam kō ugi imo mori umamne ra tavniri ra Krĭstō, tanepoves mori marugi Nōbū ugi tavnirima ya agkili iyi,

¹⁰ ĭm horog nevsorasah isen, ĭm lante ūndū iyi ra ōvun norĭgumpūnū isen, ĭm sugkū iyi ra nemás isen;

¹¹ memagkū ya ante faneteme worevi nivsorasah marugi nemas enyaū.

¹² Ya otū magkū ya okevi sū imo siame, ĭm ya otū magkū yaū aremī wokon: ko ya umnelevi nagkū ya ampi kū imo mori Iesū Kristo yemtori yaū ugi pe.

¹³ Ravūgsīeme, ya otū magkū ya okevī sū imo mori: kō ya umnumpi imo sīteven, ya otūm nentime en tiame sū kitag,

¹⁴ yakum mandekĭepe ugi tiame unĭmtūg, yakum nelesi ugi nūrū yūi nōorōora ves umamprokoyaū ugi Nōbū ra Iesū Kristo mori yemne ūnpokop.

¹⁵ Im popōwo pe sugkū, aremī kos kelen tarū sugkū, kos mori kos kem lagkili ves: ĭm nagkū ugi sie sī kĭmi kūmagkū pe sī,

¹⁶ kō imo sugkū Nōbū anūatumpene pugkum: kō, ra imo mori kos kelevĭsō, aremī kos kelenūri indowi sugkū.

¹⁷ Ravugsieme, uri yaū kĭmi, ĭm ūtarūgi navan isenda mori umnumpi sugkū kūmagesi iramam.

¹⁸ Popōwo sikat ūmnavan, mori yaū morūnenūwi pugkūm ugi irora, ĭm ya umanūwi marima ugi nageri, memagkū, irora ōvun novsin nakan eni nēūmparom isen Krĭstō:

¹⁹ nĭpmi nisekonda imo, wontafugi irora indowi, netninda nōbū isenda, irora umnavos ugi satindi narumprom enirora, mirora ūmentarū siame ra nemap.

²⁰ Kō sī nūrū enugkos unpokop; ĭm kos kem lentevetūwi Nēyōwara, Iesū Krĭstō Novsuromon: iyi onumpi ĭtevaū nokolisirant netromoro,

²¹ ma ante sugkū nokolisiran isen nilasilaswi, sugkū ugi numpi horog isen mori iyi faneteme worumpi siame sū nisekon iyi.