Salmos 98 - Biblia Enxet

¡Wesse' egegkok apteme néten ekyókxoho aqsok!

¹ ¡Kólmeneykmásses Wesse' egegkok, axnagkok negmeneykmasso, hakte apkeláneyak ma'a aqsok sempelakkasso nak agweta'! ¡Apmallanegkek yetlo ekyawe agko' apmopwána, tén han apyennaqte ekteme nak ekpagkanamaxche'!

² Apkellegassegkek Wesse' egegkok ma'a ektémakxa apmallanma, apxekmóssegkek aptémakxa ekpéwomo nápaqta'awók apyókxoho énxet'ák nak keso náxop;

³ megkalwagqeykmok apkelásekhayo tén han melyenyaweykha m'a énxet'ák Israel. ¡Weykmók néxa xapop apkelwete énxet'ák apmallanma m'a Dios egagkok!

⁴ Kólmeneykmásses Dios kélyókxoho kélheykha nak keso náxop yetlo ekpayheykekxa kélwáxok; kalpayhekxoho agko' kélwáxok, kólmeneykmásses negmeneykmasso.

⁵ Kólmeneykmásses negmeneykmasso Wesse' egegkok, yetlo kélpáwasso arpa, tén han ma'a yát'axpog.

⁶ Kólmeneykmés yetlo ekpayheykekxa kélwáxok, nápaqto' Wesse' egegkok, apteme nak Wesse' Apwányam, yetlo kélpáwasso kélaqkahasso.

⁷ Kaxtegyow wátsam ekwányam, tén han ekyókxoho aqsok ekhéyak nak kañe', tén han ma'a ekyókxoho nélwanmeygkaxa', yetlo m'a apheykha nak awáxok;

⁸ wátsam, kóltekpogmakha kélmék; egkexe, kólyepetchekxa kélmók, kólwehesha kólátsaha

⁹ nápaqtók Wesse' egegkok, apxegakmo nak yaqwayam etnehek wesse' apwányam keso náxop. Elanha sa' apyókxoho énxet'ák keso nélwanmeygkaxa', yetlo ekpéwomo aptémakxa, meyke ekyeykhamaxche mók.