Salmos 99 - Biblia Enxet

Wesse' egegkok apteme Wesse' Apwányam meyke ekhémo

¹ ¡Wesse' egegkok apteme Wesse' Apwányam! ¡Yetnegkek aptaháno m'a apyetseksa'ák nak apkeláneykha ekha nak apxempenák! Énxet'ák kólpexyennem, tén han ekyókxoho xapop nak.

² Apwányam apagko' Wesse' egegkok ma'a Sión; apwányam apagko' Wesse' egegkok nepyeseksa m'a apyókxoho énxet'ák.

³ Kólpeykeshok sa' chá'a apwesey ekyawe, tén han mageysso nak agè'; ¡Dios apteme appagkanamap!

⁴ Xép apteme Wesse' Apwányam ekha apyennaqte, apmopmenyého nak nentémakxa ekpéwomo; xép apagko' appekkenma meyke ekyeykhamaxche mók nentémakxa. Appékessessamók axta chá'a exchep apkelánéseykekxa apheykha m'a Jacob énxet'ák apagkok, yetlo ektaqmalma aptémakxa.

⁵ ¡Kólpeykesho Wesse' egegkok, Dios egagkok, kóltekxeyák kéltapnák ma'a apmonye' aphakxa nak! ¡Dios apteme appagkanamap!

⁶ Moisés tén han Aarón axta han aptamhéyak apkelmaxnéssesso énxet'ák apagkok; keñe axta han Samuel apteme apkelpeykessamo m'a apwesey. Yátegmowagkok axta chá'a Wesse' egegkok apkeltamho enxoho chá'a epasmok.

⁷ Elpaqhetchesek axta chá'a Dios ma'a kañe' yaphope, apkeláneykegkek axta chá'a m'a apkeltémókxa axta chá'a etnahagkok, tén han ma'a segánamakxa apmésso axta.

⁸ Wesse', Dios egagkok, ¡yátegmowagkok axta chá'a exchep ma'a! Aptemegkek axta exchep Dios apagkok meyaqmagkáseykekxa apkeltémakxa m'a, apkellegassáseykegkók axta eyke han chá'a, eñama ekmaso apkeltémakxa.

⁹ Kólpeykesho Dios Wesse' egegkok, ¡kóltekxeyák kéltapnák ma'a amonye' nak egkexe apagkok ekpagkanamaxche'! ¡Appagkanamap ma'a Dios Wesse' egegkok, cham'a Wesse' egegkok nak!